Ձեր վստահելի աղբյուրը

Panorama.am-ին վերջերս դիմել էին Խ.Աբովյանի անվան Մանկավարժական համալսարան ընդունված մի խումբ երիտասարդներ ու խնդրել պարզել մի հետաքրքիր հանգամանք: Այդպես, նրանք բոլորն արդեն իսկ ունեն բարձրագույն տարբեր ուսումնական հաստատություններ ավարտելու մասին վկայող դիպլոմներ, այլ կերպ ասած` Մանկավարժական համալսարան ընդունվել են երկրորդ բարձրագույն մասնագիտություն ձեռք բերելու նպատակով: Բուհի ընդունող հանձնաժողովում գործերը հանձնելու պահին նրանց տեղեկացրել են, որ դիմորդները, չգիտես ինչու, պարտավոր են իրենց դիպլոմները պատճենահանել ու դա հաստատել նոտարական գրասենյակում, ընդ որում տեղեկացրել են, որ համալսարանի կողքը նոտարական գրասենյակ է բացվել: Եվ դրանից հետո միայն հանձնել մնացած գործերի հետ` համապատասխան վճարումներն ամեն քննության համար կատարելով:

Անհասկանալի է, իհարկե, թե ինչի՞ն է պետք հիշյալ բուհին ունենալ դիպլոմի պատճենը նոտարով հաստատած, քանի որ եթե այդպիսով նա փորձ է անում ստուգել դրա իսկությունը, ապա դա ամենևին էլ կրթական օջախի գործառույթը չէ, այլ, ասենք, դատախազության:

Այս կարգը, թերևս, նորույթ է Հայաստանի կրթական համակարգում, այդ իսկ պատճառով, նախ, փորձեցինք ճշտել հայաստանյան այլ հաստատություններ ընդունվածներից (խոսքը, հիշեցնենք, արդեն իսկ բուհ ավարտած դիմորդներին է վերաբերում), թե արդյո՞ք նրանց դեպքում ևս նույն կարգն է գործել`պատճենահանած թղթի կտորը հաստատել նոտարով ու նոր հանձնել համալսարանի արխիվում պահվելու համար:
Ըստ այդմ էլ հետաքրքրվեցինք այլ բուհերից ու դիմորդներից: Օրինակ, Երևանի պետական համալսարանի ընդունող հանձնաժողովից, որտեղ զարմացան ու նշեցին, որ միայն դիպլոմի պատճենն է պետք ներկայացնել (ի՞նչ նոտար), որը կպահվի իրենց մոտ : Ինչպես նաև Գիտությունների ազգային ակադեմիայի մագիստրատուրա ընդունվածներից` գուցե մագիստրատուրա ընդունվելու կարգում է նման փոփոխություն արձանագրվել: Բայց, կրկնում ենք, ոչ մի, ոչ էլ մյուս դեպքում դիպլոմի քսերոքս ոչ ոք չի պահանջել, ոչ ոք չի հաստատել և , փաստորեն, նրանց վրա գործեր հանձնելու ծախսերը հավելյալ 6-7 հազարով չեն ավելացել:

Մնում էր միայն դիմել ՀՀ Կրթության և գիտության նախարարություն պարզելու, թե այդ ի՞նչ կամայականությունների զոհ են դարձել Մանկավարժական համալսարանի դիմորդները: Նախարարության բարձրագույն բուհական և հետբուհական մասնագիտական կրթության վարչության պետ Ռոբերտ Սուքիասյանը հարցը լսելուն պես անմիջապես զարմացած հետաքրքրվեց, թե ինչի՞ մասին ենք խոսում: Բացատրեցինք, բերեցինք նաև օրինակը, որ նույն երկրի մի բուհում նման բան կա, մյուսում` ոչ: Ընդ որում երկուսն ել պետական բուհ են համարվում: Արդյունքում ստացանք հետևյալ պատասխանը.

«ՀՀ-ում գործող բուհ ընդունվելու համար անհրաժեշտ փաստաթղթերի թվում դիպլոմի, այն էլ դիպլոմի քսերոքսի վավերացում պետք չէ: Նման կարգ օրենքով նախատեսված չէ»: Հետո ևս մեկ անգամ ճշտեց, որ խոսքը ՀՀ քաղաքացիների՞ մասին է և, ստանալով դրական պատասխան, կրկնեց.
«Նման բան չպետք է լինի»:

Պարոն Սուքիսյանը խոստացավ, որ կզբաղվի խնդրով ու կճշտի մեր բարձրացրած խնդրի մանրամասները: Սակայն արդյո՞ք այդ գործընթացից հետո Մանկավարժական համալսարանի արդեն իսկ ուսանող հանդիսացողներին կվերադարձվեն, փաստորեն, անիմաստ ծախսված գումարները դժվար է պատասխանել: