Երևանում բացվեց Ֆրիտյոֆ Նանսենի արձանը` «խորհրդանշելով հայ ժողովրդի ջերմությունն ու ակնածանքը»
«Այսօր Հայաստանի մայրաքաղաքի սրտում բացվում է հայ ժողովրդի մեծ բարեկամ Ֆրիտյոֆ Նանսենի արձանը, որպես վկայություն, որ հայ ժողովուրդը իր երախտավորների հիշատակը կրում է իր սրտում: Հայաստանը միշտ եղել է Նանսնեի սրտում, իսկ Հայաստանի սրտում` Երևանի սրտում, այսուհետ կլինի Ֆրիտյոֆ Նանսենի արձանը: Այս արձանը գալիս է ավելանալու Նանսենի անունը կրող այն բազմաթիվ դպրոցներին, փողոցներին, մանկատներին ու հիվանդանոցներին, որոնք սփռված են Հայաստանի տարբեր անկյուններում՝ Երևանում, Սպիտակում, Գյումրիում, Վանաձորում և այլուր, խորհրդանշելով հայ ժողովրդի ջերմությունն ու ակնածանքը Նանսենի պայծառ հիշատակի ու անվան հանդեպ»,- Աբովյան-Մոսկովյան փողոցների հատման մասում նորվեգացի նշանավոր բևեռախույզ, մեծ մարդասեր, «Խաղաղության Նոբելյան մրցանակի» դափնեկիր Ֆրիտյոֆ Նանսենի հուշարձանի բացման արարողության ժամանակ ասաց Հայաստանի արտաքին գործերի նախարար Էդվարդ Նալբանդյանը:
Հուշարձանի բացմանը ներկա էր ՀՀ նախագահ Սերժ Սարգսյանը, փոխվարչապետ Արմեն Գևորգյանը, քաղաքական ու մշակութային գործիչներ:
Նշենք, որ այս տարի լրանում է անվանի բևեռախույզ, գիտնական, հասարակական գործիչ ու հումանիստ, հայ ժողովրդի մեծ բարեկամ Ֆրիտյոֆ Նանսենի 150-ամյակը: Այդ կապակցությամբ ՀՀ կառավարության որոշմամբ ստեղծվել է հոբելյանական հանձնաժողով` փոխվարչապետ Արմեն Գևորգյանի նախագահությամբ: Հանձնաժողովի կողմից կազմվել և հաստատվել է հոբելյանական միջոցառումների ծրագիր, որի շրջանակում իրականացվել են մի շարք միջոցառումներ, պետպատվերով թողարկվել է «Ֆրիտյոֆ Նանսեն` աշխարհի խիղճը» փաստավավերագրական ֆիլմը, հրատարակվել է Ֆելիքս Բախչինյանի «Ֆրիտյոֆ Նանսենը և Հայաստանը» ուսումնասիրությունը: Միջոցառումներն ամփոփվելու են այսօր. Ալ. Սպենդիարյանի անվան օպերայի և բալետի ազգային ակադեմիական թատրոնի նախասրահում նախ կբացվի Ֆ. Նանսենի կյանքին ու գործունեությանը նվիրված լուսանկարների ու գրքերի ցուցահանդես, այնուհետև տեղի կունենա ինչպես նաև հոբելյանական երեկո, որի ընթացքում թատրոնի սիմֆոնիկ նվագախումբի հետ հանդես կգան նորվեգացի դիրիժոր Թերջե Միկելսոնը, մենակատար Թորմոդ Ասգարդը (շեփորահար): Իսկ այսօր առավոտյան ՀՀ ԱԳՆ-ում տեղի է ունեցել Նանսենին նվիրված նամականիշի մարում:
«Մարդկության հիշողությունը պատմության յուրահատուկ մաղն է, որն առանձնահատուկ երախտագիտությամբ է պահում լուսավոր անունները նրանց, ովքեր իրենց կյանքը նվիրաբերել են բարության սերմեր ցանելուն՝ հանուն համամարդկային բարձր արժեքների։ Այդ լուսավոր անուններից մեկն էլ Ֆրիտյոֆ Նանսենն է, որն այդ սերմերը ցանել է երկրագնդի տարբեր կողմերում, եւ այդ սերմերն այսօր ծիլեր են տալիս՝ նրա ծննդյան 150-ամյակին նվիրված միջոցառումների տեսքով, որոնք կազմակերպվում են աշխարհի բազմաթիվ երկրներում, եւ իհարկե՝ նաև Հայաստանում։ Օգնության հասնելով մեր ժողովրդի համար ամենածանր պահին, Նանսենը փրկեց ոչ միայն հարյուր հազարավոր հայերի, այլեւ մեր ժողովրդի սասանված հավատը առ այն, որ մարդը ստեղծված է Աստծո նմանությամբ, որ մարդու մեջ չի կարող մեռնի մարդը եւ մնա միայն ցեղասպան բարբարոս»,- ասաց նա, շարունակելով, որ Ազգերի Լիգայում գաղթականների հարցերով գերագույն հանձնակատար Ֆրիտյոֆ Նանսենը նաև առաջիններից մեկը եղավ, ով անվերապահորեն դատապարտեց 20-րդ դարի առաջին Ցեղասպանությունը և միջազգային բարձր ատյաններում ու քաղաքական հարթակներում իր զեկույցներով և դասախոսություններով բացահայտեց Օսմանյան կայսրության քաղաքականության էությունը ու ազգերի իրավունքների պաշտպանության հարցը Ազգերի Լիգայում դարձրեց օրակարգային խնդիր: «Ահա թե ինչու նաև Հայաստանը չէր կարող անմասն մնալ Նանսենի ծննդյան 150-ամյակի միջոցառումներից, և ահա թե ինչու 2011 թվականը Հայաստանում հռչակվել է այս անվանի գործչի ու մեծ հումանիստի մեծարման տարի»,- նշեց Է. Նալբանդյանը։
Պաշտոնական այցով Երևանում գտնվող Նորվեգիայի ԱԳ նախարար Յոնաս Գահր Շտյորեն ասաց, որ իր համար պատիվ ու հաճուք է, որ ներկա է մեծ մարդասեր Ֆ. Նանսենի հուշարձանի բացմանը: «Խաղաղության նոբելյան մրցանակի դափնեկիր Նանսենի մարդասիրական գործունեությունը հայերի համար մեծ նշանակություն ունի առ այսօր: Տպավորված ենք Նանսնեի մասին հիշողությունը պահելու ձեր կամքով: Նորվեգիայում շատ բան ունեն դրանից սովորելու: Հուսով ենք, որ այս հուշարձանը կծառայի ոչ միայն նրա հիշողությունը վառ պահելու համար, այլ ուսուցանելու մատաղ սերնդին, որ պետք է ձգտել համընդհանուր արժեքների պահպանման ու դրանց զարգացման»,- ասաց նա:
Նշենք, որ հուշարձանի բացմանը ներկա էր նաև Նանսենի թոռնուհի Մարիտ Գրևը: Նա Նանսենի ընտանիքի անունից շնորհակալություն հայտնեց հայ ժողովրդին նրա հիշողությունը վառ պահելու ու այս արձանը կանգնեցնելու համար: Հուշարձանի բացումից հետո նախագահ Սերժ Սարգսյանը Մարիտ Գրևին հանձնեց Հայաստանի Հանրապետությունում հատուկ կացության կարգավիճակը հավաստող անձնագիր և իր ու ամբողջ հայ ժողովրդի անունից շնորհակալություն հայտնեց, որ Ֆրիտյոֆ Նանսենը հազարավոր հայերի այսպիսի անձնագրով աշխարհում իրենց տեղը գտնելու հնարավորություն է տվել:
Հայոց ցեղասպանության թանգարան-ինստիտուտի տնօրեն Հայկ Դեմոյանն ասաց, որ Ֆ. Նանսնեի հայասիրության ու մարդասիրական առաքելության մասին կարելի է խոսել ժամերով: Նա ներկայացրեց նրա կատարած աշխատանքը ու մեծ ավանդը հայ ժողովրդի կյանքում:
Հուշարձանի քանդակագործ Գարեգին Դավթյանն ասաց, որ Ֆ. Նանսենն իր համար ամենաբարձր բարոյական արժեքներ ունեցող մարդկանցից մեկն է ու արձանի մեջ հենց դա է փորձել շեշտել: Քանդակագործը նշեց, որ մեծ մարդասերին պատկերել է գրելանդիական էսկիմոսների տարազով, առանց գլխարկի, քանի որ գլխարկը, ըստ նրա, որոշ չափով պարտավորեցնող էլեմետն է: Գ. Դավթյանն ասաց, որ հուշարձանը կերտել է բրոնզից, պատվանդանը տրավերտինից է, որը ասոցացվում է սառույցի հետ, քանի որ Նանսենը գնացել է բևեռ, բացի այդ` Նորվեգիան հյուսիսային երկիր է:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
