Ձեր վստահելի աղբյուրը

Հայաստանում ամերիկյան համալսարանի 20-ամյակին նվիրված հանդիսավոր միջոցառմանն այսօր մասնակցել են նաև ՀՀ վարչապետ Տիգրան Սարգսյանն ու ԿԳ նախարար Արմեն Աշոտյանը:

Տ.Սարգսյանը, ինչպես Panorama.am-ին հայտնեցին Կառավարության տեղեկատվության և հասարակայնության հետ կապերի վարչությունից, իր խոսքում հայտարարել է, որ ՀՀ անկախության 20-ամյակի համադրումը ամերիկյան համալսարանի 20-ամյակի հետ ունի հետևյալ խորհուրդը` «ժամանակակից արագ փոփոխվող աշխարհում մեր անկախ պետականության ամրապնդման հիմնական գործիքը պետք է լինի գիտելիքը»:

Վարչապետը գոհունակություն է հայտնել նաև, որ Հայաստանի Ամերիկյան համալսարանն ունի Միացյալ Նահանգների արտոնագիր, ինչը վկայում է, որ այն այսօր գործընթացներն իրականացնում է ԱՄՆ-ում ընդունված չափանիշներին համապատասխան: Ընդգծելով, որ տարածաշրջանում Հայաստանի Ամերիկյան համալսարանի առկայությունը մեր երկրի հարաբերական առավելություններից է, կառավարության ղեկավարն ասել է.

«Մենք պետք է լրացուցիչ ջանքեր գործադրենք համալսարանի գործառույթների ընդլայնման առումով` հասկանալով, որ ապագա մրցակցության մեջ մենք կարող ենք հաղթել` տաղանդաշատ երիտասարդներին կրթելով»:

Տ.Սարգսյանի որոշմամբ համալսարանի հիմնադրման 20-ամյակի առթիվ և կրթության ու գիտության բնագավառներում ներդրած ակնառու ավանդի համար ՀՀ պետական ճարտարագիտական համալսարանի մեխանիկա-մեքենաշինական ֆակուլտետի պրոֆեսոր, «Հայաստանի ամերիկյան համալսարան» հիմնադրամի հոգաբարձուների խորհրդի անդամ Յուրի Սարգսյանը պարգևատրվել ՀՀ վարչապետի հուշամեդալով։