Ձեր վստահելի աղբյուրը

ՀՀ նախագահ Սերժ Սարգսյանն այսօր աշխատանքային այցով մեկնել էր Արագածոտնի մարզ: Հանրապետության ղեկավարը մասնակցեց Ապարանի բժշկական կենտրոնի բացման արարողությանը, ծանոթացավ կենտրոնի շտապօգնության կայանի, պոլիկլինիկայի, անհետաձգելի բուժօգնության, վիրահատական և վիրաբուժական, հետվիրահատական ինտենսիվ բուժման և այլ բաժանմունքների պայմաններին:

Ինչպես լրագրողների հետ զրույցում նշեց ՀՀ առողջապահության նախարար Հարություն Քուշկյանը, հիվանդանոցը վերանորոգվել է ՀՀ նախագահի մարզերի համաչափ զարգացման ծրագրի շրջանակներում: Ըստ նրա` նախորդ տարի Հայաստանի մարզերում բացվել են 5 խոշոր բժշկական հիմնարկներ: Հ.Քուշկյանը վստահեցրեց, որ հանրապետության բժշկական կենտրոնների արդիականացման ծրագրերը շարունակական են լինելու:

Հ.Քուշկյանը հայտնեց, որ ՀՀ կառավարության և Համաշխարահային բանկի կողմից իրականացված ընդհանուր ներդրումները Ապարանի բժշկական կենտրոնում կազմում են շուրջ 1 միլիարդ 214 միլիոն 602 հազար դրամ:

«Այսօր մենք ունենք լիարժեք վերանորոգված, վերազինված, անհրաժեշտ սարքավորումներով հագեցած հիվանդանոց, ինչը հնարավորություն կտա բնակիչներին բարձր մակարդակով բուժօգնություն տրամադրել:Բացի դրանից, բնակիչները այլևս կարիք չունեն որևէ բուժօգնության համար մայրաքաղաք գնալ, քանի որ հիվանդանոցը հագեցած է այն բոլոր անհրաժեշտ սարքավորումներով, ինչը հարկավոր է որակյալ բուժօգնություն կազմակերպելու համար»,-ասաց նախարարը:

Ապարանի բժշկական կենտրոնի տնօրեն Հայկ Շմավոնյանի խոսքերով` հիվանդանոցային հատվածի առաջին հարկում տեղակայվել են պլանային ու անհետաձգելի դեպքերի նախատեսված ընդունարանը` բուժօգնության տրամադրման բոլոր հնարավոր միջոցներով, ընդհանուր թերապևտիկ ու մանկաբուժական բաժանմունքները, ինտենսիվ թերապիայի բաժինը: Ծրագրի շրջանակներում հիմանորոգվել է նաև Ապարանի բժշկական կենտրոնի դիահերձարանի շենքը. տեղադրվել է նոր գեներատոր, վերանորոգվել է էլեկտրական ենթակայանը, կատարվել արտաքին և ներքին ջրահեռացման դրենաժային համակարգի անցկացման աշխատանքներ:

Նշենք, որ կենտրոնը հիմնանորոգվել է Համաշխարհային բանկի «Առողջապահական համակարգի արդիականացանում» վարկային ծրագրի շրջանակում: Ապարանի բժշկական կենտրոնը կազմավորվել է Ապարանի հիվանդանոցի եւ պոլիկլինիկայի միաձուլման արդյունքում: Բոլոր հիվանդանոցային ու պոլիկլինիկական ծառայությունները, բացառությամբ հակատուբերկուլոզային բաժանմունքի, տեղակայվել են բժշկական կենտոնի հիմնական մասնաշենքում: Ծրագրի արդյունքում վերանորոգվել է երկհարկանի հիմնական մասնաշենքը, կատարվել են տանիքի ծածկի տեղադրման, արտաքին պատերի հարդարման և արտաքին լուսավորության աշխատանքներ: Բացի դրանից, հիմնանորոգվել են տանիքը, ջրամատակարարման, էլեկտրասնուցման, գազամատակարարաման և ջեռուցման համակարգերը, ինչպես նաև կաթսայատունը:

Ապարանի բժշկական կենտրոնում ներկայումս աշխատում է 38 բժիշկ, 76 միջին բուժաշխատող: