Ձեր վստահելի աղբյուրը

«Կրթության ոլորտում հարկավոր է հատուկ ռազմավարություն: Եթե հենց հիմա սա չանենք, վաղը խոսել Հայաստանի, դեմոկրատական երկրի, աշխարհի մարտահրավերներին համահունչ քայլելու մասին, ծիծաղելի է: Այսպես շարունակվելու դեպքում, վերածվելու ենք աբորիգենների ցեղի»,- ասուլիսում նման տեսակետ հայտնեց Երևանի կինոյի և թատրոնի ինստիտուտի ռեկտոր Արմեն Մազմանյանը:

Ըստ նրա, հայ ազգը ինտելեկտուալ ազգ է, ու կարող է իր ինտելեկտի շնորհիվ արտադրանք ստեղծել ու վաճառել աշխարհին, քանի որ «աշխարհում ամենաթանկը ինտելեկտն է գնահատվում»:

«Ամենակարևորը քաղաքացի կրթելն է, ինչը մեզ մոտ բացակայում է: Բայց մեղավորը կրթողներս ենք: Հեշտ է ասել պոռնո, ցինիկ սերունդ է մեծանում, դա ընդամենը արդարացումներ են, բեռը վրաներիս գցում ենք դրանով»,- ասաց արվեստագետը:

Նրա խոսքով, այսօր պետք է գիտակցաբար ավելի քիչ փող հատկացնել այլ ոլորտների, ու ուղղել դեպի կրթության ոլորտ: «Խոսում ենք համաշխարհային արժեքից, բայց այդ արժեքներից ամենամակերեսային բանն ենք վերցնում»,- ասաց Արմեն Մազմանյանը: