Ձեր վստահելի աղբյուրը

ԱՄՆ կատարած աշխատանքային այցի շրջանակներում ՀՀ Նախագահ Սերժ Սարգսյանը սեպտեմբերի 22-ին այցելել էր Էլլիս Կղզի, որտեղ Կազմակերպությունների ազգային էթնիկական կոալիցիայի նախագահ Նասեր Կազեմինին Նախագահ Սարգսյանին շնորհել էր «Էլլիս կղզի» Պատվո մեդալը` ԱՄՆ-ի եւ Հայաստանի միջեւ հարաբերությունների զարգացման գործում Սերժ Սարգսյանի ունեցած ներդրման, Հարավային Կովկասում խաղաղության պահպանմանը նրա նվիրումի, ինչպես նաեւ Հայաստանում ներգաղթյալների արդյունավետ ինտեգրման ուղղությամբ ակտիվ գործունեության համար: Տեղական մամուլում հնչեցին իրարամերժ գնահատականներ, ուստի որոշ պարզաբանումների խնդրանքով Panorama.am-ը դիմեց ԿԱԷԿ-ին. ստորև ներկայացնում ենք այդ կազմակերպության մամուլի հետ կապերի համակարգող Օտտո Կոկայի հետ հարցազրույցը:

-Պարոն Կոկա, ինչպես տեղեկանում ենք ԿԱԷԿ-ի կայքից, Էլլիս Կղզու պատվո ցուցակում մի քանի ԱՄՆ Նախագահներ են ընդգրկված: Հետաքրքիր է իմանալ` ինչու նման մեդալ շնորհվեց հենց Հայաստանի Նախագահին, և ընդհանրապես` ինչպիսի՞ն է առաջադրման գործընթացը:
-Շնորհակալություն ենք հայտնում ԿԱԷԿ-ի աշխատանքներին եւ վերջերս ՀՀ Նախագահ Սերժ Սարգսյանին շնորհված Էլլիս Կղզու Պատվո մեդալի հանձնմանը ցուցաբերած ձեր հետաքրքրության համար:

Քանի որ Էլլիս Կղզին աշխարհում հայտնի է որպես ազատության դարպաս, Էլլիս Կղզու Պատվո Մեդալը շնորհվում է մարդկանց, ովքեր սատարում են անկախությանը, ազատությանը եւ բազմազանությունը: Նախ յուրաքանչյուր թեկնածու առաջադրվում է, մանրամասն ուսումնասիրվում է մեր աշխատակազմի կողմից եւ քննվում համապատասխան էթնիկ Խորհրդում: Այս գործընթացն անցած թեկնածուներին հաստատում է ԿԱԷԿ նախագահը:

Ազատ եւ տնտեսապես կայուն Հայաստանի տեսլականի եւ առաջնորդության համար, Նախագահ Սարգսյանը առաջադրվել էր ԿԱԷԿ Խորհրդի պատվարժան մի անդամի կողմից: Այդ առաջադրումը քննվել էր համապատասխան գործընթացով, եւ մենք պատիվ ունեցանք անձամբ շնորհելու մրցանակը նախորդ շաբաթ: Ես վստահ եմ, որ դուք ճանաչում եք Հայաստանի պատմական կարեւորությունը համաշխարհային մշակույթում: Խորհրդային բռնապետությունից անկախացած Հայաստանն անցած 20 տարիների ընթացքում իրեն դրսեւորել է որպես ուժեղ, արդյունավետ հասարակություն ունեցող երկիր, որն արժանի է աշխարհի ճանաչմանը իր տնտեսական եւ քաղաքացիական կայունության համար: Նախագահ [Սարգսյանը] կարեւոր դեր է խաղացել այս պայքարի սկզբից ի վեր: Ինչպես եւ [ԿԱԷԿ մեդալակիր] ԱՄՆ Նախագահները իրենից առաջ, նա ևս գիտակցում է անկախության, ազատության եւ բազմազանության [ապահովման] կարեւորությունը խաղաղ եւ հաջողակ պետություն կառուցելու հարցում:

-Հայաստանի Նախագահ Ս.Սարգսյանը առաջին օտարերկրյա առաջնորդն է, ում ԿԱԷԿ-ի կողմից շնորհվել է Էլլիս Կղզու Պատվո Մեդալ: Այդ մեդալի մասին Հայաստանում իրազեկության խնդիր կա, ինչը տարբեր մեկնաբանությունների տեղիք է տալիս: Օրինակ, ամերիկահայ մի լրագրող վերջերս հայտարարեց, որ «այդ մեդալը ստանում են բոլոր այն ներգաղթյալները, որոնք 50 հազար դոլար են մուծում Էլլիս կղզուն»: Նա նաեւ պնդել էր, թե դա «մասնավոր անձի սարքած մեդալ է», որը նաեւ շնորհվել է մի քանի ԱՄՆ նախագահների, «որովհետեւ նրանք մեծ օգնություն են ցուցաբերել այդ կղզուն»: Ինչպե՞ս կարող եք գնահատել նման պնդումները:
-Այս հարցը պահանջում է հստակ շեշտադրում. Էլլիս Կղզու Պատվո Մեդալը երբեք չի գնվել եւ չի կարող գնվել: Այն շնորհվում է բացառապես նրանց, ովքեր իրենց երկրի, մշակույթի կամ տեղական համայնքի համար նշանակալից ներդրում են ունեցել: Ինչպես վկայում են արձանագրությունները, Էլլիս Կղզու Պատվո Մեդալը երկար եւ հարգանքի արժանի պատմություն ունի, իսկ մեդալակիրներն այն անձինք են, ովքեր ուժեղացրել են ժողովրդավարության դերը այստեղ Միացյալ Նահանգներում կամ արտերկրում:

ԿԱԷԿ-ի դերը տեղական քաղաքական քննարկումներին մասնակցելը կամ որևէ, թեկուզ արհեստավարժ, մեկնաբանի հայտարարություններին արձագանքելը չէ, ով հակասություն է հորինում` իր գործունեության համար հիմք ապահովելու համար: Դրա փոխարեն, ԿԱԷԿ դերը հստակ է, մեր մրցանակի շնորհման չափանիշերը շարունակաբար փաստագրվել են, ԿԱԷԿ-ը վայելում է լայն ազգային աջակցություն ամբողջ Միացյալ Նահանգներում, եւ մենք նշում ենք բազմազանությանը սատար կանգնելուն, կրոնական եւ էթնիկ հանդուրժողականությունը խրախուսելուն ուղղված մեր գործունեության 25-րդ տարեդարձը…

Մեր պատմությունը ինքին խոսուն է, եւ ԿԱԷԿ ռազմավարական առաքելությունը լավագույնս ներկայացվել է Նախագահ Սարգսյանին [շնորհված մեդալով]:

-Այս մրցանակը տուրք էր Նախագահին` որպես նշանավոր անհատի՞, թե հայ ազգին, ավելի կոնկրետ` իր թիկունքում կանգնած ամերիկահայերին:
-Պատվո Մեդալը շնորհվել է անձամբ պարոն Նախագահին` առանց որեւէ անհատ ամերիկացու կամ հայի շահերի հետապնդման: