Ձեր վստահելի աղբյուրը

Սիրիական «SANA» լրատվական գործակալությունը ներկայացրել է Թուրքական «Sol Postal» համացանցային կայքում հրապարակված նշանավոր թուրք մշակութային գործիչ, ռեժիսոր Սեմիր Ասլանյուրեկի հարցազրույցը: Թուրք գործիչը հայտարարել է, որ սիրիական Ջիսիր Ալ-Շուղուր քաղաքից և նրա շրջակայքից դեպի թուրքական տարածք սիրիական փախստականների զանգվածային արտագաղթը, որը նախորդել է այդ քաղաքում տեղի ունեցած իրադարձություններին, վկայում է, որ դա կազմակերպված է եղել նախապես:

Ասլանյուրեկը նշել է, որ իր կողմից արված հայտարարությունը հիմնված է արժանահավատ տվյալների վրա, որոնք ստացվել են Անթաքիա քաղաքում տեղակայված վրանային ճամբարների այցելուներից: Ըստ ականատեսների` թուրքական իշխանությունները թույլատրում են այցելել վերոնշյալ ճամբարներ միայն իրենց ներկայացուցիչներին կամ նրանց մերձավորներին:

Թուրք գործիչը հաստատել է այն տեղեկությունը, որ սիրիացի փախստականները ցանկանում են վերադառնալ հայրենիք, մինչդեռ թուրքական իշխանությունները խոչընդոտում են նրանց:

Սեմիր Ասլանյուրեկը նշել է, որ  ըստ որոշ տվյալների, սիրիական փախստականների ճամբարներում իրականացվում է զենքի մատակարարումներ. Այսպես, նրա անձնական վկայությամբ` ամեն օր «Յալդաղ» ճամբար է մտնում շտապօգնության շուրջ 20 մեքենա, հարց է առաջացնում. «Ինչի՞ համար են այնտեղ այդ մեքենաները»: Անհնար է, որ նման քանակությամբ բուժանձնակազմի անհրաժեշտություն զգացվի` տուժած սիրիացիներին օգնություն ցուցաբերելու համար, և դա կարող է գնահատվել` որպես գոյություն ունեցող լուրերի իրավացիության անուղղակի ապացույց:

Հիշեցնենք, որ օրեր առաջ զենքի մատակարարման և զինված խմբավորումներին աջակցելու գործում արևմտյան պետություններին և Թուրքիային մեղադրել են նաև տեղեկատվական հարցերով Սիրիայի նախագահի խորհրդական Բուսեյնա Շաաբանը, ինչպես նաև Սիրիայի ԱԳ նախարար Վալիդ Ալ Մուալլեմը: