Երևանում ընթանում է «Կրթություն և կարիերա Expo 2011» ցուցահանդեսը
ՀՀ կրթության և գիտության նախարարության և ՎիվաՍել-ՄՏՍ-ի աջակցությամբ այսօր Երևանում բացվեց «Կրթություն և կարիերա Expo 2011» եռօրյա միջազգային մասնագիտացված ցուցահանդեսը, որը թվով տասներկուերորդն է: Մշակութագործարարական այդ միջոցառմանը մասնակցել են Հայաստանի և օտարերկրյա պետական և ոչ պետական ուսումնական հաստատությունների, կրթական ծրագրեր իրականացնող միջազգային և տեղական կազմակերպությունների 55 ներկայացուցիչ:
Ցուցահանդեսի պաշտոնական բացման արարողության ժամանակ խոսքով հանդես եկան ՀՀ կրթության և գիտության նախարար Արմեն Աշոտյանը և ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
ՀՀ կրթության գիտության նախարար Արմեն Աշոտյանը շնորհավորեց բոլորին ցուցահանդեսի հերթական մեկնարկի կապակցությամբ։ Նա հույս հայտնեց, որ ՀՀ-ում կավելանա այն գործատուների թիվը, ովքեր իրականում գիտակցաբար կմոտենան սեփական կադրերի պատրաստման հրամայականին, կկատարեն պատշաճ ներդրումներ կրթության մեջ, շահագրգիռ կլինեն, որպեսզի տնտեսական մրցակցային հավասար պայմաններում՝ ունենալով ուժեղ աշխատուժ, լավ պատրաստված մասնագետներ, կարողանան առավելություններ ստանալ իրենց համապատասխան մրցակիցների հանդեպ։
«Ես ուզում եմ վստահություն հայտնել, որ հայ երիտասարդությունը կօգտվի նաև այսօրվա ցուցահանդեսի հնարավորություններից, ապագայում լավագույն, գիտակցված ընտրություն կատարելու համար»,- ասաց Ա. Աշոտյանը։
ՎիվաՍել–ՄՏՍ-ի գլխավոր տնօրենն իր հերթին վստահեցրեց, որ կրթությունն առանց բիզնեսի ոլորտի շատ կամաց քայլելով կզարգանա։ Ուստի շատ կարևոր է, որ մասնավոր հատվածը կամ մասնավոր բիզնեսը ձեռք մեկնի և կրթության կողքին կանգնի։ Դա համազոր է նրան, որ մենք մտածում և աշխատում ենք ունենալ ավելի լավ, փայլուն, բարեկեցիկ ու կայուն ապագա»,- ասաց Ռ. Յիրիկյանը։
Նա ընդգծեց, որ այս գաղափարն է որպես կադրային զարգացման ծրագիր մի քանի տարի առաջ դրվել ՎիվաՍել-ՄՏՍ ընկերությունում, որի արդյունքում ընկերությունը պայմանագրեր է ստորագրել տարբեր բուհերի հետ, տարբեր բիզնեսների հետ, որպեսզի հնարավորություն տրվի այսօրվա երիտասարդ ուսանողներին՝ համատեղելու գիտելիքն ու փորձը, որպեսզի նրանք ավելի ինքնավստահ պատրաստվեն ու դիմակայեն ապագայի մարտահրավերներին։
«Ինչքան բիզնեսը զարգանա, ինչքան բիզնեսը հզոր դառնա, այն պետք է միշտ կանգնած լինի կրթության կողքին, որովհետև դա ավելի արագ առաջընթաց կտա, որ այս ոլորտը զարգանա, որ այս ոլորտը դառնա ավելի մրցունակ»,- նշեց ՎիվաՍել-ՄՏՍ-ի գլխավոր տնօրենը։ Ցուցահանդեսը կավարտվի նոյեմբերի 17-ին:
Լրահոս
Տեսանյութեր
Կլինի այնպիսի մի շաբաթ, երբ որ այդ լուրը գուցեև ճիշտ լինի. Ավանեսյանը՝ ՔՊ-ի թիրախում լինելու մասին
