Ձեր վստահելի աղբյուրը

Դպրոցներում դրամահավաքության  մասին լուրերը ԶԼՄ-ներում պարբերաբար հայտնվում են, իսկ ձմռան ամիսներին կրկնապատկվում` ջեռուցում ամեն տեղ չէ, որ կա, այսինքն` լավ առիթ է գումար հավաքելու համար: Սակայն պարզվեց, որ թիրախում կարող է հայտնվել նաև այն դպրոցը, որը ջեռուցման խնդիր չունի, այլ, ասենք, ջեռուցման ծախսը հոգալու խնդրով է հետաքրքրված:

Շիրակի մարզի Նոր Կյանք գյուղի միակ դպրոցը հենց այդպիսին է` վերանորոգված ու ջեռուցումով ապահոված, սակայն այսօրվա լրահոսում տեղ գտավ մի հաղորդագրություն, որը տարածել է անհայտ մի շարժում ու որում, մասնավորապես, նշված է.
«…Շիրակի մարզի Նոր Կյանք գյուղի հանրակրթական դպրոցում, դեկտեմբեր ամսում դպրոցի ջեռուցման համար օգտագործվել է շուրջ 1.000.000 դրամի գազ, սակայն մեր ունեցած հավաստի աղբյուրներից տեղեկացանք, որ այդ գումարի մի մասը հրահանգվել է հավաքել աշակերտներից»:

Նշված գումարն զարմանալի մեծ է, եթե հաշվի առնենք, որ հիշատակված դպրոցը ընդամենը փոքրիկ գյուղական դպրոց է, որոմ սովորում է 315 աշակերտ:

Մեր հարցմանն ի պատասխան Նոր Կյանքի դպրոցի տնօրեն Գայանե Աշոտյանը նույնիսկ ծիծաղեց. «Ի՞նչ-ի՞նչ, ո՞վ է այդպիսի բան տարածել, տեսնես ո՞վ է այդ հիմարը…»,-Panorama.am-ին ասաց նա: Սակայն գազի ծախսի խնդիրը ևս չանտեսեց:

Տնօրենի տեղեկացմամբ, դեկտեմբեր ամսի սկզբին հաստատության հաշվի վրա իսկապես եղել է շուրջ 1 մլն դրամի չափի գումար (երկու անգամ կանխավճար է փոխանցվել), բայց այդ գումարը գոյացել է ոչ միայն ԿԳ նախարարության հատկացումների, այլև դպրոցի սեփական եկամուտների տնտեսումների հաշվին. «Այդ կանխավճարները չեն օգտագործվել ու գումարը մինչ օրս էլ նստած է մեր հաշվին: Դեկտեմբերին վառել ենք շուրջ 400 հազարի կարգի, այսինքն` գումարի մյուս մասն այնտեղ է, ուր ես նշեցի: Եվ դա շատ հեշտ է ստուգել` կասկածողներին անձամբ եմ հրավիրում» ,- տեղեկացրեց տնօրենը:

Փոխանցված մնացած գումարը դպրոցը կվառի ձմեռային երկու այս ամիսներին` հունվար-փետրվարին: Իսկ կանխավճար կատարելու առումով տիկին Աշոտյանը պարզաբանեց, որ նախօրոք փոխանցում կատարելու հնարավորություն ունեցել է, քանի որ դպրոցի բյուջեում հաջողացրել են տնտեսումներ կատարել ու բացի այդ էլ` «ի՞նչ իմանամ ինչ ձմեռ կլինի, նախօրոքը ճիշտ է»:

Բնականաբար, նա հավաստիացրեց, որ իրենց դպրոցում սովորող աշակերտներից և ոչ մեկից երբևէ գումար չի հավաքվել, իսկ եթե նման անհրաժեշտություն առաջացել է` դասագիրք գնելու համար, ապա այդ գումարը փոխհատուցել է Նոր Կյանքի գյուղապետարանը : Մի խոսքով. «Նման բան չկա. դա ինչ-որ մի հիմարի տարածած բան է»,- շեշտեց տնօրենը ու ևս մեկ անգամ հորդորեց կասկածողներին անձամբ այցելել դպրոց ու համոզվել ամեն ինչում, այդ թվում նրանում, որ հաստատությունը լավ վերանորոգված է ու ոչնչի կարիք չունի: