Ձեր վստահելի աղբյուրը

Ինչպես ավելի վաղ տեղեկացրել էինք, այսօր ասուլիսում «Գալիք» համալսարանի «Կառավարում» ֆակուլտետի ավարտական կուրսի 51 ուսանողներ ներկայացրեցին իրենց խնդիրը` հիշյալ ֆակուլտետի լիցենզիան ԿԳ նախարարությունը կասեցրել էր դեռևս մեկ տարի առաջ, սակայն ուսանողներին այդ մասին տեղյակ չէր պահվել, ինչի արդյունքում վերջիններս այսօր չեն կարողանում ստանալ իրենց դիպլոմները:

Այս կապակցությամբ այսօր նաև նախարարությունն է հաղորդագրություն տարածել, որում մասնավորապես ասված է.
«ՀՀ կրթության և գիտության նախարարի 18.08.2010թ. 1309-Ա/Ք հրամանով կասեցվել էր Երևանի «Գալիք» համալսարանի արտադրական կոոպերատիվին ՀՀ կրթության և գիտության նախարարի 2000թ. օգոստոսի 24-ի 284-Մ հրամանով տրված բարձրագույն մասնագիտական կրթական ծրագրերով գործունեության թիվ 003 լիցենզիայի գործողությունը: Համաձայն վերը նշված հրամանի համալսարանը 2010 թ-ի սեպտեմբեր ամսից պարտավոր էր ապահովել կասեցված մասնագիտությունների /«Իրավագիտություն» դիպլոմավորված մասնագետի կրթական ծրագիր` հեռակա ուսուցման ձևով, «Կառավարում» դիպլոմավորված մասնագետի կրթական ծրագիր` առկա ուսուցման ձևով, «Օտար լեզու և գրականություն» բակալավրի կրթական ծրագիր` առկա ուսուցման ձևով/ ուսանողների իրազեկումը և փաստաթղթերի տրամադրումը այլ ուսումնական հաստատություններում կրթությունը շարունակելու նպատակով:

«Գալիք» համալսարանը ոչ միայն չի ապահովել նախարարի համապատասխան հրամանի կատարումը, այլև կասեցված մասնագիտությունների գծով կազմակերպել է անօրինական կրթական գործընթաց` ոտնահարելով ուսանողների իրավունքները:

Հաշվի առնելով այն հանգամանքը, որ Հայաստանի բարձրագույն մասնագիտական կրթության համակարգում ԿԳՆ կողմից իրականացվող բարեփոխումները միտված են ուսանողների շահերի պաշտպանությանը և ուսանողի կրթության իրավունքի իրացմանը` տեղեկացնում ենք, որ ԿԳՆ-ն պատրաստակամ է.
  աջակցել տվյալ ուսանողներին շարունակել իրենց կրթությունը հանրապետությունում գործող պետական և ոչ պետական հավատարմագրված բարձրագույն ուսումնական հաստատությունների տվյալ մասնագիտությամբ համապատասխան կուրսերում,
առարկաների տարբերության պարագայում հնարավորություն տալ այդ ուսանողների քննությունները հանձնել անհատական մշակված ժամանակացույցով մինչ ուսումնական կիսամյակի ավարտը,
քննարկել ընդունող ուսումնական հաստատությունների հետ տվյալ ուսանողների ուսման վարձի որոշակի զեղչեր կիրառելու հնարավորությունները»:

Բացի այս, նախարարության հաղորդագրության մեջ նշվում է, որ այսուհետ ևս շարունակելու են վերահսկողությունը կրթության որակի ապահովման նկատմամբ և այդ գործընթացում առաջնային դիտարկվելու է յուրաքանչյուր ուսանողի իրավունքը: