Ձեր վստահելի աղբյուրը

Արցախի նախագահ Բակո Սահակյանը երեկ ցավակցական հեռագիր է հղել Խորհրդային Միության հերոս Գևորգ Վարդանյանի ընտանիքին:

Հեռագրում ասված է.
«Լեռնային Ղարաբաղի Հանրապետությունում խոր վշտով ընդունեցինք Գևորգ Անդրեյի Վարդանյանի մահվան բոթը` հայ ժողովրդի արժանավոր զավակի, ով մեծ հարգանք էր վայելում Արցախում:

Ինչպես հայ ժողովրդի, այնպես էլ համայն մարդկության համար ծանր ժամանակաշրջաններից մեկում` երկրորդ համաշխարհային պատերազմի ամենաթեժ պահին, Գևորգ Վարդանյանն ակտիվ մասնակցություն է ունեցել հակահիտլերյան կոալիցիայի առաջնորդների դեմ ծրագրված մահափորձի կանխմանն ուղղված կարևորագույն օպերացիայի իրականացման մեջ: Ցանկացած սխալ քայլ, առանց չափազանցության, կարող էր փոխել համաշխարհային պատմության ողջ ընթացքը: Մենք հպարտ ենք, որ ունենք նման հայրենակիցներ:

Ընդունեք իմ խորին և անկեղծ ցավակցությունը: Ձեզ համար այս ծանր պահին Լեռնային Ղարաբաղի Հանրապետության ժողովուրդը և իշխանությունները Ձեզ հետ միասին կիսում են անդառնալի կորստի ցավն ու վիշտը:
Գևորգ Վարդանյանի պայծառ կերպարը միշտ վառ կմնա մեր սրտերում»: