Ձեր վստահելի աղբյուրը

2011թ. դեկտեմբերին 2010թ. դեկտեմբերի համեմատ, ՀՀ սպառողական շուկայում արձանագրվել է 4,7% գնաճ, այդ թվում, պարենային ապրանքների գներն աճել են 6,1%-ով, ոչ պարենային ապրանքներինը` 4,3%-ով, ծառայությունների սակագները` 2,9%-ով: Ինչպես այսօր լրագրողների հետ հանդիպման ժամանակ ասաց ՀՀ ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը, նախորդ տարի ամենաբարձր գնաճն արձանագրվել է շաքարի ապրանքախմբում` 35.4%:

2011թ-ին հանրապետությունում գրանցվել է սուրճի, թեյի, կակաոի 18,9%, մսամթերքի ապրանքախմբում 12,7%, հրուշակեղենի 12,9%, կաթնամթերքի 6, 8%, ձկնամթերքի 1,6%, հացամթերքի 2,3%, ոչ ոգելից խմիչքի 1,7%, ոգելից խմիչքի և ծխախոտի 2% գնաճ:

Ըստ Գ.Մարտիրոսյանի՝ նախորդ տարի 3 ապրանքախմբում գրանցվել է գների նվազում, մասնավորապես, ձվի միջին գինը նվազել է 0,3%-ով, մրգինը` 12,3 %ով, բանջարեղենինը` 1%ով:

Նշվեց նաև, որ 2011թ. դեկտեմբերին նոյեմբերի համեմատ ՀՀ սպառողական շուկայում արձանագրվել է 2.5% գնաճ, այդ թվում, պարենային ապրանքների (ներառյալ ոգելից խմիչք և ծխախոտ) գներն աճել են 4.8%-ով, ոչ պարենային ապրանքներինը` 0.5%-ով, ծառայությունների սակագները` 0.1%-ով:

Միջին տարեկան ցուցանիշը, այսինքն` 2011 թ. հունվար-դեկտեմբերին, Հայաստանում գնաճը կազմել է 7.7%, պարենային ապրանքների գներն աճել են 12.3%-ով, ոչ պարենային ապրանքներինը՝ 3.4%-ով, ծառայությունները` 3.6%-ով:

2011թ-ին 470 անուն ապրանքներից 339-ում արձանագրվել է գնաճ, 113 ապրանքներում և ծառայություններում արձանագրվել է գնանկում, իսկ 18-ում գները մնացել են անփոփոխ: Իսկ դեկտեմբերին նոյեմբերի համեմատ 470 անուն ապրանքներից 259-ում է արձանագրվել գնաճ, 108-ի գները նվազել են, իսկ 103-ի գները մնացել են անփոփոխ:

Նշվեց նաև, որ նոյեմբերին հանրապետական միջին ամսական անվանական աշխատավարձը կազմել է 114766 դրամ կամ աճել է 6,3%ով:

Ըստ Գ. Մարտիրոսյանի՝ վերջին 10 տարիների ընթացքում Հայաստանում գնաճը կազմել է 5,2%-ից մինչև 8,6%, իսկ 2002 և 2004 թթ.-ին՝ 2%, 2010թ-ին՝ 9,4%: Միայն 2005 թ.-ին է եղել 0.2% գնանկում:

ԱՊՀ երկրներում 2011 թ. 11 ամսում ամենացածր գնաճը արձանագրվել է Վրաստանում` 1.4%, ամենաբարձր գնաճը գրանցվել է Բելառուսում` 204%, Տաջիկստանում՝ 9,1%, Ղազախստանում՝ 7%, Ռուսաստանում՝ 5.6%, իսկ ԵՄ երկրների միջին ցուցանիշը նշված ժամանակահատվածում կազմել է 2,7%: ԱՎԾ ներկայացուցչի խոսքերով՝ Հայաստանը իր գնաճային ցուցանիշով մոտ եղել ԵՄ-ին: