Ձեր վստահելի աղբյուրը

Ասիական զարգացման բանկը /ԱԶԲ/ հաստատել է Հայաստանին մինչև 65 միլիոն ԱՄՆ դոլար վարկ տրամադրելու որոշումը` երկրում փոքր և միջին բիզնեսը/ձեռնարկատիրությունը ընդլայնելու նպատակով, որը շատ կարևոր է երկրի տնտեսական աճի, աշխատանքային հնարավորություններ ստեղծելու, ինչպես նաև աղքատության մակարդակի նվազեցման համար:

Վարկը կտրամադրվի հայկական չորս բանկերին հինգ տարի ժամկետով: Վարկեր կտրամադրվեն փոքր և միջին ձեռնարկություններին /ՓՄՁ/, որոնք կազմում են երկրի ձեռնարկատիրության գրեթե 98 տոկոսը և ապահովում երկրի համախառն ներքին արդյունքի /ՀՆԱ/ ու զբաղվածության 40%-ը:

Բանկի երևանյան գրասենյակի հաղորդմամբ, նախատեսված վարկերը կտրամադրվեն «ACBA կրեդիտ ագրիկոլ», «Արդշինինվեստ», «Ամերիա» և «Ինեկո» բանկերին: Նշված բոլոր բանկերն էլ ունեն դրական երաշխավորություն և պարտավորվել են ընդլայնել ՓՄՁ վարկավորումը:

«Հայաստանյան ՓՄՁ-ների խթանման, ինչպես նաև երկրի ֆինանսական հատվածի աջակցման նպատակով վարկերի տրամադրումը ԱԶԲ-ի առաջին և ամենածավալուն նախաձեռնությունն է: Այս ծրագրի շրջանակներում հաստատված չորս բանկերին կտրամադրվեն միջնաժամկետ վարկեր, որոնք կենսապես էական են ավելի մեծ թվով ՓՄՁ-ներին օգնելու առումով»,- ասել է Հայաստանում ԱԶԲ-ի ներկայացուցիչ Դեյվիդ Դոուլը: Նա նշել է նաև, որ փոքր ձեռնարկությունների աճը կստեղծի նոր աշխատատեղեր ու կխթանի տնտեսության եկամուտը, ինչպես նաև կաջակցի երկրում ապահովել տնտեսության ու ձեռնարկատիրության բազմազանությանը:

Հայաստանում բանկերը ֆինանսավորում են ՓՄՁ-ներին, սակայն դա բավարար չափով չի համապատասխանում ձեռնարկությունների պահանջներին: ՓՄՁ ֆինանսավորումը դարձավ սահմանափակ 2009 թ.-ի տնտեսական ճգնաժամի արդյունքում` դրամական առաքումներն ու փոխադրումները նվազեցին, մյուս կողմից էլ բանկերն դժկամորեն են վարկեր տրամադրում փոքր ընկերություններին: Միևնույն ժամանակ, բանկերն ունեն միջնաժամկետ վարկավորում/ֆինանսավորում ստանալու դժվարություններ` որպեսզի առաջարկեն երկարաժամկետ վարկեր ՓՄՁ-ների կարիքներն ապահովելու համար, մինչդեռ վերջիներիս անհրաժեշտ են կապիտալ ներդրումներ իրենց արտադրողականությունը խթանելու նպատակով:

Այս վարկային ծրագիրն ունի մի շարք նոր մոտեցումներ, ներառյալ այն պայմանը, որ բիզնես վարկեր պետք է տրամադրվեն նաև մայրաքաղաք Երևանից դուրս, որտեղ աղքատության սանդղակն ավելի բարձր է և ֆինանսավորման հնարավորությունն ավելի սահմանափակ: Ծրագրում ներառված բանկերը համաձայնել են փոքր և միջին ձեռնարկատեր վարկառուների գենդերային հատկանիշների մասին տվյալներ տրամադրել, որը կտա ավելի ստույգ պատկեր երկրում կին ձեռներեցների վերաբերյալ, իսկ հետագայում` գենդերային հավասարությունը բարելավելու պայմանով:

ԱԶԲ-ն բանկերին կտրամադրի նաև փորձագիտական աջակցություն ՓՄՁ-ներին ավելի ընդլայնված ծառայություններ մատուցելու կապակցությամբ: ԱԶԲ-ի այս նախաձեռնությունը կհզորացնի ծրագրում բանկերի ընդգրկված ներուժը և վերջիններս ՓՄՁ-ների հետ կաշխատեն ավելի շրջահայաց կերպով:

Արդեն տասը տարուց ավել է ինչ ՀՀ կառավարությունը փորձում է զարգացնել ՓՄՁ հատվածը, և ներկայումս մշակում է ՓՄՁ-ների աջակցման ազգային ռազմավարությունը, որը կնպաստի ՓՄՁ հատվածի զարգացմանն ու հզորացմանը: Ազգային ռազմավարությունը, ԱԶԲ-ի նախաձեռնության հետ մեկտեղ, բանկերին կտա ավելի մեծ հնարավորություններ նշված հատվածը վարկավորելու հարցում:

ԱԶԲ-ը հիմնված է Մանիլայում, որի առաքելությունն է` աղքատության կրճատումը խթանելով տնտեսական աճը, կայուն շրջակա միջավայրը և տարածաշրջանային ամբողջականությունը Ասիայում և խաղաղօվկիանոսյան տարածաշրջանում: Այն հիմնադրվել է 1966 թ.-ին և ունի 67 անդամ երկրներ, 48-ը` տարածաշրջանից: 2010 –ին ԱԶԲ-ի ֆինանսավորումը /ներառյալ` համաֆինանսավորումը/ կազմում է 17.51 միլիարդ ԱՄՆ դոլար, իսկ ԱԶԲ-ի ընթացող/ շարունակվող «Առևտրի ֆինանսավորման ծրագիր»-ը տրամադրել է 2.8 միլիարդ ԱՄՆ դոլար առևտրի խթանման նպատակով: