Ձեր վստահելի աղբյուրը

 «Ադրբեջանի ժողովդրական ճակատը բացահայտ կոչ էր անում Բաքվից վռնդել բոլոր հայերին ու գրավել նրանց բնակարանները: Ողջ 1989 թվականի ընթացքում Բաքվում բնակվող հայերը վախենում էին դուրս գալ փողոց, քանի որ իրենց ազգային պատկանելության պատճառով ենթարկվում էին հարձակումների, ծեծի ու թալանի: 1989 թվականին գրանցվեցին հայերի սպանության բազմաթիվ դեպքեր»,- գրում է «Bakuam.info»- կայքն ու ընդգծում, որ 1990թ. Բաքվի հայերի կոտորածները շարունակվել է հունվարի 13-ից 20-ը ներառյալ, ինչին 1988-89 թվականներին նախորդել էր ադրբեջանական ողջ ԶԼՄ-երի հակահայկական քարոզչությունը:

«1990թ. հունվարյան ջարդերը կանխավ նախապատրաստված էին: Հեռուստատեսությամբ և ռադիոյով ելույթ ունենալով` Ադրբեջանի մտավորականության շատ ներկայացուցիչներ շեշտում էին, որ հայերը քաղաքում զբաղեցնում են կարևորագույն պաշտոններ և ապրում են լավագույն բնակարաններում:

ԲՇՏ-ների աշխատակիցները մթերային քարտերի ցուցակներով ճշտում էին քաղաքում գրանցված հայերի առկայությունը: Կազմվել էր քաղաքի քարտեզն իր բոլոր մանրամասնություններով` բաժանված համապատասխան թաղամասերի, որոնց վրա նշված էին այն հատվածները, որտեղ առավել խիտ էին բնակեցված հայերը: Նախապես կազմվել էին նաև հայերին պատկանող տների ու բնակարանների հասցեների ցուցակները: Ջարդարարներին օգնում էին իրավապահ մարմինները` ապահովելով նրանց անպատժելիությունը: Իրենց հերթին շտապ բուժօգնության բժիշկները կեղծ տեղեկանքներ էին տրամադրում, թե իբր հայերի մահվան պատճառ է հանդիսացել սիրտ-անոթային հիվանդությւոնները:

1990 թվականի հունվարի 13-ին հայերի կոտորածները Բաքվում ստացան համընդհանուր բնույթ, իսկ ԽՍՀՄ ղեկավարությունը չէր միջամտում այդ իրադարձություններին, թեպետ քաղաքում բավականաչափ առկա էին ԽՍՀՄ ՆԳՆ ներքին զորքերի և զինված ուժերի ստորաբաժանումներ, որոնք կարող էին արագորեն կարգուկանոն հաստատել:

…Սպանությւոններն ու թալանը շարունակվեցին մինչև հունվարի 20-ը, երբ խորհրդային զորքերը մտան քաղաք: Հայերի ջարդերի արդյունքում զոհերի իրական թիվը դեռ հստակեցված չէ: Մի շարք ուսումնասիրությունների համաձայն` այդ թիվը գերազանցում է 400-ը:

Բաքվում հայերի ջարդերին անդրադարձել են եվրոպական և ամերիկյան ԶԼՄ-երը: Իսկ հունվարի 18-ին մի խումբ սենատորներ համատեղ նամակ հղեցին Մ.Գորբաչովին, ուր իրենց մտահոգությունն էին հայտնում հայերի կոտորածների կապակցությամբ: 1990թ. հայերի ջարդերը դատապարտվել են Եվրախորհրդարանի ու ամերիկյան Կոնգրեսի կողմից: Այդուամենայնիվ, Բաքվում տեղի ունեցածը դեռև իրավական գնահատական չեն ստացել, իսկ կորուստները դեռևս չեն փոխհատուցվել»: