Մշակույթի նախարարությունը մտահոգ է Ազատության հրապարակով
Ազատության հրապարակը կրկին ուշադրության կենտրոնում է ու կրկին վերածվել է...այս անգամ` քաղաքական թատերաբեմի. Հանրահավաք-նստացույցներ են։
Ոստիկանությունն ու արդարադատության նախարարությունը դրանք չթույլատրված են համարում։
Ամբողջ ամառ Օպերայի բակն է, թե հրապարակը, փչովի խաղալիքներն «էին զարդարում»: Այնինչ` Ազատության հրապարակը, որպես ամբողջական միավոր, ընդգրկված է ՀՀ կառավարության 2004 թ-ի նոյեմբերի 7-ի N 1616-Ն որոշմամբ հաստատված Երևան քաղաքի պատմության և մշակույթի անշարժ հուշարձանների պետական ցուցակում: Այս փաստը հաստատեց նաև ՀՀ Մշակույթի նախարարությունը, որին Panorama.am-ը դիմել էր որոշակի հարցադրումներով` հասկանալու` գերատեսչության մտավախությունները, ըստ այդմ` քաղաքական մոտեցումները` մասնավորապես, ու գործառույթները` ընդհանրապես։
ՀՀ մշակույթի նախարարության պատմության և մշակույթի հուշարձանների պահպանության գործակալության պետ Սերժիկ Առաքելյանից ստացված պատասխանում կարդում ենք.
«Այստեղ իրականացվող գործընթացները կանոնակարգվում են «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքի և ՀՀ կառավարության 2002 թ.-ի ապրիլի 20-ի N 483 որոշմամբ հաստատված «Պատմության և մշակույթի անշարժ հուշարձանների պետական հաշվառման, ուսումնասիրման, պահպանության, ամրակայման, նորոգման, վերականգնման և օգտագործման կարգի» պահանջներին համապատասխան:
Մասնավորապես, նշված օրենքի 38-րդ հոդվածի համաձայն, հուշարձանների օգտագործումը թույլատրվում է, եթե այն համապատասխանում է հուշարձանի բնույթին, չի վնասում հուշարձանի անվթարությունը, չի նսեմացնում և աղճատում դրա պատմական, գեղարվեստական արժեքը»:
Այնուհետ Ս.Առաքելյանը նշում է, որ մեկ այլ կետի համաձայն, հուշարձանի զբաղեցրած տարածքում արգելվում է հուշարձանի նպատակային օգտագործմանը չհամապատասխանող գործունեությունը.
«Այդ տարածքում կարող են կատարվել միայն հուշարձանի ուսումնասիրման, պահպանման, մշակութային միջոցառումների և ցուցադրությունների կազմակերպման, ինչպես նաև հուշարձանի նպատակային օգտագործմանը նպաստող վերականգնման և նորոգման աշխատանքներ՝ այսինքն մշակութային ուղղվածության գործունեություն»,- մեջբերման ավարտ:
Այս դեպքում ի՞նչ կամ գուցե ո՞ւմ է սպասում նախարարությունը, որպեսզի իր խոսքն ասի, այն էլ առկա օրենքի տառին համապատասխան ու բարձրաձայնի իրողությունը։
Հանրահավաքների հետ կապված. «Ձեր հարցադրմանն ի պատասխան տեղեկացնում ենք, որ հուշարձան համարվող հրապարակում ներկայում առկա վրանները (ժամանակավոր կառույցները), որոնք օգտագործվում են որպես շուրջօրյա կացարաններ, խաթարում են հուշարձանների տեսողական և համալիրի պատմամշակութային միջավայրի ընկալման բարենպաստ պայմանները, խոչընդոտում են մշակութային բնույթի միջոցառումների իրականացմանը, ինչը հակասում է օրենքի պահանջներին»,-շարունակում է նախարարության ներկայացուցիչը:
Լավ` լռելը չհասկացանք, պատասխանը հասկացանք. հիմա` իսկ արդյո՞ք Ազատության հրապարակը տևական ժամանակ անճոռնի խաղահրապարակի վերածելը օրենքի տառին համապատասխան է : Արդյո՞ք այն կարելի է մշակութային ուղղվածության միջոցառում համարել, որ դարձյալ նախարարության ծպտունը ամիսներ շարունակ չլսվեց: Սրան ի պատասխան նամակագիրը գրում է.
«Ազատության հրապարակում պարբերաբար կարող են իրականացվել մշակութային- ժամանցային միջոցառումներ, և անցած տարի, մանկական խաղահրապարակի ժամանակավոր առկայությամբ, կազմակերպվել էին երեխաների հանգստի և ժամանցի միջոցառումներ, ինչը չի հակասում օրենքի պահանջներին»:
Բայց հակասում է նախարարության կողմից բերված պատճառաբանությանը, թե ինչո՞ւ, ըստ օրենքի, այստեղ չպետք է անցկացվեն հանրահավաքներ.
«Այդ տարածքում կարող են կատարվել միայն հուշարձանի ուսումնասիրման, պահպանման, մշակութային միջոցառումների և ցուցադրությունների կազմակերպման, ինչպես նաև հուշարձանի նպատակային օգտագործմանը նպաստող վերականգնման և նորոգման աշխատանքներ՝ այսինքն մշակութային ուղղվածության գործունեություն»,- դարձյալ մեջբերենք վերը նշված հատվածը, որպեսզի հասկանանք` խաղահրապարակի առկայությունն ինչպե՞ս է նպաստում, ասենք, հուշարձանի նպատակային օգտագործմանը:
Հաջորդ հարցն ընդհանրապես մնաց անպատասխան: Այդպես, հետաքրքրվել էինք` ««Հայ Ֆեստ» թատերական փառատոնի շրջանակում Ազատության հրապարակում նախատեսված բացօթյա ներկայացումը չեղյալ է համարվել: Ինչպիսի՞ն է Մշակույթի նախարարության մոտեցումն այս հարցի վերաբերյալ» և ստացել հետևյալ գրառումը. «Այո, ստեղծված իրավիճակը պատճառ հանդիսացավ նախարարության հովանավորությամբ իրականացվող «Հայֆեստ» ամենամյա միջազգային փառատոնի շրջանակներում նախատեսված «Միհր» թատրոնի բացօթյա ներկայացման չկայացմանը, «ինչի կապակցությամբ կազմակերպիչները և մասնակիցները հայտնեցին իրենց ափսոսանքը»:
Ինչ վերաբերում է նրան, թե արդյո՞ք նախարարությունը վերահսկում է հուշարձանների արտաքին տեսքն ու մնացածը, պատասխանում գրված է, որ 2010 թ-ին Մշակույթի նախարարության անմիջական մասնակցությամբ իրականացվել են հրապարակում գտնվող արձանների հիմնանորոգման և տարածքի բարեկարգման աշխատանքները և որ նախարարության համապատասխան ստորաբաժանումները պարբերաբար իրականացնում են Երևանի պատմամշակութային հուշարձանների դիտանցում, մասնավորապես՝ Ազատության հրապարակի հուշարձանային համալիրի մասով.
«Սակայն ստեղծված իրավիճակը հնարավորություն չի տալիս այսօր լիարժեք իրականացնել այն, առավել ևս հրապարակում տիրող իրավիճակի պարագայում»:
Քաղաքում առկա այլ պատմամշակութային հուշարձանների տեսքի հետ կապված հարցին, թե` իսկ արդյոք համագործակցում են քաղաքապետարանի գլխավոր դիզայների հետ, մշակույթի նախարարությունից հավատացնում են, թե` այո. նույնիսկ, որ «քաղաքապետարանի կողմից նախարարության համաձայնեցմանն են ներկայացվում հուշարձան-շենքերի գեղարվեստական հարդարման նախագծերը: Անհրաժեշտության դեպքում որոշակի լրամշակումներից հետո իրականացվում են դրանց հարդարման աշխատանքները»:
Նկատի կառնենք։
Լրահոս
Տեսանյութեր
Թովմասյանը՝ Նանուշյանին. Նշել եք՝ ծրագրի իրականացումը պայմանավորված է օրենքով, բայց օրենքը չկա
