Ձեր վստահելի աղբյուրը

Վիլնյուսում ընթացող ԵԱՀԿ արտգործնախարարների խորհրդի նիստի շրջանակներում այսօր համատեղ հայտարարություն են ընդունել ԵԱՀԿ Մինսկի խմբի համանախագահ երկրների, Հայաստանի ու Ադրբեջանի պատվիրակությունների ղեկավարները: Ստորև ներկայացնում ենք համատեղ հայտարարության ամբողջական տեքստը:

«Վիլնյուսում ԵԱՀԿ ԱԳՆ խորհրդի նիստի առիթով ԵԱՀԿ Մինսկի խմբի համանախագահ երկրների պատվիրակությունների ղեկավարները (Ռուսաստանի արտգործնախարար Սերգեյ Լավրով, Միացյալ Նահանգների պետքարոտւղար Հիլարի Ռոդհեմ Քլինթոն և Ֆրանսիայի Եվրոպայի հարցերով նախարար Ժան Լեոնետին) ու Հայաստանի արտգործնախարար Էդվարդ Նալբանդյանը և Ադրբեջանի արտգործնախարար Էլմար Մամեդյարովը վերահաստատեցին Լեռնային Ղարաբաղի հակամարտության խաղաղ կարգավորմանը հասնելու կարևորությունը:

Հիշեցնելով 2008 թվականի նոյեմբերի Մոսկովյան հռչակագիրը, ինչպես նաև իրենց երկրների հայտարարությունը Խորհրդի նիստերում` արտգործնախարարների մակարդակով Հելսինկիում (2008թ.) ու Աթենքում (2009թ), ու ԵԱՀԿ Աստանայի գագաթաժողովում (2010թ.)` հինգ պատվիրակությունների ղեկավարները ԵԱՀԿ Մինսկի խմբի ձևաչափով բանակցային գործընթացը շարունակելու ու խաղաղ կարգավորման ուղղությամբ առաջընթացի ապահովման համար միջավայրի բարելավման անհրաժեշտության շուրջ համաձայնության եկան: Որպես այդ ուղղությամբ քայլերից մեկը, նրանք համաձայնեցին, որ հետագա ջանքերը պետք է ուղղվեն հրադադարի ռեժիմի խախտումների հետաքննության մեխանիզմների դետալները հստակեցնելու աշխատանքներին, ինչը 2011 թվականի մարտին Սոչիում նախագահներ Ալիևի, Սարգսյանի ու Մուդվեդևի հայտարարության արդյունքն է:

Նշելով 2011 թվականի մայիսին Դովիլում իրենց նախագահների արած հայտարարությունը, որը Հայաստանին ու Ադրբեջանին կոչ է անում ավարտին հասցնել Լեռնային Ղարաբաղի հակամարտության խաղաղ կարգավորման հիմնարար սկզբունքների համաձայնեցումը, Մինսկի խմբի համանախագահ երկրների պատվիրակությունների ղեկավարները ափսոսանք հայտնեցին, որ կողմերը չկարողացան այդ վճռական քայլը կատարել: Երեք պատվիրակությունների ղեկավարները վերահաստատեցին, որ Լեռնային Ղարաբաղի հակամարտությունը ռազմական լուծում ունենալ չի կարող, և որ Միավորված Ազգերի Կազմակերպության կանոնադրությունը, Հելսինկյան Եզրափակիչ ակտի դրույթները, ինչպես նաև 2009 թվականի հուլիսին Լ’Աքվիլայում և 2010 թվականի հունիսին Մուսկոկայում նախագահների համատեղ հայտարարության մեջ արտացոլված տարրերն բոլոր կողմերին առաջարկվող այն ուղին է, որով կարելի է հաղթահարել անընդունելի ստատուս քվոն, հասնել խաղաղ կարգավորման: 2007 թվականին Մադրիդում ԵԱՀԿ նախարարական խորհրդից հետո ընթացող, այդ թվում ամենաբարձր մակարդակով բանակցությունների լկույսի ներքո երեք պատվիրակությունների ղեկավարները կողմերին թախանձագին կոչ են անում շարունակել ուշադիր ուսումնասիրել համանախագահ երկրների ներկարայացրած առաջարկները:

Հայաստանի և Ադրբեջանի արտգործնախարարներն իրենց գոհունակությունը հայտնեցին համանախագահ երկրների ջանքերի, այդ թվում` նախագահներ Մեդվեդևի, Օբամայի ու Սարկոզիի անձնական մասնակցության համար իրենց երկրների` համապարփակ խաղաղ կարգավորման հասնելու հարցում աջակցության համար: Նրանք համանախագահ երկրների պատվիրակությունների ղեկավարներին տեղեկացրին, որ իրենց նախագահները պատրաստ են համանախագահ երկրների աջակցությամբ մոտ ապագայում հանդիպել ևս մեկ անգամ, հաշվի առնելով վերջին փորձը, շարունակելու ուղիղ երկխոսությունը` իրենց ժողովուրդների խաղաղության, կայունության ու բարգավաճման ճանապարհների մասին»: