Ձեր վստահելի աղբյուրը

Հաջորդ տարվա հունվարի կեսերին արդեն պատրաստ կլինեն «Հայոց լեզու և գրականություն» առարկայի թեստերի 3-րդ և 4-րդ հատորները: Այսօր ներկայացնելով «Մաթեմատիկա» և «Հայոց լեզու ու գրականություն» առարկանների թեստերի 2-րդ մասերը, այս մասին հայտարարեց ԳԹԿ տնօրեն Գուրգեն Խաչատրյանը: Մաթեմատիկայի նոր թեստեր չեն լինի, այս առարկայի թեստերն ընդգրկում են 5 հազար առաջադրանք, Հայոց լեզուն կհասնի 6 հազարի, իսկ ընդհանրապես ԳԹԿ-ն նպատակ ունի հասնել ու հատել 10 հազարի շեմը:

Այս տարի առաջին անգամ թեստերը հրատարակվում են Երևանում, անցած տարիներին դրանք լույս էին տեսնում Լոնդոնում: ԳԹԿ տպարանի գործունեությունը գոհացրել է Գ. Խաչատրյանին` փակ համակարգ, ոչ մի արտահոսք և բավականին նորմալ տպագրություն:

Հաջորդ տարվա սեպտեմբերին լույս կտեսնեն ֆիզիկայի, քիմիայի թեստերը, ձևավորված են մասնագիտական խմբերը, աշխատանքները` սկսված: Թեստերի տպագրման հարցում Խաչատրյանը մատնանշեց ֆինանսավորման խնդիրը: Ֆինանսական միջոցները սուղ են, տպագրման ենթակա նյութը բավականին շատ: «Եթե ունենայինք փող, խնդիր չէ, կտպագրեինք բոլորը»,-ասաց ԳԹԿ տնօրենն ու հավելեց, որ նախ լայն սպառում ունեցող թեստերն են հրատարակվում:
«Պատկերացրեք աշխարհագրության թեստեր ենք տպագրում, որը հանձնում է մի 500 երեխա: Բնական է, որ վաճառքից եկամուտ ստանալու ակնկալիք չկա, փող էլ չկա, որ դրա համար օգտագործես և այլն»,-բացատրեց նա:

Ամփոփելով անցնող տարին ու դրա ընթացքում արածն ու չարածը, Գ. Խաչատրյանը գոհ է, սակայն խնդիրներ կան կենտրոնի «թղթարարության» հետ կապված: «Դրա համար երբեմն նկատողություններ ենք ստանում»,-ժպիտով նկատեց բանախոսը:
Հաջորդ տարվա անելիքներն էլ են պարզ` առջևում կրկին ավարտական, միասնական քննություններն են, արտաքին գնահատում, միջազգային կազմակերպությունների հետ համագործակցություն, նոր թեստերի ստեղծում: Նախնական հաշվարկներով, հաջորդ տարի միասնական քննություն կհանձնի 17 հազար դիմորդ, այնքան, որքան եղել է 2010-ին:
Հիշեցնենք, որ 2011-ին շրջանավարտներ չկային, սակայն կազմակերպվեցին միասնական քննություններ:

Նախորդող հրապարակումներ`

Պատրաստ են թեստերի 2-րդ մասերը

«Մաթեմատիկա», «Հայոց լեզու» և «Հայ գրականություն» առարկաների թեստերի 1-ին մասերը վաճառքում են