Ձեր վստահելի աղբյուրը

Միջազգային վարկանշային ցուցանիշներով ԵՊՀ-ն տարածաշրջանի առաջատար բուհն է: Այդ մասին են վկայում «Webometrics Ranking of World Universities»-ի հրապարակած արդյունքները: Բարձր վարկանշային բուհերի շարքում մի քանիսն առանձնանում են առավել բարձր հեղինակությամբ և վստահությամբ: Դրանցից 3-ի («Շանհայի», «Թայմսի», «QS-ի» ռեյտինգներ) հետ ԵՊՀ-ն առայժմ չի առնչվում, որովհետև ինչպես Մայր բուհը, այնպես էլ հայաստանյան մյուս բարձրագույն հաստատություններն այսօրվա դրությամբ այդ ռեյտինգներում հայտնվելու համար չունեն համապատասխան ցուցանիշներ:

ԵՊՀ մամուլի ծառայության հաղորդմամբ, վերոնշյալ ռեյտինգներն առանձնացնում են աշխարհի 100-500 լավագույն համալսարանները: Նշենք, որ նախկին ԽՍՀՄ տարածքից նրանց ցուցակներում հայտնվում են միայն Մոսկվայի Լոմոնոսովի անվան պետական և Սանկտ Պետերբուրգի պետական համալսարանները:

«Webometrics»-ը, որի ցուցանիշներին հետևում է ԵՊՀ-ն, աշխարհի լավագույն ռեյտինգավորողներից մեկն է: Այն ռեյտինգավորում է աշխարհի շուրջ 20.000 համալսարաններ, որոնցից շուրջ 5000-ը եվրոպական են, 6000-ը` ասիական, 7000-ը` ամերիկյան և այլն:

Հաշվի են առնվում հիմնական 4 չափանիշներ` պաշտոնական կայքի էջերի քանակը որոնման Google.com, Yahoo.com, Live.com (msn), Exalenq.com կայքերում, այլ ռեսուրսներից դեպի բուհի պաշտոնական կայք կատարված արտաքին հղումների քանակը, կայքում Adobe Acrobat (pdf), Adobe PostScript (ps), Microsoft Power point (ppt) ձևաչափով առկա փաստաթղթերի քանակը, ցիտման ինդեքսը (այսինքն` բուհի գիտնականների աշխատանքներին արված հղումները):

«Եթե առաջին երեք չափանիշները նկարագրում են բուհի պաշտոնական կայքը, ապա 4-րդը ռեալ խոսում է պրոֆեսորադասախոսական կազմի պոտենցիալի մասին, այսինքն` ինչքանով են նրանց հետազոտական աշխատանքները տեսանելի համացանցում»,-մեկնաբանում է ԵՊՀ ուսումնական աշխատանքների գծով պրոռեկտոր Ալեքսանդր Գրիգորյանը:

«Webometrics»-ն իր ուսումնասիրության արդյունքները ներկայացնում է տարին երկու անգամ` տարվա սկզբին և կեսին: Վերջին արդյունքները հայտարարվել են այս տարվա ամռանը:

«Անկեղծ ասած, մենք ցանկացած ռեյտինգի մոտենում ենք որոշակի վերապահումով, բայց վերջերս շատ նորաձև դարձավ գործունեության գնահատականը դրանց միջոցով տալը,- նշում է Ալեքսանդր Գրիգորյանը և հավելում,- մինչև այս տարի, ըստ «Webometrics»-ի, մենք հայկական համալսարանների մեջ զբաղեցնում էինք 3-րդ տեղը Հայաստանի ամերիկյան և Ռուս-հայկական (Սլավոնական) համալսարաններից հետո և գտնվում էինք առաջին 5000-ի մեջ»:

Մեկ տարի առաջ ԵՊՀ-ն զբաղեցնում էր 4392-րդ տեղը, այս տարվա սկզբին` 4651-րդ տեղը, իսկ այս ամռանը այդ ցուցանիշը հասել է 2856-ի, և ԵՊՀ-ն հայկական բուհերի մեջ դարձել է առաջատարը: Ցիտման ինդեքսի ցուցանիշով մեր համալսարանը զբաղեցնում է 1051-րդ տեղը 20.000 համալսարանների շարքում: Հավելենք միայն, որ հայաստանյան բուհերից ԵՊՀ-ին հաջորդում է Ռուս-հայկական (Սլավոնական) համալսարանը` զբաղեցնելով 3252-րդ տեղը:

Չնայած տարածված այն կարծիքին, թե մեր հարևան երկրների համալսարաններն ավելի բարվոք դիրքերում են, քան հայկականները, սակայն ուսումնասիրությունները այլ բան են վկայում: Այսպես` Ադրբեջանի ամենաբարձր վարկանիշ ունեցող «Khazar University»-ն զբաղեցնում է 6211-րդ տեղը, Բաքվի պետական համալսարանը` 11736-րդ տեղը, իսկ Վրաստանի առաջատար «Ilia State University»-ն հայտնվել է 5915-րդ հորիզոնականում: Նշենք, որ հարևան երկրների ազգային համալսարաններն իրենց վարկանիշով զգալիորեն զիջում են մասնավորներին: