Ձեր վստահելի աղբյուրը

Շաբաթ ուշ երեկոյան ավարտվել է ArmNet Awards 2011 մրցույթը, որը եզրափակվել է մրցանակաբաշխության պաշտոնական արարողությամբ: ArmNet Awards ամենամյա մրցույթը, որն այս տարի անց է կացվում արդեն երկրորդ անգամ, կոչված է գնահատել տեխնոլոգիաների հանրայնացման հետ մեկտեղ` ինտերնետի հայկական սեգմենտում կատարված առաջընթացը, խրախուսել հայկական կայքերի բովանդակային զարգացումը և նպաստել նորաստեղծ կայքերի առաջխաղացմանը:

Մրցույթը կազմակերպվել է SPMS ընկերության, Orange Armenia ընկերության և Հայաստանի Ինտերնետ Հանրություն հասարակական կազմակերպության կողմից:

Կազմակերպիչների հաղորդմամբ, միջազգային ժյուրիի կողմից ընտրվել են տարվա լավագույն կայքերը 6 անվանակարգերում, ինչպես նաև երկու հատուկ մրցանակ հանձնվեց ժյուրիի կողմից կայքի հանրային կարևորության և ազդեցության համար:

«Դիզայն և հարմարավետություն» անվանակարգում լավագույնը ճանաչվել է http://armenianmonuments.org  կայքը` հետևում թողնելով http://daronmouradian.com , http://vtv.am  և http://tashirpizza.am  կայքերին: Ժյուրին առանձնապես գնահատել է կայքի ինտերֆեյսը, բովանդակության և ձևի համահունչ կապը:

«Տարվա առաջընթաց» անվանակարգին արժանացավ http://parliamentmonitoring.am կայքը: Հաղթանակին հավասարաչափ հավակնում էին նաև http://1in.am , http://civilnet.tv , http://ecolur.org  կայքերը:

«Լավագույն նորարարություն» անվանակարգում լավագույնը ճանաչվել է http://annoisy.org կայքն իր յուրահատուկ լուծումներով: Հաղթանակին հավակնում էին նաև http://publicdata.am , http://parliamentmonitoring.am  և http://givemeinfo.am  կայքերը:

«Լավագույն տեխնիկական կատարում» անվանակարգում հաղթողը դարձել է http://yerevanguide.am կայքը` հավաքելով ավելի շատ ձայներ, քան http://webtv.am , http://eventot.com  և http://yerevan.am  կայքերը:

«Լավագույն բովանդակություն» անվանակարգում մրցանակը հանձնվել է http://genocide-museum.am  կայքին: Անվանակարգում առաջադրվել էին նաև http://ecolur.org , http://chtesutyun.arnet.am  և http://hra.am  կայքերը:

Orange-ի հատուկ մրցանակը, որը նախատեսված է կայքի լավագույն մոբայլ տարբերակի համար, այս տարի նույնպես տրվել է ինֆորմացիոն կայքի: Այն Orange-ի ղեկավարությունը ժյուրիի առաջարկով հանձնել է m.lragir.am-ին: Այս անվանակարգում մասնակիցները թվով շատ չէին, սակայն արդեն մի քանի անգամ ավելին էին, քան նախորդ տարի, ինչը խոսում է այս ուղղությամբ նկատելի զարգացումների մասին:

«Համաշխարհային միտումները ցույց են տալիս, որ ավելի ու ավելի մեծ թվով օգտագործողներ են ինտերնետից օգտվում իրենց բջջային հեռախոսների միջոցով, և Հայաստանը բացառություն չէ: Այս մրցանակով ոչ միայն ցանկանում ենք պարգևատրել լավ կառուցված մոբայլ ադապտացիայի համար, այլ նաև խրախուսել մյուս կայքերին նույնպես զարգացնել իրենց կայքերն այս ուղղությամբ»,- ասել է Orange-ի գլխավոր տնօրեն Բրունո Դյութուան:

Այս տարի առաջին անգամ հանձնվել է նաև մրցանակ «Ժողովրդական ընտրություն» անվանակարգում: SMS քվեարկությունը, որի միջոցով էլ ընտրվել է «ամենաժողովրդական» կայքը, տևեց նոյեմբերի 28-ից մինչև դեկտեմբերի 3-ը: Քվեարկությանը մասնակցել են 8224 բաժանորդներ, որոնցից 1259-ի ձայներն ուղղված էին http://newsinfo.am  լրատվական կայքին:

ArmNet Awards 2011 Գլխավոր մրցանակին արժանացել է http://parliamentmonitoring.am կայքը, որը տրվում է ժյուրիի կողմից բոլոր անվանակարգրում առավելագույն թվով միավորներ հավաքած կայքին: Կայքը համաչափորեն զարգացած է բոլոր առումներով. թե տեխնիկական կատարման, թե բովանդակային, թե դիզայնի առումով և գնահատվեց ժյուրիի բոլոր անդամների կողմից:

«Ինչպես անցյալ տարի, այս տարի նույնպես ArmNet մրցանակաբաշխությունը թույլ տվեց բացահայտել բազմաթիվ հետաքրքիր կայքեր: Բոլորին խորհուրդ եմ տալիս այցելել այն կայքերը, որոնք հայտնվել էին հավակնորդների ցանկում, քանի որ մեր երկար ու դժվար աշխատանքի արդյունքում, իսկ մենք մեկ առ մեկ դիտարկել են 569 կայք, հիրավի հետաքրքիր էջեր են գտնվել, որոնք լավագույնս նկարագրում են հայկական ինտերենտի բովանդակային զարգացումը», ասել է Ժյուրիի նախագահ Սամվել Մարտիրոսյանը:

Մրցանակաբաշխության ավարտին ժյուրին հատուկ մրցանակներ է հանձնել http://granish.org   և http://publicdata.am  կայքերին, որոնցից յուրաքանչյուրն առանձնահատուկ դերակատարում ունի իր ոլորտում: