Ձեր վստահելի աղբյուրը

Այսօր ՀՀ նախագահ Սերժ Սարգսյանն ընդունեց տեղեկատվական տեխնոլոգիաների ոլորտում 2011թ. Հանրապետության Նախագահի ամենամյա կրթական պարգևների արժանացած ուսանողներին ու աշակերտներին, ովքեր նախագահից ստացան տարբեր անվանակարգերում շնորհված իրենց պարգևները: Պարգևատրված 38 երիտասարդներից 23-ը տարբեր բուհերի ուսանողներ են, 15-ը՝ տեխնիկական ուղղվածությամբ կրթօջախների աշակերտներ: Պարգևները շնորհվում են բարձր առաջադիմություն ունեցող այն ուսանողներին, ովքեր ակտիվորեն մասնակցում են սոցիալական ծրագրերին, տարբեր օլիմպիադաների և մրցույթների, գիտական հոդվածների հեղինակներ են, ունեն բազմակողմանի գիտելիքներ ու այլ տաղանդներ:

Հաղթողների համար սահմանվել են «Սինոփսիս Արմենիա» ՓԲԸ-ի կողմից հովանավորվող հետևյալ անվանակարգերն ու մրցանակները` գլխավոր մրցանակ, լավագույն ասպիրանտ, լավագույն մագիստրանտ, լավագույն բակալավր, լավագույն սփյուռքահայ մասնակից, լավագույն ուսանողուհի, լավագույն աշակերտ: Վկայականների հետ միասին հաղթողները ստացան ՏՏ ոլորտը խորհրդանշող հատուկ կրթական նախագահական հուշխորհրդանիշ-արձանիկներ:

Նախագահ Սերժ Սարգսյանը իր ողջույնի խոսքում նշեց, որ տեղեկատվական տեխնոլոգիաների բնագավառում այս մրցանակաբաշխությունը դարձել է արդեն ավանդական և անգամ կարող է տպավորություն ստեղծվել, որ այն միշտ էլ եղել է:

«Ես վստահ եմ, որ ապագայում մրցանակաբաշխությունը լինելու է շարունակական, քանի որ այս բնագավառը մեր երկրի զարգացման հեռանկարային ուղղություններից է: Եթե այլ երկրներում ձգտում են արդյունահանել իրենց ընդերքի հարստությունը, ապա մենք ստիպված ենք և պիտի պեղենք մեր տաղանդները, ապավինենք մեր ուղեղներին»,- ասաց ՀՀ նախագահը:

Ըստ Ս.Սարգսյանի` Հայաստանի բարեկեցությունը պետք է կառուցել ստեղծագործական աշխատանքով, քանի որ օգտակար հանածոները մի օր վերջանալու են. դրա օրինակները բազմաթիվ են, կան համաշխարհային պատմության մեջ շատ այդպիսի օրինակներ: Նրա խոսքերով` փորձը ցույց է տալիս, որ մարդու ստեղծագործական ունակությունները ուղղակի անսահմանափակ են: Նախագահը նկատեց, որ այսօր շուրջ 350 ընկերություններով և հազարավոր միջազգային որակի մասնագետներով տեղեկատվական և թվային տեխնալոգիաների բնագավառը Հայաստանի արդյունաբերության ամենաբարձր հավելյալ արժեք ստեղծող և ամենաարագ զարգացող ճյուղն է. աճը տարեկան կազմում է շուրջ 25 տոկոս:

«Զարգացման այս տեմպը պահպանելու նպատակով մենք խրախուսել և խրախուսելու ենք Հայաստանի երիտասարդության հետաքրքրությունը տեղեկատվական տեխնալոգիաների հանդեպ: Մեր խնդիրն է, որ Հայաստանի երիտասարդները և նրանց միավորող ընկերությունները զբաղեցնեն ամենաառաջավոր դիրքերը համաշխարհային շուկայում: Վստահ եմ, որ այս բնագավառի երիտասարդ մասնագետները երբեք չեն բախվելու աշխատանքային զբաղվածության խնդրին»,- ընդգծեց Ս.Սարգսյանը` հավելելով, որ այդ մասին բազմիցս ասել են տեղեկատվական և թվային տեխնալոգիաներով զբաղվող բոլոր ընկերությունների ղեկավարները: Ավելին, շատ կարևոր է, որ այդ ընկերությունները մշտապես ներդրում են կատարում իրենց մասնագետների որակավորումը բարձրացնելու և նրանց վերապատրաստելու նպատակով, այսինքն` յուրաքանչյուր մասնագետ ստանում է հնարավորություն քայլել ժամանակին համընթաց, տեղյակ լինել գիտության նորագույն ձեռքբերումներին, մասնակից լինել առաջընթացին:

«Ձեզնից յուրաքանչյուրը մրցանակը վաստակել է իր ազնիվ ու հետևողական աշխատանքով»,- ևս մեկ անգամ շնորհավորելով մրցնակակիրներին ասաց Ս.Սարգսյանը և մաղթեց, որ այս ճանաչումը լինի նրանց առաջին քայլը ձեռքբերումներով ու հաղթանակներով լի նրանց կյանքում: Իսկ նրանց օրինակը, ըստ նախագահի, պետք է վարակիչ լինի ընկերների և շրջապատի համար: