Ձեր վստահելի աղբյուրը

Փաստաբան Արա Ղազարյանը, որը Մարդու իրավունքների եվրոպական դատարանում (ՄԻԵԴ) ներկայացնում է Բաքվում սպանված հայ գերի Մանվել Սարիբեկյանի հարազատներին, պատրաստվում է պահանջել դատարանում ծառայողական քննություն անցկացնել:

Այդ մասին Panorama.am-ի թղթակցի հետ զրույցում տեղեկացրեց փաստաբան Արա Ղազարյանը:

Բանն այն է, որ Եվրոպական դատարանից տեղեկատվական բնույթի որոշ փաստաթղթեր փաստաբանը ստացել է պահանջվող ժամանակից շատ ուշ. Եվրադատարանի կողմից հուլիսի 28-ին ուղարկված փաստաթուղթը Արա Ղազարյանը ստացել է միայն վերջերս` դեկտեմբերի 26-ին, իսկ ծրարի վրա նշված է եղել, որ այն Հայաստան մուտք է գործել դեկտեմբերի 24-ին:

«Հիմա ես հարցում եմ ուղարկել մի հատը փոստային բաժանմունք, մյուսն էլ` Եվրոպական դատարան: Դատարանին ուղղակի ծանուցել եմ, որ ի գիտություն ձեզ` ձեր ուղարկած նամակը ստացել եմ ոչ թե մինչև սեպտեմբերի 22-ը, այլ` դեկտեմբերի 26-ը: Ու հիմա ես պատրաստվում եմ մի նամակ էլ ուղարկել` խնդրելով ծառայողական քննություն կատարել` պարզելու, թե ինչպես է ստացվել, որ Հայաստան փաթեթը մուտք է գործել դեկտեմբերի 24-ին», -ներկայացրեց Արա Ղազարյանը:

Նա, սակայն, չի սպասել այդ փաստաթղթերի «ժամանմանը» և նախորդ տարի Բաքվում սպանված հայ գերի Մանվել Սարիբեկյանի գործով ընդդեմ Ադրբեջանի գանգատը ավելի վաղ արդեն ներկայացրել է ՄԻԵԴ:

Մարդու իրավունքները պաշտպանելու համար կոչված եվրոպական կառույցի այսպիսի վարքագիծը փաստաբանի մոտ որոշ կասկածների տեղիք է տվել, հակառակ դեպքում մի քանի, ըստ էության շատ կարևոր փաստաթղթեր, զգալի ուշացումով տեղ չէին հասնի: Փաստաբանի կարծիքով, ՄԻԵԴ-ը այդ ամենը միտումնավոր է արել, որպեսզի հայկական կողմը Սարիբեկյանի գործով գանգատը ներկայացնի պահանջվող ժամկետից ուշ: «Իսկ եթե ես խախտեի Եվրոպական դատարանի սահմանած ժամկետը, ապա կարող էր ադրբեջանական կողմը շահարկել, թե գանգատը հայկական կողմը ներկայացրել է ուշացումով, կամ կարող էր ուղղակի ոչինչ էլ չլիներ», -հնարավոր զարգացումները ուրվագծեց Արա Ղազարյանը:

Փաստաբանի համար տարակուսելի է`ինչո՞ւ է Եվրոպական դատարանը նման «անփութություն» ցուցաբերել: «Իմ 10 տարվա պրակտիկայում Եվրոպական դատարանը երբեք նման անփութություն չի դրսևորել այն էլ` մի գործով երեք անգամ, հետևաբար չեմ կարող ասել, որ այս դեպքում միտում չկա: Տասը տարվա մեջ 50 գործի վերաբերյալ ոչ մի բան չի խախտվել, հիմա հանկարծ խախտվեց», նշեց Ադրբեջանի դեմ Սարիբեկյանի հարազատների գանգատը ՄԻԵԴ ներկայացրած փաստաբանը:

Panorama.am-ը ավելի վաղ անդրադարձել էր Մանվել Սարիբեկյանի ծնողների՝ Մամիկոն Սարիբեկյանի և Սիրանուշ Բալյանի անունից փաստաբան Ղազարյանի կողմից ՄԻԵԴ ուղարկված գանգատին: Սարիբեկյանի ծնողները համոզված են, որ Ադրբեջանը խախտել է Կոնվենցիայով երաշխավորված մի շարք իրավունքներ, այդ թվում Մ. Սարիբեկյանի կյանքի իրավունքը:

Մանվել Սարիբեկյանը ՀՀ Գեղարքունիքի մարզի Թթուջուր գյուղի բնակիչ էր: Թթուջուր գյուղի անմիջական հարևանությամբ անցնում է հայ-ադրբեջանական սահմանը: 2010թ. սեպտեմբերի 11-ին երեկոյան ժամը 17-ի սահմաններում Մանվել Սարիբեկյանն իր ընկերների հետ գնացել է գյուղի Քեղուտ կոչվող հանդամասի ուղղությամբ՝ մոտակա անտառից փայտ հավաքելու և իր և գյուղի մյուս բնակիչների անասուններին փնտրելու նպատակով, որոնք կորել էին նախորդ օրը: Մանվելն առաջարկել է ընկերներին անտառում փայտ հավաքել, մինչև ինքը կորոնի անասուններին: Հանդամասում գտնվող ֆերմայի պահակից ձի վերցնելով, Մանվելը շարժվել է ֆերմայից քիչ հեռու գտնվող անտառապատ ձորակի ուղղությամբ, որտեղից այլևս չի վերադարձել:

2010թ. սեպտեմբերի 18-ին Ադրբեջանի ԶԼՄ-ները տեղեկություն են տարածել, թե, իբր Ադրբեջանի զինված ուժերի կողմից ձերբակալվել է հայ հետախույզ, ով ահաբեկչական գործողություններ կատարելու նպատակով դիվերսիոն խմբի հետ փորձել է հատել Ադրբեջանի սահմանը, սակայն ձերբակալվել է, իսկ խմբի մյուս անդամները դիմել են փախուստի: Իր հերթին ադրբեջանական ANS TV հեռուստաընկերությունը պատրաստել է հատուկ թողարկում, որում ցուցադրվել է Մանվել Սարիբեկյանի հարցազրույցը հեռուստաընկերության աշխատակցի հետ:

2010թ. հոկտեմբերի 4-ին Ադրբեջանի պաշտպանության նախարարությունը և զինվորական դատախազությունը համատեղ հայտարարություն են տարածել այն մասին, որ Մանվել Սարիբեկյանն ինքնասպան է եղել կալանքի տակ գտնվելիս: Մոտ մեկ ամիս անց, 2010 թվականի նոյեմբերի 4-ին ադրբեջանական իշխանությունները Հայաստանին հանձնել են Մանվել Սարիբեկյանի դին: Դիակի զննությամբ պարզվել է, որ այն պատշաճ կերպով չի պահպանվել Ադրբեջանում, և եղել է քայքայված վիճակում: