Ձեր վստահելի աղբյուրը

Այսօր Ծաղկաձորում մեկնարկել է «Ազգ, պետություն, հայրենիք. պետականության գաղափարը» խորագիրը կրող երիտասարդ պատմաբանների միջազգային գիտաժողովը, որը նվիրված է ՀՀ անկախության 20-ամյակին։ Գիտաժողովի կազմակերպիչներն են Հայաստանի երիտասարդական հիմնադրամը և Խ. Աբովյանի անվան հայկական պետական մանկավարժական համալսարանը։ Եռօրյա համաժողովին մասնակցում են գիտնականներ Լեռնային Ղարաբաղի Հանրապետությունից, Ռուսաստանից, ԱՄՆ-ից, Բուլղարիայից, Իսպանիայից, Լեհաստանից, Մոլդովայից։

Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը կարևորեց երիտասարդ մասնագետների ներգրավմամբ նման միջոցառումները, քանի որ դրանք հնարավորություն են տալիս երիտասարդների շուրթերից լսել գիտականորեն հիմնավորված որոշակի հետևություններ։ «Այսօրվա համաժողովին ներկա են երիտասարդ գիտնականներ, ովքեր իրենց պատկերացումները կներկայացնեն «պետականություն», «հայրենիք», «սփյուռք», «կրոն», «եկեղեցի» գաղափարների շուրջ։ Գիտաժողովը հնարավորություն կտա հայագիտության ոլորտի երիտասարդ մասնագետներին ինքնադրսևորվել, համախմբել եղած ներուժը, հաստատել կապեր, իրականացնել փորձի փոխանակում։ Այն կօգնի նաև մեր երիտասարդ մասնագետներին կապեր ստեղծել միջազգային տարբեր գիտական կառույցների հետ և հայագիտական միտքն առավել հաջողությամբ ներկայացնել միջազգային ասպարեզում»,- նշել է Կարեն Ավագյանը։

ԱՄՆ Հյուսիսային Կարոլինայի Լինոր-Ռայն համալսարանի պրոֆեսոր Դեկարդ Մայքլ Ֆանկը նշում է, որ «ազգ», «պետություն», «հայրենիք» գաղափարներն ինքը փորձում է դասավանդել Միացյալ Նահանգներում, սակայն ամերիկյան երիտասարդության համար այդ թեմաներն այնքան էլ հասկանալի ու հրատապ չեն, որովհետև նրանք չունեն այդ հասկացություններն իրենց մոտ։ «Կարծում եմ` եվրոպական երկրների երիտասարդության համար այդ թեմաներն ավելի հոգեհարազատ են»,- ասում է ամերիկացի գիտնականը։

Վիկտոր Գոտիսանն ազգությամբ մոլդովացի է, սակայն ապրում և աշխատում է Լեհաստանում։ Ըստ նրա, գիտաժողովում քննարկվող թեման խիստ արդիական է, հատկապես փոքր երկրների համար։ «Մարդիկ չգիտեն, թե ինչ է ազգությունը, հայրենիքը։ Մոլդովայում դա ամենամեծ խնդիրներից մեկն է, այնտեղ չգիտեն՝ ովքեր են իրենք՝ մոլդովացի, ռումինացի, ռուս։ Մարդ պետք է առաջին հերթին հասկանա՝ ով է ինքը, այնուհետև փորձի ինքնաիրացվել որևէ երկրում։ Եթե Հայաստանի բնակչությունը միատարր է. 97 տոկոսը հայեր են, ապա Մոլդովայում 65 տոկոսն է մոլդովացի, մյուսները՝ ռումինացի, ռուս, ուկրաինացի»,- նշում է Վիկտոր Գոտիսանը։

Արցախի «Կաճառ» գիտական կենտրոնի նախագահ, պատմական գիտությունների թեկնածու, դոցենտ Մհեր Հարությունյանն իր զեկույցում անդրադառնալու է Արցախում ռազմական շինարարության գործում Աղդամի ազատագրման նշանակության հիմնահարցերին, որտեղ փորձում է արժևորել Աղդամի ազատագրումը և ցույց տալ Արցախում ռազմական շինարարության գործընթացը։ «Կարևորում եմ այս գիտաժողովը, քանի որ այն հնարավորություն տվեց տասնյակ երիտասարդ գիտնականների փոխանցելու իրենց տեսակետները, գիտական ուսումնասիրությունների արդյունքները։

Միջոցառումը փաստում է, որ այսօրվա հայ երիտասարդ գիտնականները փորձում են իրենց ակտիվ դերակատարումն ունենալ մեր պետականության ամրապնդման և ժողովրդի առաջ ծառացած խնդիրների լուծման հարցերում»,- ասում է արցախցի գիտնականը։ Անդրադառնալով եկեղեցու նշանակությանը՝ նա մասնավորապես նշում է, որ եկեղեցին հնուց ի վեր ազգապահպան դեր է ունեցել, ինչն այսօր շարունակվում է. «Եկեղեցու դերը հատկապես կարևորվում է այն մարտահրավերների համատեսքստում, երբ տարբեր աղանդներ, օտարածին գաղափարախոսություններ ինչ-ինչ նպատակներով սողոսկում են մեր պետության, ժողովրդի գիտակցության մեջ։ Կարծում եմ՝ եկեղեցին այսօր մարդկանց շրջանում պետք է գործի քառապատկված եռանդով, եկեղեցու սպասավորները պետք է կապ պահպանեն ցանկացած հայի հետ, որպեսզի կարողանանք դիմագրավել առկա մարտահրավերներին»։

Գիտաժողովի ընթացքում կքննարկվեն մի շարք թեմաներ, այդ թվում՝ «Հայ առաքելական եկեղեցին և նրա դերը երիտասարդների սոցիալականացման գործում», «Բուլղար և հայ ժողովուրդների ճակատագրերի ընդհանությունը Բեսարաբիայում», «Եվրամիություն-Անդրկովկաս հարաբերությունները տարածաշրջանային կոնֆլիկտների համատեքստում», «Ազգային կրթական համակարգի գործառույթները հայ ժողովրդի ազգային անվտանգության համատեքստում», «Արցախյան շարժումը և հայկական սփյուռքը 1988-1990թթ.» և այլն։