Ձեր վստահելի աղբյուրը

Ինչո՞վ է գրավում Հայաստանի հետ համագործակցությունը. Հիմնականում այս հարցին էին պատասխանում Իտալիայի գործարարները, Հայաստանի նախագահ Սերժ Սարգսյանի հետ ունեցած հանդիպումից հետո հայաստանյան ԶԼՄ-ներին տված հարցազրույցներում:

Հիշեցնենք, որ Նախագահը աշխատանքային այցով գտնվում է Իտալիայում, որտեղ հանդիպում է ունեցել նաև Իտալիայի գործարար համայնքի ներկայացուցիչների հետ:

«Պիրալիզի» ինդուստրիալ խումբ. Վերջինը ներկայացված է մետաղական մեխանիկայի և հաստոցաշինության դաշտում, հատուկ ուշադրությունը` ագրոտրանսֆորմացիան է:

Գործնական տեսանկյունից խումբը առաջին անգամ է «մոտենում» Հայաստանին, բայց միևնույն ժամանակ տեսնում է, որ կա լուրջ ներուժ: Գործարարը որպես այդպիսին նշեց մշակույթների ու աշխարհայացքի ընդհանրությունը: «Ու թեև Հայաստանը մեծ երկիր չէ», սակայն «Պիրալիզի»-ի գնահատմամբ, այստեղ կա հնարավորությունների լայն դաշտ: Գործարարը նշեց, որ ինքը հատկապես հետաքրքրված է կաթի, պանրի, խաղողի, հետևաբար` նաև գինու, լոլիկի տրանսֆորմացիայով. Այնպես որ, արդեն պիտի ուսումնասիրեն շուկան` քանակներ, կարիքներ:

Միքելե Ամբռազոինին, «Բանկա Մարկե»-ի նախագահը, չի առնչվել Հայաստանի հետ բանկային գործի առումով, սակայն շատ մոտ է եղել իր մյուս, համալսարանական գործունեությամբ` դասախոսություններ, փաստաբանություն: Ինչ վերաբերում է հենց բանկային բնագավառին, այս պահին դեռ երկարատև ծրագրեր դժվար է կանխատեսել, իսկ իտալական փոքր ու միջին ձեռնարկությունների ներուժին և «know how»-ի (նոու-հաու) տեղափոխման հնարավորությունը Հայաստան բարձր գնահատեց: Նախագահի հետ հանդիպմանը գործարարը, որ դասախոսում է նաև Ուրբինոյի համալսարանում, առաջարկել է հայ ու իտալացի ուսանողների ու դասախոսների փոխանակման ծրագիր:

Սենատի անդամ Կազոլին, որ սենատի աջակողմյան խմբի ղեկավարն ու արդյունաբերության հանձնաժողովի անդամ է, անդրադարձավ Հայաստանի դերին. Շանհայի միջազգային էքսպոյում Հայաստանը ներկայացավ բարձր որակով և ներկայացրեց իր ուրույն դերը միջազգային հարթակում` մյուս գործուն երկրների շարքում: Հայաստանը, ճիշտ է, ներկայացած է Իտալիայի քաղաքական ու մշակութային կենտրոններում, սակայն պետք է հաջորդ քայլը. ներկայացվածություն Իտալիայի ծայրամասային` արդյունաբերական կենտրոններում ևս:

«Հայաստանը միայն Ազնավուր չէ»,- եզրափակեց խոսքը Կազոլին:

«Չեկոնի էսեպիա»-ն իտալական լոգիստիկայի, տրանսպորտի ընկերություն է: Նախագահ Ջինո Չեկոնիի խոսքով, բավական նոր են հայկական շուկայում` երեք տարի: Նա հույս հայտնեց, որ շարունակաբար պիտի բազմապատկեն իրենց ներկայությունը:

Հաջորդ գործարարը, Անտոնելա Գամբան, ներկայացնում էր տեքստիլ արտադրությունը, արդեն երեք տարի է, ինչ աշխատում է Հայաստանում, սպորտային հագուստի արտադրության բնագավառում: Երեք տարվա ընթացքում կարողացել են ստեղծել 1000 աշխատատեղ. Գործունեության հայկական դրական գործոնը Գամբան համարեց մարդկային գործոնը:

Հայաստանում իր գործունեությամբ հայտնի իտալական «Ռենկո» հոլդինգի գլխավոր տնօրեն Ջովաննի Ռուբինին առանձնացրեց Ալավերդիում հիդրոէլեկտրակայանի գործունեությունը, ինչպես նաև Երևանում հեծանվահրապարակի շահագործումը: Նա տեղեկացրեց, որ այս պահին աշխատում են երկու շինարարական «շատ մեծ» պատվերների վրա: «Դրանք Կենտրոնական բանկի Դիլիջանի մասնաճյուղն ու բանկի աշխատողների համար կացարանների կառուցումն է», -թվարկեց Ռուբինին:

Հայաստանում տնտեսական գործունեություն ծավալելու խթանը, ըստ իտալացի գործարարի, հմուտ հայ գործընկերներն են եղել: «Ձեր երկրում կրթության աստիճանը, որակը և մակարդակը բարձր է: Պատկերացրեք` այս վայրկյանին մեր իտալական ծրագրերի վրա աշխատում են 15 հայ մասնագետներ: Հայաստանում հենց մարդկային, մասնագիտական ռեսուրսի առավելությունն է, որ մեզ դրդում է աշխատել», հավելեց իտալացի գործարարը:

Նշենք, որ Իտալիայի և Հայաստանի նախագահների` դեկտեմբերի 13-ին տեղի ունեցած հանդիպմանը երկու երկրների ղեկավարները տնտեսական հարաբերությունների զարգացման տեսանկյունից կարևորել են գործարարների հաճախակի շփումներն ու գործարար համաժողովների անցկացումը, որի շուրջ Հայաստանի և Իտալիայի արտգործնախարարներն այսօր առավոտյան ունեցած հանդիպման ժամանակ արդեն պայմանավորվածություն են ձեռք բերել: Նախագահ Նապոլիտանոն հույս է հայտնել, որ Նախագահ Սերժ Սարգսյանի հանդիպումը Իտալիայի գործարար աշխարհի ներկայացուցիչների հետ լրացուցիչ խթան կհանդիսանա Հայաստանի տնտեսության մեջ իտալական ներդրումների ներգրավման, երկու երկրների միջև տնտեսական փոխգործակցության զարգացման համար: