Ձեր վստահելի աղբյուրը

Նախագահ Սերժ Սարգսյանի հրամանագրերով Հայաստանի Հանրապետության անկախության հռչակման 20-րդ տարեդարձի առթիվ` իրենց բնագավառներում ակնառու նվաճումների և հաջողությունների, լավագույն արդյունքների հասած վաստակաշատ ներկայացուցիչներ, հայապահպանության գործում նշանակալի ավանդ ունեցած և հայրենիքին զորավիգ եղած մի խումբ անձինք պարգևատրվել են պետական բարձրագույն պարգևներով:

Հայաստանի Հանրապետության շքանշաններով և մեդալներով պարգևատրված, ինչպես նաև պատվավոր կոչումների արժանացած սփյուռքահայության ականավոր ներկայացուցիչների, գիտության, կրթության, առողջապահության և տնտեսության բնագավառի մի խումբ անձանց, զինված ուժերի և ուժային կառույցների ծառայողների, դիվանագիտության ասպարեզում հաջողություններ արձանագրած դիվանագետների պարգևները հանձնվեցին Հանրապետության ղեկավարի կողմից` այսօր ՀՀ նախագահի նստավայրում տեղի ունեցած պարգևատրման արարողության ժամանակ:

Պետական բարձր պարգևների արժանացածներին Նախագահը շնորհավորեց և մաղթեց հաջողություններ:
Արվեստի և մշակույթի բնագավառներում ունեցած ստեղծագործական նվաճումների համար Մեսրոպ Մաշտոցի մեդալով պարգևատրվեց գրող, հրապարակախոս Մերուժան Տեր-Գուլանյանը: Նա, շնորհակալություն հայտնելով պարգևատրվելու համար, նշեց, որ ցանկացած բնագավառի գնահատանքը մեծագույն պատիվ է: Ըստ նրա` գնահատել մշակույթը, բանակը, գիտությունը, սպորտը, դրանք այն բոլոր գույններն են, որոնք պետությունը դարձնում են հայրենիք:

«Ինչպես ցեղական նժույգը պղտոր ջուր չի խմում, այդպես էլ մեր ժողովուրդը հազարամյակների ընթացքում անցավ, եկավ հասավ այս օրը և երբեք չփոխեց իր բնույթը` հավատարիմ մնալով իր ավանդույթներին, սկզբունքներին, լեզվին և մշակույթին»,- ասաց Մ. Տեր-Գուլանյանը:

Հեռուստատեսության բնագավառում ներդրած ավանդի համար բարձրագույն պարգևի արժանացած Սուսաննա Շահինյանը Panorama.am-ի թղթակցի հետ զրույցում նշեց, որ ըստ արժանվույն գնահատվեց այն ամենը, ինչ տարիներ շարունակ ձեռք է բերել իր աշխատանքային կենսագրության ընթացքում:

«Հանրապետության նախագահից ստանալ նման պարգև ոչ բոլորին է հաջողվում, եթե աշխարհի ամենահայտնի աստղերին նայենք, ապա նրանք էլ իրենց երկրի առաջին դեմքից հազիվ թե պարգևներ ստացած լինեն: Իհարկե, այս օրն ավելի հիշարժան է ինձ համար, կրկնապատիկ, հազարապատիկ հիշարժան, քանի որ պարգև ստանում եմ Հայաստանի անկախության հռչակման 20-րդ տարեդարձի նախաշեմին: Խորհին շնորհակալություն եմ հայտնում ՀՀ նախագահին իմ աշխատանքային տարիներին այսպիսի բարձր գնահատական տալու համար»,- նշեց Ս.Շահինյանը: 

Վաստակավոր արտիստի կոչման արժանացած Գայանե Հովհաննիսյանը խոտովանեց, որ այս օրվան վաղուց է սպասել: «Շուրջ 40 տարի է, ինչ բեմում եմ և շատ էի սպասում այս օրվան, վերջապես իմ ցանկությունն իրականացվեց: Այսօր իմ կյանքի երջանիկ օրերից մեկն է` ստանալ Վստակավոր արտիստի պատվավոր կոչում Հանրապետության նախագահից, իրոք պատվաբեր է: Եթե պաշտոնապես նման գնահատանքի ես արժանանում, ուրեմն առաջին հերթին դու գնահատվել ես ժողովրդի կողմից»,- հուզմունքով նկատեց երգչուհին` հավելելով, որ ուրախ է ոչ միայն իր, այլ պատվավոր կոչումների արժանացած բոլոր արվեստագետների, զինվորականների համար:

