Ձեր վստահելի աղբյուրը

Վարչապետ Տիգրան Սարգսյանի և Հնդկաստանի կապի և տեղեկատվական տեխնոլոգիաների պետնախարար Սաչին Պիլոտի մասնակցությամբ այսօր Երևանի պետական համալսարանում բացվել է հայ-հնդկական տեղեկատվական և հաղորդակցության տեխնոլոգիանեռրի կենտրոն՝ Հայաստանի և Հնդկաստանի կառավարությունների միջև կնքված համաձայնագրի շրջանակում:

Կառավարությունից մանրամասնում են, որ կենտրոնի նպատակն է խորացնել երկկողմանի համագործակցությունը ՏՀՏ ոլորտում և նպաստել երկրում համաշխարհային մակարդակի բարձրակարգ ՏՀՏ ոլորտի աշխատուժի զարգացմանը, կազմակերպել համատեղ հետազոտական աշխատանքներ և այլն:

Շնորհավորելով կենտրոնի բացման կապակցությամբ՝ վարչապետը նշել է, որ այն նոր թափ է հաղորդելու ՏՀՏ ոլորտի հեզատոզատական աշխատանքներին և ուսումնական ծրագրերի իրականացմանը: Նշելով, որ կենտրոնի դասախոսները վերապատրաստում են անցել Հնդկաստանում և ուսումնասիրել դասավանդման ոլորտի նոր մեթոդները, վարչապետն ընդգծել է, որ նրանց կուտակած փորձն օգտակար է լինելու նաև Գյումրու տեխնոպարկի զարգացման աշխատանքներում: «Կենտրոնն էապես կնպաստի ՏՀՏ ոլորտի զարգացմանը և հայ-հնդկական հարաբերությունների ամրապնդմանն ու հետագա զարգացմանը»,- ասել է Տիգրան Սարգսյանը:

Ի դեպ, կենտրոնը համալրվել է PARAM գերհամակարգչով, որը տարածաշրջանում միակն է: Այն, վարչապետի խոսքով, բացառիկ հնարավորություն է ստեղծելու առաջին հերթին նոր հետազոտական աշխատանքների իրականացման համար:

Կենտրոնը ապահովվել է անհրաժեշտ ենթակառուցվածքներով, բարձրակարգ փորձագետներով և համակարգչային անհրաժեշտ բոլոր սարքավորումներով:

Կենտրոնի ստեղծման և գործունեության ծրագրի գործընկերն է Երևանի պետական համալսարանը: Կենտրոնի հիմնման աշխատանքներին աջակցել է նաև Համաշխարհային բանկի հայաստանյան գրասենյակը: