Ձեր վստահելի աղբյուրը

«Գալիք» համալսարանի «Կառավարում» ֆակուլտետի 51 ուսանողների խնդիրը դեռ ոչ մի լուծում չի ստացել: Հիշեցնենք, այս ֆակուլտետի լիցենզիան կասեցվել էր դեռևս մեկ տարի առաջ, սակայն բուհի ղեկավարությունն այդ մասին չէր տեղեկացրել ուսանողներին և միայն ավարտական քննությունների ժամանակ են վերջիններս տեղեկացել, որ դիպլոմ ԿԳ նախարարությունը նրանց չի տալու:

Panorama.am-ը վերջերս այս խնդրի կապակցությամբ ներկայացրել էր ԿԳ նախարար Արմեն Աշոտյանի տեսակետը: Ըստ այդմ, նախարարն ընդգծել էր, որ բուհի ռեկտորատի հետ ինքն առանձին իր անելիքն ունի, իսկ ինչ վերաբերում է ուսանողներին, ապա նրանց հնարավորություն կընձեռվի վերջին 4-րդ կուրսն ուսուցանել մեկ այլ բուհում և հաջորդ տարի, փաստորեն, ստանալ դիպլոմը: Ու անգամ խորհուրդ տվեց, որպեսզի ուսանողները դիմեն դատարան` ընդդեմ բուհի ապօրինությունների:

Սակայն թեմային նվիրված ասուլիսի շրջանակում այսօր պարզ դարձավ, որ քանի դեռ ուսանողները հապաղում են ու հույսները դրել են բուհի խոստումների վրա, բուհի ղեկավարությունն ինքն է ԿԳ նախարարության դեմ հայց ներկայացնելու դատարան: Այդ մասին հայտարարեց «Գալիք» համալսարանի աշխատակազմի ներկայացուցիչ Գևորգ Հարությունյանը. «Նախարարության անգործության արդյունքն է այս ամենը: Եվ պատրաստում ենք դատական կարգով վիճարկել, քանի որ բուհը բացարձակապես իր մեղավորությունը չի տեսնում: Ուսանողների անհանգստությունն էլ` բուհի անհանգստությունն է, քանի որ մենք էլ շահագրգիռ ենք ուսանողներին տալ դիպլոմներ»,- տեղեկացրեց նա:

2010թ-ի հունիսին համալսարանում ստուգումներ են անցկացվել և որոշ խախտումներ հայտնաբերել, ինչի արդյունքում էլ նախարարությունը կասեցրել է «Կառավարում» ֆակուլտետի լիցենզիան: «Լիցենզավորման մասին» ՀՀ օրենքի համաձայն, ներկայացրեց Գ.Հարությունյանը, լիցենզիան կասեցվում է որոշակի ժամկետով, որից հետո բուհը կարող է գերատեսչությանը ներկայացնել հիմնավորող փաստաթղթեր, որոնք վկայում են, թե կասեցման հանգեցրած խախտումները վերացվել են և այդ փաստաթղթերը ներկայացնելուց, նույն օրենքի համաձայն, հնգօրյա ժամկետում նախարարը պետք է հրաման արձակեր` լիցենզիան ընդհանրապես դադարցնելու, կամ էլ կասեցումը վերացնելու մասին. «Նույն օրենքի համաձայն, եթե որևէ մեկի վերաբերյալ հրաման նախարարը չի ընդունում, ապա լիցենզիայի գործողությունը համարվում է վերացված: Այսինքն` «Գալիք» համալսարանը շարունակել է իր գործունեությունը օրինականության շրջանակում»,-շարունակեց աշխատակազմի ներկայացուցիչը:

Այլ կերպ ասած, հիմնվելով ենթադրությունների վրա, համալսարանը շարունակել է ուսումնական գործընթացը, մեկ տարի ուսանողներից գանձել նաև ուսման վարձը 182 հազար դրամի չափով և միայն հունիսին, երբ պետք է քննական հանձնաժողով կազմվեր ու քննություններ լինեին, նախարարությունը հարցմանն ասել է «ոչ»` հիշեցնելով, որ լիցենզիան կասեցված է:

Ինչ վերաբերում է դիպլոմ տալու շահագրգռվածությանը, ապա սրա բացատրությունը, թերևս, նրանում է, որ մինչ օրս էլ բուհի ղեկավարությունը այդ 51 ուսանողներից պահանջում է 24 հազար դրամ վճարել դիպլոմը ստանալու համար: Ավելին` պարտադրում, որ գործերը հանձնեն «Գալիք»-ում մագիստրատուրա ընդունվելու համար, որի դիմաց էլ կստանան դիպլոմները: Այս մասին էլ պատմեցին ասուլիսին ներկա ուսանողները` ներկայացնելով անգամ դիպլոմ ստանալու համար վճարված 24 հազար դրամի անդորրագիրը: Ու «Գալիք»-ի աշխատակազմի ներկայացուցիչն այդպես էլ որևէ կերպ չկարողացավ բացատրել, թե այդ ո՞ր օրենքի հիման վրա ուսանողը պետք է գումար վճարի դիպլոմի դիմաց, որն էլ, ի դեպ, հնարավորություն չունի ստանալու:

Բայց փոխարենը, ուսանողների պնդմամբ, բուհի ղեկավարությունն այսօր-վաղն է անում ու արդյունքում նրանք կորցրեցին 2011-2012 ուսումնական տարում վերջին 4-րդ կուրսը սովորելու ու այլ բուհերում օրինական դիպլոմ ստանալու հնարավորությունը: