ՄԱԿ-ում ՀՀ դեսպանի պատասխանը Ադրբեջանի ներկայացուցչի ելույթին

Քաղաքական 15:53 07/10/2011

ՄԱԿ-ում ՀՀ դեսպանի պատասխանը Ադրբեջանի ներկայացուցչի ելույթին

Նյու Յորքում տեղի են ունենում ՄԱԿ-ի Գլխավոր ասամբլեայի հիմնական կոմիտեների նիստերը: Զինաթափման ու միջազգային անվտանգության հարցերը քննարկող ԳԱ առաջին կոմիտեում ելույթներ են ունեցել Հայաստանի և Ադրբեջանի պատվիրակությունները:

Քննարկումների ընթացքում ադրբեջանցի պատվիրակը փորձել է մեղադրել հայկական կողմին 2001թ. Եվրոպայում սովորական սպառազինությունների համաձայնագրով նախատեսված թվաքանակից ավելի 8 տանկ թաքցնելու հարցում:

Նշելով, որ ադրբեջանական քարոզչական զինանոցի ծեծված փաստարկներով հագեցած պատվիրակության հայտարարությունն ակնհայտորեն դուրս է կոմիտեի այդ օրվա քննարկումների օրակարգը կազմող զինաթափման հրատապ հարցերի շրջանակից, Հայաստանի պատվիրակության ներկայացուցիչն իր խոսքում նշել է միջազգային հանրությանը մոլորեցնելու Ադրբեջանի անհաջող փորձերի մասին, որոնք վտանգում են տարածաշրջանային անվտանգությունն ու կայունությունն, փակուղի են տանում նաև տարածաշրջանում առկա հակամարտությունների լուծմանը միտված միջնորդների ջանքերը:

Ադրբեջանի կողմից միջազգային տարբեր ատյանների, այդ թվում ՄԱԿ-ի Գլխավոր քարտուղարի, ԵԱՀԿ անդամ պետությունների ու Մինսկի խմբի համանախագահների կողմից շփման գծից դիպուկահարներին հեռացնելու և վստահության ամրապնդմանը ուղղված քայլեր ձեռնարկելու հորդորների անտեսումը ու Ադրբեջանի միլիտարիստական քաղաքականությունը հակասում է միջազգային պայմանագրերի, մասնավորապես` Եվրոպայում սովորական սպառազինությունների համաձայնագրի և ռազմական բյուջեների կրճատման, տարածաշրջանային զինաթափման, սպառազինությունների թափանցիկությանն ուղղված ՄԱԿ-ի բանաձևերի տառին և ոգուն:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: