Ձեր վստահելի աղբյուրը

Այս տարվա ընթացքում Լեզվի պետական տեսչությունը 75 ստուգում է իրականացրել: 80 տոկոսի դեպքում գործ է հարուցվել, դատարանը կորոշի տուգանքի չափը: 20 տոկոսի պարագայում իրավախախտում չի հայտնաբերվել կամ այն չափի չէ եղել, որ տուգանվեր: Այս մասին ասուլիսում ասաց Լեզվի պետական տեսչության պետ Սերգո Երիցյանը:

Միաժամանակ նա ասաց, որ իրենց ոլորտում կան մի շարք բացթողումներ: «Պատրաստել և շրջանառության մեջ ենք դրել Լեզվի պետական տեսչության մասին օրենսդրական նախաձեռնություն: Մեր տեսչությունը հատուկ օրենք չունի և ուզում ենք, որ խնդիրները լուծվեն Լեզվի պետական տեսչության մասին օրենքով»,- տեղեկացրեց Ս. Երիցյանը:

Նա նշեց նաև, որ դրական միտումներ նկատելի է. «Շատ ցուցանակներ փոխում են` չսպասելով, որ գնանք, արձանագրություն կազմենք ու տուգանենք: Սառույցը սկսում է հալվել»,- ընդգծեց նա: Նշենք, որ օրենքով ցուցանակի վրա հայերենը պետք է գերակա լինի, իսկ զուգակցել այլ լեզուներով` չի արգելվում: Տուգանքը` 100-400 հազար դրամ է:

Ինչ վերաբերում է հեռուստատեսությամբ պտտվող գովազդային տեսահոլովակներին, նա ասաց, որ իրենք իրավունք ունեն միայն ուսումնասիրել այդ ոլորոտը, հորդորել, որ փոփոխությունների ենթարկել: «Մենք այլ իրավասություն չունենք այդ ոլորտում»,- ասաց Ս. Երիցյանն ու ընդգծեց. «Մեր տնտեսվարողներին թվում է, թե օտար անուն դնելը իրենց բիզնեսը կծաղկեցնի ու հաջողությունների կհասնեն»:

Գրականագետ, լեզվաբան, դոկտոր, պրոֆեսոր Արտեմ Հարությունյանն ասաց, որ հեռուստատեսությունն այն չեզոք գոտին է, որ չի կարելի վերցնել ու ծառայեցնել փողոցային գռեհը, քանի որ հեռուստատեսությունը պետական լեզվի ամենամեծ ծառայողն է: «Լեզուն կարիք ունի ձեր պաշտպանության: Պետք է ունենաք մի խումբ կտրիճ տղաներ, որ դատական ու իրավական ուժ ունենալով` դատապարտեն նրանց, ովքեր իրենց հաստավիզ ապրանքները գովազդում են օտար լեզուներով»,- դիմելով Ս. Երիցյանին` ասաց Ա. Հարությունյանը: Ըստ նրա, Լեզվի պետական տեսչությունը պետք է նաև հեռուստատեսային ժամ ունենա: «Մեր մայր լեզվի այս վիճակը գալիս է նաև տնտեսության խայտառակ, թշվառ վայրիվերումներից»,- ասաց գրականագետը:

Նա միաժամանակ նշեց. «Լեզվի զարգացման հիմքերից մեկը ընտանիքն է ու հենց այդ ընտանիքը նստում ու լսում է բազմաթիվ հաղորդումներ, դիտում կիսագրագետ սերիալներ: Լեզվի պետական տեսչությունը պետք է վերահսկի հեռուստատեսությունը»:
Ս. Երիցյանն էլ ասաց, որ գրագետ գրողներ, արվեստագետներ քիչ են հեռուստատեսությամբ երևում. «Նրանց քննարկումները հնարավորություն կտան ժամանակի ընթացքում մեր լեզվի մաքրմանը»: