Ձեր վստահելի աղբյուրը

Ադրբեջանական լրատվամիջոցներում այդ երկրի պաշտոնյաների կողմից տարածված հայտարարությունները,  իբրև թե Մարդու իրավունքների Եվրոպական դատարանը (ՄԻԵԴ) Հայաստանի դեմ փախստականների հայցի վերաբերյալ որոշման մեջ ընդգծել է, որ «Լեռնային Ղարաբաղը Ադրբեջանի հիմնական մասն է կազմում» և որ Հայաստանի զինված ուժերը «օկուպացրել են Ադրբեջանի տարածքի մեծ մասը», իրականությանը չեն համապատասխանում: Մեկնաբանելով դեկտեմբերի 14-ին «Ադրբեջանցի Չիրագովն ընդդեմ Հայաստանի» և «Սարգսյանն ու մյուսները ընդդեմ Ադրբեջանի» հայցերը քննության առարկա դարձնելու մասին ՄԻԵԴ-ի որոշումը, Panorama.am-ի թղթակցի հետ զրույցում այդ մասին հայտարարեց ՄԻԵԴ-ում Հայաստանի կառավարության ներկայացուցիչ Գևորգ Կոստանյանը:

«Դատարանն այդպես չէր կարող որոշել, որովհետև Հայաստանն իր փաստարկներով պնդում է, որ Լեռնային Ղարաբաղի Հանրապետության և տարածքի նկատմամբ Հայաստանը չունի իրավազորություն», հավելեց Կոստանյանը` ընդգծելով, որ հենց դա էլ արձանագրել է ՄԻԵԴ-ն իր որոշման մեջ: Ըստ Կոստանյանի, այս գործով վճիռը «միակ և առաջին» փաստաթուղթը կլինի, որը կփաստի` ունի՞ Հայաստանը իրավազորություն Լեռնային Ղարաբաղի նկատմամբ, թե՞ ոչ:

Նա ասաց, որ հայկական կողմը Մարդու իրավունքների եվրոպական դատարանին ներկայացրել է առարկություններ այն մասին, որ Հայաստանը չունի և չի կարող ունենալ իրավազորություն Լեռնային Ղարաբաղի տարածքի նկատմամբ: Մանրամասն ներկայացնելով ՄԻԵԴ որոշումը, ՀՀ կառավարության ներկայացուցիչը մատնանշեց 84-րդ կետը, որի համաձայն, դատարանը ոչ թե հերքում է այդ առարկությունները, այլ պատրաստվում քննել գործի քննության հաջորդ փուլում:

«Սա լուրջ իրավական գործընթաց է, և մեր փաստարկները առ այն, որ Հայաստանը չունի իրավազորություն Լեռնային Ղարաբաղի նկատմամբ, բավական ուժեղ են ու հիմնավորված, և դա է պատճառը, որ այս որոշմամբ, Դատարանը դժվարացել է որևէ վերջնական որոշում կայացնել: Ավելին, դատարանը չի հերքել և բավարար հիմքեր չի ունեցել հերքելու կառավարության առարկությունները, որոնք հիմնավորում են, որ Հայաստանի կառավարությունը չունի բավարար իրավազորություն Լեռնային Ղարաբաղի նկատմամբ», -հավելեց Գևորգ Կոստանյանը:

Նա ասաց, որ իր համար մտահոգիչ է, երբ ադրբեջանցի պաշտոնյաները, ըստ էության, սուտ տեղեկություններ են տարածում: «Նման տեղեկությունները անհեթեթ են և զուտ պրոֆեսիոնալիզմի տեսանկյունից` ոչ կոռեկտ», -նկատեց Կոստանյանը:

Նրա խոսքով, մինչև գործի քննության երկրորդ փուլը կան շատ հնարավորություններ, այդ թվում` փաստահավաք առաքելություն իրականացնելը, գրավոր ընթացակարգով քննությունը կամ բանավոր լսումներ, որտեղ կընդգրկվեն վկաներ: Այս ամենի արդյունքում, ըստ Կոստանյանի, արդեն կհրապարակվի ՄԻԵԴ վճիռը:

ՄԻԵԴ-ում Հայաստանի կառավարության ներկայացուցչի կարծիքով, արդեն իսկ ՄԻԵԴ որոշման մեջ «նշմարվում» են քաղաքական տարրեր: «Եվրոպական դատարանը քաղաքական իրավիճակը նկատի ունենալով փորձել է ինչ-որ կերպ բալանսավորել հարաբերությունները, որովհետև իմ խորին համոզմամբ այս երկու հայցերը միանման չեն` թե իրենց կառուցվածքով և թե իրենց նշանակությամբ», -իր կարծիքը հայտնեց Կոստանյանը:

 Նախորդիվ` Չիրագովը չի ներկայացել Մարդու իրավունքների Եվրոպական դատարան

ՄԻԵԴ դատավոր. Դիմե՞լ եք արդյոք ԼՂՀ իշխանություններին

Գ. Կոստանյան. Ադրբեջանցիները չհերքեցին Հայաստանի փաստարկները