Ձեր վստահելի աղբյուրը

 -Պարոն քաղաքապետ, Դուք վերջերս Հայաստանի նախագահի պատվիրակության կազմում մեկնել էինք Հռոմ (Հայ գրատպության 500 ամյակի միջոցառումների մեկնարկին), ինչպիսին են Ձեր տպավորությունները Հռոմ քաղաքից։
Քաղաքապետ.-

- Երբ քայլում էի Հռոմում, կատակեցի, թե` ինչքան քանդելու ու ներկելու բան կա այստեղ։ Սկզբունքորեն` վայ այս կատակին, որովհետև այդ քաղաքը ներդաշնակ է իր բոլոր ձևերով` տներ, քանդակներ, պահպանվող ավերակներ, անվտանգ ճաքճքած շենքեր, կարմիր ուղեգորգեր փողոցներում ու սալահատակներ,... Մյուս կողմից` հասկանում եք «կատակիս» աղբյուրը...

Ձեր բնութագրմամբ` ինչպիսին է Երևանը. ունի՞ այն դեմք այժմ, թե՞ վերջնականապես կորցրել է։
Քաղաքապետ.-

- Վերջերս` նոյեմբերի 21-22-ին, Ղազախստանի մայրաքաղաքում եվրոպական և ասիական լրատվամիջոցների միջազգային ֆորումն էր «Անկախության 20 տարին. ԶԼՄ-ները և հասարակությունը» կարգախոսով։ Չծրագրավորված հանդիպում կազմակերպվեց Ղազախստանի վարչապետ Կարիմ Մասիմովի հետ։

Չմանրամասնեմ այլ հարցեր ու քննարկումներ... Panorama.am –ը որոշեց դուրս գալ «Երկու հանրապետութուն- երկու վարչապետներ» հարցուպատասխանի կերպար ստացած ձևաչափից ու որոշեց հարցնել այն մասին, ինչը ամենաշատն էր քննարկվում պատվիրակության կողմից Աստանայով շրջելիս.
«Պարոն վարչապետ, ես Երևանից եմ. Մեր մոտ ուր նայես` կառուցում են ու կառուցում։ Հիմա նայում եմ` Աստանայում այնքան տեղ կա, որ` կառուցիր, հա կառուցիր… սակայն շինարարություն համարյա չի ընթանում։ Ընդունեք իմ ոչ քաղաքական հարցը` ինչպիսի՞ն է ձեր քաղաքաշինական քաղաքականությունը»։

Պարոն Կարիմ Մասիմովը փոքր ինչ զարմացավ, փոխեց ոճը. (ինչո՞ւ եմ մանրամասն պատմում. նախ, որովհետև հարթակը Panorama.am-ինն է` տեղ ունեմ ընդարձակվելու, հետո` դուք մերժել եք հարցազրույցը ու ես ստիպված նոր ձևաչափ եմ հնարում` զրուցում եմ, ակնկալելով նույնպիսի` ոչ սեղմ ու անկեղծ պատաասխաններ)։

Վարչապետը պատմեց, որ քաղաքաշինության խնդիրներին Ղազախստանը ընդհարվել է Ալմա-Աթայի հետ կապված։ Ու ընդհանրապես` հետաքրքիր բանաձև ներկայացրեց. այն է` եթե քաղաքը արդեն ունի տրանսպորտային խնդիրներ, ուրեմն մեծացել է պետք եղածից ավելի: Պիտի կանգնեցնել այդ պրոցեսը ու գնալ, այլ քաղաք կառուցել։ Ու ընդհանրապես` Ղազախստանի ամեն շրջան պիտի ունենա իր Աստանան։
Սա` հակիրճ, թե ինչ ասաց վարչապետը։

Ինձ ընդունելի է նման պատասխանը ու այն ծառայում է իմ այժմյան նպատակին։

Նշեմ, որ Panorama.am-ը հարցում էր տեղադրել (Ի՞նչ խնդիրներ կան մայրաքաղաք Երևանում, որոնք հրատապ լուծման անհրաժեշտություն ունեն), որի արդյունքն է`
Հասարակական տրանսպորտի երթևեկության` կարգ ու կանոնի հաստատումը - 43%
Ճանապարհների և մայթերի բարեկարգումը - 8%
Որոշ թաղամասերում կամ փողոցներում կոմունալ ծառայությունների իսպառ բացակայությունը -8%
Գետնանցումների լուսավորությունը - 3%
Փողոցային առևտրով զբաղվողների աշխատանքի ապահովումը -4%
Անօթևան անձանց համար ընդհանուր կացարաններ ստեղծելու խնդիրը -12%
Շենքերի սեյսմիկ ապահովության գնահատում, բարձրահարկ շենքերի կառուցման նպատակահարմարություն/ոչ նպատակահարմարությունը -16%
Փոքր Կենտրոնի գերծանրաբեռնվածությունը -8%

Այսպիսով,  եթե մենք ապրեինք Ղազախստանում, Երևանը միանշանակ ու վաղուց փակվելու էր`  չափից դուրս մեծ լինելու պատճառով։

Ես, իհարկե, հարցս առանց Ղազախստանի վարչապետի օգնության էլ կձևակերպեի, սակայն մյուս կողմից այն կարող է Ձեզ պետք գալ ինձ պատասխանելու համար։ Ակնհայտ է, որ Երևանը անթույլատրելի չափերի է հասել` այստեղ է ապրում ու աշխատում մեր  երկրի բնակչության գրեթե կեսը։ Այն, որ Երևանը մնում է «աճող», արգելակում է մյուս քաղաքների զարգացումը ու վտանգավոր չափերի է հասցնում մայրաքաղաքը` իր կեղծ ուրբանիզացիայով։

Պարոն քաղաքապետ, ընդունեք ՈՉ ՔԱՂԱՔԱԿԱՆ հարցս` ինչպիսի՞ն եք տեսնում Երևանի քաղաքաշինական քաղաքականությունը։
Քաղաքապետ.-

-Ասացեք խնդրեմ, Ձեր պատասխանը թելադրված է հաշվի առնելով ո՞ր գործակիցները` առկա խնդիրներ և դրանք լուծելու անհրաժեշտություն, առկա խնդիրներ ու լուծումներ, որոնք ուզում է լսել ու տեսնել հասարակությունը, կադրերի ու նրանց փոխել-չփոխելու գործոնը…
Քաղաքապետ.-

-Պարոն քաղաքապետ, կարո՞ղ եք Դուք դուրս գալ ձեր նախորդների աշխատաոճի իներցիայից ու քաղաքի զարգացման ու կյանքի ինքնուրույն քաղաքականություն առաջադրել։
Քաղաքապետ.-

- Ես այս հարցազրույցը մտածել եմ, երբ ինքնաթիռն իջնում էր վայրէջքի Հռոմի օդանավակայան, ապա` Հռոմի քաղաքապետարանի շենքի մոտ կանգնած, երբ նայում էի Կոլիզեյին։ Մտածում էի` քաղաքապետը, որ աշխատում է այսպիսի միջավայրում ու այսպիսի շենքում (դեռ պատերը ներսից չէի էլ տեսել), չի կարող չմտածել իր քաղաքի դիմագծի մասին։
Պարոն քաղաքապետ, ... Ձեզ դու՞ր է գալիս Երևանի քաղաքապետարանի շենքը…

Հարցերը՝  Անահիտ Ոսկանյանի