Ձեր վստահելի աղբյուրը

Երևանի Շտապօգնության ծառայությունը Ամանորին աշխատել է լարված գրաֆիկով: Ինչպես այսօր լրագրողների հետ հանդիպման ժամանակ նշեց «Շտապ բուժօգնություն» ՓԲԸ տնօրեն Թագուհի Ստեփանյանը, այս տարվա հունվարի 1-8-ն ընկած ժամանակահատվածում ընդհանուր կանչերի քանակը կազմել է 5708, ինչը նախորդ տարվա նույն ժամանակահատվածի համեմատ 1103 կանչով ավելի է: Նշվեց նաև, որ հունվարի 1-8-ը հիվանդանոց է տեղափոխվել 895 հիվանդ:

«Եթե անցած տարի 616 կանչը համարվում էր բավականին շատ, ապա այս տարի կանչերի քանակը օրական հասել է 750-ի, ինչը դժվարացրել է շտապօգնության աշխատանքը»,- ասաց Թ.Ստեփանյանը:

Ըստ նրա՝ կանչերը հիմնականում կապված են եղել սրտային հիվանդությունների հետ. այս տարվա առաջին ութ օրերին նման հիվանդությունների համար գրանցվել է 1462 կանչ, որից 269-ը հոսպիտալացվել է: Մանկական կանչերի թիվը եղել է 513, որի արդյունքում 118 երեխա հոսպիտալացվել է:

Ինչ վերաբերում է տոնական օրերին գրանցված ալկոհոլային թունավորումներին, ապա այս տարի դրանց թիվը կազմել է 25, իսկ սննդային թունավորումներինը՝ 3, իսկ 50 դեպքը, ըստ Թ.Ստեփանյանի, ավելի շատ կարելի է վերագրել աղեստամոքսային խրոնիկ հիվանդությունների սրացմանը, այլ ոչ թե սննդային հիվանդություններին:

Նշվեց նաև, որ հունվարի 1-8-ն ընկած ժամանակահատվածում շտապօգնության բրիգադայի ներկայությամբ գրանցվել է մահացության 9 դեպք, իսկ մինչ շտապօգնության բրիգադայի հասնելը՝ 52 դեպք:

Թ.Ստեփանյանի խոսքերով՝ այսօր մեծ խնդիր են առաջացնում կրկնակի կանչերը: «Բրիգադան հիվանդին զննելուց հետո փորձում է նրան հոսպիտալացնել, սակայն հիվանդը հրաժարվում է հիվանդանոց տեղափոխվելուց, բայց որոշ ժամանակ անց նորից է շտապ օգնություն կանչում: Արդյունքում, միայն երկրորդ կամ երրորդ կանչից հետո է տեղափոխվում հիվանդանոց, իսկ դա արդեն լուրջ խնդիրներ է առաջացնում»,- ասաց «Շտապ բուժօգնություն» ՓԲԸ տնօրենը և հավելեց, որ հունվարի 1-8-ը գրանցվել է 212 կրկնակի կանչ: Եթե անցած տարի այդ նույն ժամանակահատվածում օրական գրանցվել է 15-16 կանչ, ապա այս տարի՝ 30-36 կանչ:

Ըստ Թ.Ստեփանյանի՝ շտապօգնությունը պետք է հիվանդին հասնի 7-12 րոպեի ընթացքում, սակայն պատահում են նաև ուշացումներ, որը կարող է մի շարք պատճառներով պայմանավորված լինել, օրինակ` պիկ ժամերին, որը հատկապես երեկոյան ժամերն են, երբ կանչերը շատ են: «Օրական 700 կանչի դեպքում ֆիզիկապես հնարավոր չէ 7-12 րոպեում հիվանդին հասնել»,-ասաց նա: Նա նաև ընդգծեց, որ լինում են հիվանդներ, որ հոսպիտալիզացիայից հրաժարվում են և ցանկանում են, որ բժիշկը երկար ժամանակ մնա իրենց տանը, սակայն բժիշկը հիվանդի տանը պետք է մնա 20 րոպե:

Թ.Ստեփանյանի խոսքերով՝ շտապօգնությունն անհետաձգելի օգնություն է, և անհրաժեշտության դեպքում շտապօգնություն իհարկե է պետք է դիմել, սակայն հաճախ դիմում են ուղղակի գլխացավի, ատամի ցավի համար, 37.2 տաքության ժամանակ: Ուստի, այդ կանչերի ժամանակ շտապողականություն չեն ցուցաբերում, այլ արձագանքում են այն կանչերին, որոնք ավելի կարևոր են:

Թ.Ստեփանյանը տեղեկացրեց նաև, որ 2011թ.-ին կանչերի քանակը բավականին շատացել են. 2010 թվականի համեմատ 14656 կանչով ավելի է եղել: Նշվեց նաև, որ շտապօգնությունը օրական սպասարկել է 500- 520 հիվանդի: