Ձեր վստահելի աղբյուրը

Հայաստանն այն պետություններից է, որի բարձրագույն ուսումնական համակարգն ԽՍՀՄ փլուզումից հետո խորը տրանսֆորմացիների կարիք ուներ: Անկախության այս 20 տարիների ընթացքում բարձրագույն կրթական համակարգի տրանսֆորմացիան անցել է ցավոտ, երկար ճանապարահ: Այսօր մի կողմից ունենալով ժամանակին ձևավորված կրթական լավագույն ավանդույթների պահպանման խնդիր, միաժամանակ նկատվում է նաև առաջընթացի ու բարեփոխումների կարիք:

«Բարձրագույն կրթության ֆինանսավորում» միջազգային համաժողովի բացման ժամանակ ասաց Հայաստանի ԿԳ նախարար Արմեն Աշոտյանը:
Հիշեցնենք, որ Երևանում մեկնարկել է Հայաստանի և Լեհաստանի Բոլոնիայի գործընթացի համանախագահության շրջանակում ՀՀ կրթության և գիտության նախարարության կողմից կազմակերպած միջազգային համաժողով` նվիրված բարձրագույն կրթության ֆինանսավորման խնդիրներին:

Ա. Աշոտյանն իր խոսքում ասաց, որ Հայաստանը 2008 թ. մաս կազմելով Բոլոնիայի գործընթացի, եզակի հնարավորություն է ստացել` ազգային ավանդույթների կրթական համակարգում գոյություն ունեցող ավանդույթների հիման վրա ձևավորել կրթական համակարգ, որ կարողանա բավարարել քաղաքացու, հասարակության, տնտեսության շահերն ու ակնկալիքները: Ա. Աշոտյանը ներկայացնելով այն խնդիրները, որ առկա են Հայաստանի բարձրագույն կրթական համակարգում, ներկայացնելով այն մարտահրավերները, որ պետք է դիմակայել ու հաղթահարել, միաժամանակ նկատեց, որ բարձրագույն կրթությունը այսօր բավական թանկ է: Ըստ նրա, խնդիրը լուծելու համար, անհրաժետ է երրորդ սեկտորի` բիզնես սեկտորի ներգրավումը բարձրագույն կրթության ֆինանսավորման գործում: «Անհրաժեշտ է մտածել երկարաժամկետ ներդրումների միջոցով ապահովել լավագույն որակի աշխատուժ, արդյունքում` տնտեսական համապատասխան եկամուտներ ու շահույթներ ստանալու համար»,- ասաց նախարարը:

Որպես խնդիր, նա առանձնացրեց նաև բարձրագույն կրթության եռամասնության խնդիրը, որն առկա է բոլոր երկրներում: Ֆինանսավորման մեխանիզմների բարելավումը, ըստ Ա. Աշոտյանի, պետք է նպաստի կրթության արդյունավետության, որակի, մատչելիության բարձրացմանը: Նա ասաց նաև, որ կրթության որակի բարձրացման համար գնում են բարձրագույն ուսումնական հաստատությունների օպտիմալացման ճանապարհով. Հայաստանում այսօր գործում է 23 պետական և միջպետական կարգավիճակ ունեցող և շուրջ 40 մասնավոր բարձրագույն ուսումնական հաստատություն: