Ձեր վստահելի աղբյուրը

«Ժառագություն» խմբակցության պատգամավոր Անհաիտ Բախշյանը Հայաստանի Հանրապետության մրցունակ գիտության կայացմանը միտված մի քանի առաջարկներով դիմել է Հայաստանի ազգային մրցունակության հիմնադրամի գործադիր տնօրեն Արման Խաչատուրյանին: Նա դժգոհություն է հայտնել, որ Հայաստանում որևէ միջազգային գիտական շտեմարան հասանելի չէ գիտնականների և ուսանողների համար, ապա առաջարկել Հայաստանի բոլոր մշակութային, գիտական ու կրթական հաստատությունները ապահովել անսահմանափակ և անվճար wi-fi ինտերնետային կապով:

Պատգամավորի նամակի բովանդակությունը ներկայացնում ենք ամբողջությամբ:

«Վերջերս մասնակցել եմ «Պահանջում ենք գիտության բարձր ֆինանսավորում» խմբի անդամների հետ կազմակերպված մի շարք քննարկումների, որոնց ժամանակ նրանք ներկայացրել են Հայաստանի Հանրապետության մրցունակ գիտության կայացմանը միտված մի շարք առաջարկներ: Կարևորելով Խմբի բարձրացրած խնդիրները, իրատեսական համարելով առաջարկված լուծումները և արժևորելով Հայաստանի ազգային մրցունակության դերն ու նպատակները` Ձեզ եմ ներկայացնում ստորև նշված առաջարկները:

1. Հայաստանում որևէ միջազգային գիտական շտեմարան և տվյալների բազա հասանելի չէ գիտնականների և ուսանողների համար։ Այնինչ մրցունակ գիտություն ունենալու համար անհրաժեշտ է, որ մեր հայրենակիցներն ինտեգրվեն միջազգային գիտական ու ինֆորմացիոն հոսքերին։

Հայաստանի մշակութային ու գիտական ոլորտների մրցունակությունը խթանելու նպատակով առաջարկում եմ, որ Ձեր հիմնադրամը ապահովի միջազգային SCOPUS, Thomson Reuters, JSTOR և այլ գիտական շտեմարանների ազատ մուտք ապահովող համակարգերի անվճար հասանելիություն Հայաստանի բոլոր մշակութային, գիտական ու բարձրագույն կրթական հաստատությունների համակարգիչներից։

2. Առաջարկում եմ սահմանել ամենամյա մրցանակներ` հայաստանցի լավագույն երկու հարյուր գիտնականների համար: Համապատասխան ցանկի որոշման հիմք ընդունելով միայն միջազգային չափանիշների կիրառումը` օրինակ՝ պարտադիր տպագրությունների առկայությունն ազդեցության գործակից (Impact Factor) ունեցող և/կամ գրախոսվող միջազգային պարբերականներում, տպագրությունների հղման գործակիցը (Citation Index), H-index (Հիրշի ինդեքս), լավագույն միջազգային գիտական հրատարակչություններում տպագրված գրքերի առկայությունը և այլն։

Որպես տարբերակ` առաջարկում եմ սկսած 2000 թվականից մինչ օրս քսան տպագրություն (միջինը տարեկան 2 տպագրություն) ունեցող գիտնականներին տրամադրել խրախուսավճար՝ 1,200,000 դրամ արժողությամբ, ինչը հավասար է ՀՀ ԳԱԱ թղթակից անդամի մեկ տարվա պատվո վճարին։

3. Միջազգային կուտակված գիտելիքները հասու դարձնելու և գիտնականների մրցունակությունը բարձրացնելու նպատակով` առաջարկում եմ Հայաստանի բոլոր մշակութային, գիտական ու կրթական հաստատությունները ապահովել անսահմանափակ և անվճար wi-fi ինտերնետային կապով»: