Ձեր վստահելի աղբյուրը

Հայաստանում կանանց 18 տոկոսը տառապում է անպտղությամբ: Նման եզրահանգման են եկել Առողջապահության համաշխարհային կազմակերպության մասնագետները կատարած վերլուծությունից հետո: Ընտանիքի պլանավորման և սեռական առողջության կենտրոնի վերարտադրողականության բաժնի ղեկավար, ԵՊԲՀ-ի մանկաբարձության և գինեկոլոգիայի ամբիոնի դոցենտ Գեորգի Պողոսյանը իր առօրյա գործունեության ընթացքում հասկացել է, որ այս թիվը գնալով աճելու միտում ունի:

Մասնագետի խոսքով, Հայաստանում հիմնականում անպտղության պատճառ են սեռավարակները, կրելախախտը, երբ հաճախ են լինում վիժումներ, և սթրեսը: Սեռավարակները, Գեորգի Կիմիչի խոսքով, «ներմուծվում են» Հայաստան «խոպանչիների» միջոցով: «Ամուսինները գնում են, դրսում աշխատում են, հետո գալիս են սեռավարակների խրձով», նկատեց մասնագետը:

Մյուս հանգամանքը, որ կինը չի կարողանում երեխա ունենալ, սթրեսածին վիճակն է, իսկ այդպիսի վիճակ, ըստ Կիմիչի, կարող է առաջանալ այն ընտանիքներում, որտեղ կա «սկսեուրի ֆակտրը»: «Ջահել աղջիկը ամուսնանալուց վախով ու սթրեսով է լցվում, երբ հայտնաբերում է, որ դաշտան է սկսվել մոտը: Այդպիսի բան չի կարելի թույլ տալ, ամուսնանում եք հանգիստ կյանք արեք», -հորդորեց Կիմիչը` նկատելով, որ նորմալ է, երբ ամուսնությունից 6 ամիս հետո կինը չի հղիանում:

Սեռական առողջության կենտրոնի վերարտադրողականության բաժնի ղեկավարի համար տհաճ է, երբ Երևանի փողոցներում հանդիպում է «քիփ ջինսերով» աղջիկների, որոնց «փորն ու կոնքերը շալվարից դուրս են եկել»: «Կանայք պետք է ընտրեն սեզոնին հարմար հագուստ, բնական նյութերից, չէ՞ որ քիփ ջինսերն էլ կարող են սեռական օրգանների վրա ազդեցություն ունենալ», -ասաց նա:

Լրագողներից մեկը հետաքրքրվեց, թե ժողովրդագրական իրավիճակի ծանր պայմաններում, արդյո՞ք պետությունն ամեն ինչ անում է կանանց վերարտադրողական առողջության պահպանման համար: Կիմիչը, դրական գնահատեց պետական ծրագրերը և հավելեց. «Մի քանի տարի է` ինչ անկախ, ինքնուրույն պետություն ենք և դժվար է պահանջել, որ 100 տոկոսով ապահովեն վերարտադրողական առողջությունը: Օրինակ, տեսեք, շատ լավ էր, որ կանանց տվեցին հղիության վաուչերները (նկատի ունի սերտիֆիկատները-թղթ.) և այժմ ինչքան պահանջվում է անվճար օգնություն է տրամադրվում հղի կանանց»:

Լրագրողի դիտարկմանը, թե երիտասարդ ընտանիքներին երեխա ունենալու համար խրախուսանքները բավարար չեն և հարկերն էլ բարձր, Գեորգի Կիմիչը արձագանքեց հարցով. «Որտեղի՞ց նրանց (նկատի ունի պետությանը-թղթ.) փող, որ տան երիտասարդներին, -ու շարունակեց, - Հավատացեք, որ մարդիկ, ովքեր նստած են մեր վերևներում, լավ էլ հասկանում են, որ ժողովրդագրական վիճակը ծանր է: Իհարկե, լավ կլիներ, որ մեր պետությունն էլ Լիբիայի նման երիտասարդներին 7000 դոլար փող տար, Քադաֆին տվեց, բայց տեսա՞ք ինչ եղավ Քադաֆիի հետ»: