Ձեր վստահելի աղբյուրը

ՄԱԿ-ի մանկական հիմնադրամի հայաստանյան գրասենյակի նորանշանակ ներկայացուցիչ Մանյա Հենրիյեթ Արենսը Panorama.am-ի հետ զրույցում դժվարացավ խոսել հայաստանյան մանկատներում ու խնամքի այլ հաստատություններում առկա կոռումպացվածության մասին` դեռ կարճ ժամանակ է անցել, ինչ Հայաստանում է և իրավիճակը շատ խորը չի հասցրել ուսումնասիրել:
 
Սակայն նա գտնում է, որ մանկատների բեռնաթափումը դանդաղ է ընթանում, քանի որ մանկատներն ու նմանատիպ հաստատությունները շատերի համար հանդիսանում են աշխատավայր, և ամենամեծ խոչընդոտը հենց դա է` մարդիկ վախենում են կորցնել իրենց աշխատանքը:

Այդուհանդերձ մանկատունը ինքն իրենով չի կարող լավը լինել ու լավագույնն առաջարկել երեխայի զարգացման համար.

«Այդ իսկ պատճառով ՄԱԿ-ի մանկական հիմնադրամը սերտ համագործակցելով Հայաստանի կառավարության հետ, ներկայացնում է և շարունակելու է ներկայացնել մի շարք այլընտրանքային մոդելներ, որոնք ունակ են ապահովել երեխայի իրավունքների պաշտպանությունը»,- մեզ հետ զրույցում նշեց նա:

Ըստ Հ.Արենսի` Հայաստանի  համար լուրջ խնդիր է հանդիսանում խորհրդային միության ժառանգությունը ու ըստ այդմ մեր օրեր հասած տվյալ խնդրի նկատմամբ մոտեցումը:

Այլընտրանքային ծրագրերի կոնտեքստում ՄԱԿ-ի մանկական հիմնադրամը շարունակում է կարևորել խնամատար ընտանիք ծրագրի շարունակականությունը, թեև տիկին Արենսը տեղյակ է, որ հաջորդ տարի դրանց թվի ավելացում չի նախատեսվում:

Աշխատանքի և սոցիալական հարցերի նախարարությունում այս կապակցությամբ տեղի ունեցած հանդիպմանը պաշտոնյային տեղեկացրել են, որ հիմանակն պատճառն այն է, որ նախարարությունը շուրջ 4 հազար դիմումներ է ստացել այն ընտանիքներից, որոնք խնամում եմ իրենց ազգականների երեխաներին և դրա համար չեն վարձատրվում` օրենքով նախատեսված չէ.

«Այսօրվա դրությամբ գերատեսչությունում փորձում են ելք գտնել այս իրավիճակից և հույս ունենամ, որ թե ծրագրի շարունակությունը, թե այդ ընտանիքների խնդիրները կլուծվեն»,- նշեց տիկին Արենսը:

Ապագա ծրագրերին անդրադառնալով, UNICEF-ի հայաստանյան գրասենյակի ներկայացուցիչը նշեց, որ շարունակելու է կառավարության հետ համագործակցել մանկատների բեռնաթափման ծրագրի շրջանակներում, ինչպես նաև աջակցել մի շարք այլ ծրագրերում, որոնք առնչվում են երեխաների իրավունքների պաշտպանության ոլորտին: Օրինակ` նորածինների առողջության պահպանմանն ուղղված և այլն: