Ձեր վստահելի աղբյուրը

Հանրապետության Նախագահի մոտ տեղի ունեցած խորհրդակցության ժամանակ Նախագահը հանձնարարական է տվել` ուսումնասիրել համաներման կիրառման արդյունքում ծագած խնդիրները: Արդարադատության նախարարության լրատվական ծառայությունից տեղեկացնում են, որ հանրապետության Նախագահի աշխատակազմի, ՀՀ գլխավոր դատախազության, ինչպես նաև ՀՀ արդարադատության նախարարության կատարած ուսումնասիրությունների արդյունքում պարզվել է, որ 15 դատապարտյալի նկատմամբ համաներման ակտը չկիրառելը իրավաչափ չի եղել:

15 դատապարտյալ դեկտեմբերի 27-ին համաներման ակտի կիրառման հարցը վերանայելու վերաբերյալ դիմումներ են ներկայացրել ՀՀ արդարադատության նախարարին: Վերջինիս հանձնարարականով այդ գործերը վերանայվել են, արդյունքում՝ Ռաֆայել Ջնդոյի Վարդանյանը, Ալիկ Դերենիկի Մկրտչյանը, Վիտալի Վլադիմիրի Առաքելյանը, Խաչատուր Գագիկի Դավոյանը, Էդվարդ Հովհաննեսի Շահնազարյանը, Մհեր Վաչագանի Վարդանյանը ս/թ դեկտեմբերի 28-ին արդեն պատժի կրումից ազատվել են:

Համաներման ակտը կիրառվել և նշանակված պատիժը համապատասխան չափով կրճատվել է 7 դատապարտյալի նկատմամբ` Արթուր Ռոբերտի Ավալյան, Արթուր Յուրի Մեժլումյան, Եղիա Հակոբի Հովհաննսիյան, Էդգար Անդրանիկի Կարապետյան, Ռուզվելտ Յուրիկի Մարտիրոսյան, Վոլոդյա Արթուրի Մարիկյան, Էդգար Նշանի Մուրադյան:

Եվս 2 դատապարտյալի` Վարդան Սերյոժայի Գևորգյանի և Արթուր Սերգեյի Ջավադյանի նկատմամբ համաներման ակտը կիրառելու համար կատարվել են հարցումներ` վերջիններիս կողմից հանցագործությամբ պատճառված գույքային վնաս չունենալու հանգամանքը ճշտելու կապակցությամբ, իսկ դրական արդյունքների դեպքում նրանց նկատմամբ նշանակված պատիժը համապատասխան չափով կկրճատվի:

Այսօր ավելի վաղ Վճռաբեկ դատարանի լրատվական ծառայությունը տեղեկացրել էր, որ արդարադատության խորհրդի կարգապահական հանձնաժողովը նախօրեին 7 կարգապահական վարույթ է հարուցել, իսկ երկու դատավորների վերաբերյալ նյութերն ուղարկվել են ՀՀ դատարանների նախագահների խորհրդի էթիկայի հանձնաժողովի քննարկմանը:

Նախորդող հրապարակում. Ինչո՞ւ է Վճռաբեկ դատարանը գաղտնի պահում պատժվող դատավորների անունները