Դուդուկահար Արմեն Գրիգորյանը, ով այսօր ստացավ վաստակավոր արտիստի կոչում` նշեց, որ նման կոչման արժանանալը մեծ պատիվ է, նաև`պարտավորեցնող. «Ես շնորհակալ եմ ՀՀ նախագահին, մշակույթի նախարարին, որ գնահատեցին իմ այսքան տարիների աշխատանքը և նման կոչման արժանացրեցին»:

Մովսես Խորենացու մեդալով պարգևատրված Երևան քաղաքի պատմության թանգարանի տնօրեն Արմինե Սարգսյանի խոսքերով` երկրի առաջին դեմքից պարգև ստանալը մեծ պատասխանատվություն է ենթադրում և այդ պատասխանատվության տակից պետք է արժանապատվորեն դուրս գալ: «Անհրաժեշտ է ավելի ջանասիրաբար աշխատել` արձանագրելով նորանոր հաջողություններ հետագա աշխատանքում և նվիրվել մեր հայրենիքին»,-ասաց Ա. Սարգսյանը:

Հայապահպանության գործում նշանակալի ավանդ ունենալու համար պարգևատրվեց նաև «Մարմարա» օրաթերթի գլխավոր խմբագիր Ռոբեր Հատտեճյանը: Նրա խոսքերով` սա յուրաքանչյուր մարդու համար մեծ պատիվ է: «Այսօր զինվորականներն իրենց շքանշաններն ստանալու ժամանակ ասում էին` ծառայում եմ Հայաստանի Հանրապետությանը, ես պետք է ասեմ, որ մենք բոլորս ենք ծառայում Հայրենիքին` թե Հայաստանում, թե Սփյուռքում: Եթե մենք հպարտ ենք, որ հայ ենք, ուրեմն մենք ծառան ենք մեր Հայրենիքի և մեր ձեռքից եկածը կանենք ոչ թե մեր գրպանի, այլ Հայաստանի և հայկական ինքնության պահպանման համար: Շատ ուրախ եմ, որ այսօր պարգևների արժանացան բազամթիվ մարդիկ` մտավորականներ, զինվորականներ: Եթե այսքան մարդ շքանշանի է արժանացել, ապա դա նշանակում է, որ այսքան մարդ ծառա է Հայաստանին»,- ասաց Ռ.Հատտեճյանը:

Վաստակավոր բժշկի կոչմանն արժանացած Հանրապետական անձավաբուժության կենտրոնի տնօրեն Անդրանիկ Ոսկանյանը նշեց, որ պարգև ստանալ նշանակում է, որ աշխատողը միշտ հարգված է: Նա շնորհակալություն հայտնեց Նախագահին և իր կոլեգաներին, որ իր երկար տարիների կատարած աշխատանքը ըստ արժանվույն գնահատեցին: «Եթե աշխատողը միշտ հարգված և գնահատված է, դա նշանակում է, որ երկիրը զարգանում է: Եթե երկրում հարգվում է աշխատանքը, գնահատվում է հաջողությունը, ապա, իհարկե, այդ պետությունն ունի ապագա»,- ասաց Ա.Ոսկանյանը:

Հայրենիքին մատուցած ծառայությունների համար երկրորդ աստիճանի մեդալով պարգևատրված ազատամարտիկ Մխիթար Մելքոնյանը նշեց, որ իր համար շատ կարևոր է այս պարգևը, որովհետև տարիների ընթացքում մեծ ներդրում ես ունեցել պետության համար, և այն պետության ղեկավարության ուշադրությունից դուրս չի մնացել: «Շատ ոգևորող է, և կարևոր է այն գիտակցությունը, որ այնուամենայնիվ արած աշխատանքը, նվիրումը գնահատվում է: Հայաստանը բավական նախադրյալներ ունի զարգանալու, ավելի հզորանալու»,- ասաց Մ. Մելքոնյանը: