Ձեր վստահելի աղբյուրը

Արդեն տեղեկացրել էինք այն մասին, որ Կրթության նախարարությունը պատրասվում է մոտ ապագայում Ազգային Ժողով ներկայացնել օրենքի նախագիծ, ու եթե այդ փոփոխությունները հավանության արժանանան օրենսդրի կողմից, Հայաստանն անցում կկատարի համընդհանուր ներառական հանրակրթության:

Panorama.am-ի հարցադրմանն ի պատասխան, թե ե՞րբ օրինագիծը կլինի Ազգային Ժողովում, Կրթության և գիտության նախարար Արմեն Աշոտյանը տեղեկացրեց, որ հաջորդ ուրբաթ նախարարությունում կոլեգիայի նիստ է գումարվելու, որի օրակարգում նաև «Հանրակրթության մասին» օրենքում փոփոխություններ և լրացումներ կատարելու մասին օրինագծերի փաթեթն է: Այն, նշեց նախարարը, պատրաստվել է միջազգային և տեղական փորձագետների, նախարարության, ԱԺ պատգամավոր Անահիտ Բախշյանի ակտիվ մասնակցությամբ. «Կոլեգիայի նիստում քննարկումից հետո պատրաստվում ենք շրջանառել օրինագիծը կառավարության ատյաններում և հավանության արժանանալու դեպքում ներկայացնել այն խորհրդարան»,- տեղեկացրեց Ա.Աշոտյանը:

Մեր հարցին ի պատասխան` նախարարը նույնպե՞ս հեղափոխական է այդ օրինագիծը համարում, ինչպես նախօրեին Panorama.am-ին տված հարցազրույցում որակել էր Անահիտ Բախշյանը, Ա.Աշոտյանն արձագանքեց. «Նա աշխարհայացքային հեղափոխություն է բերում կրթական համակարգ, որը զարգացել և շարունակում է զարգանալ այս տարիներին: Եվ տիկին Բախշյանը բավականին ճիշտ էր շեշտել, որ ԱՊՀ երկրների թվում մենք, կարելի է ասել, ներառական կրթության ներդրման առաջատարներից ենք: Իսկ բացի այդ, առաջատարն ենք նաև երեխաների իրավունքների պաշտպանության, կրթության մատչելիության, հավասար հնարավորությունների և այլնի առումով»:

Ավելացրեց նաև` իրականում սա այլ հասարակությանը նախապատրաստող օրենք է. «Հասարակություն, որտեղ չկա խտրականություն երեխաների նկատմամբ և որտեղ ներառական կրթությունը ոչ այնքան գրանտային ծրագիր է, որքան աշխարհայացքային հիմնաքար հանրակրթական համակարգում»:

Panorama.am-ի մյուս զրուցակիցը գլխադասային` ԱԺ Կրթության և գիտության հարցերի մշտական հանձնաժողովի նախագահ Արտակ Դավթյանը,  նույնպես կարևորում է օրենքի մուտքը օրենսդրական դաշտ, քանի որ գտնում է, հասարակության հումանիստ լինելը իրականում գնահատվում է նրանով, թե որքանո՞վ է հասարակությունն ականջալուր բնակչության խոցելի խմբերի պահանջներին. «Իսկ ներառական կրթությունը հենց այդ խնդիրներից ու կարևոր խնդիրներից մեկն է լուծում»,- նշեց նա:

Պատգամավորին հիշեցրեցինք, որ երբ 11 տարի առաջ ներառական կրթությունը մասամբ մտավ կրթական համակարգ, այն բավականին դժվարությամբ ընդունվեց հասարակության կողմից: Արդյո՞ք այսօր մենք պատրաստ ենք ներառական կրթությունը դարձնել համատարած. «Կարծում եմ մեծամասամբ այո, որովհետև բազմաթիվ աշխատանքներ արվել են, շատ դպրոցներում իրականացվում են նմանատիպ գործընթացներ, դրանում ներգրավված են բազմաթիվ հասարակական կազմակերպություններ … Մի խոսքով, արդեն ժամանակն է, որպեսզի իրականում անցնենք բոլոր կրթօջախներում համընդհանուր ներառական կրթության»,- շեշտեց  Ա.Դավթյանն ու հավելեց` որպես գլխադասային հանձնաժողովի նախագահ միանշանակ ողջունում է օրինագծի գոյությունը:

Հիշեցնենք` 2011թ. դրությամբ Հայաստանում` Երևանում և մարզերում, գործում է 60 ներառական դպրոց, որտեղ սովորում է կրթական առանձնահատուկ պայմանների կարիք ունեցող ավելի քանի 1400 երեխա:

Նախորդիվ`  http://panorama.am/am/education/2011/10/13/anahit-bakhshyan/