Ձեր վստահելի աղբյուրը

Երևանում ծննդաբերությունների 30 տոկոսն իրականացվում է կեսարյան հատման միջոցով: Օրինակ, առողջապահության նախարարության տրամադրած տվյալների համաձայն, այս տարվա առաջին տասն օրերին Երևանի ծննադատներում գրանցվել է 514 ծնունդ, որից 155-ի դեպքում կեսարյան հատում է կիրառվել: Իսկ դա կազմում է ծննդաբերությունների թվի 30 տոկոսը: Այս թիվը կայուն է եղել նաև նախորդ ամիսներին:

Նույն ԱՆ տրամադրած տվյալների համաձայն, 2010-ի առաջին կիսամյակում 2009-ի նույն ժամանակահատվածի համեմատ կեսարյան հատումների թիվն ավելացել է 0.9 տոկոսով: Իսկ 2009-ին 2008-ի համեմատ տարեկան կտրվածքով կեսարյան հատումների թիվն ավելացել է Երևանում` 3 տոկոսով, ողջ հանրապետության կտրվածքով` 2 տոկոսով: 2009-ին Երևանում կեսարյան հատումները հասել են 25 տոկոսի, իսկ հանրապետության կտրվածքով` 17:

2011-ի առաջին կիսամյակում մայրաքաղաքում իրականացվել է 2973 կեսարյան հատում. ցուցանիշը 2010 թվականի առաջին կիսամյակի համեմատ ավելացել է 382-ով: Մարզերի բուժհաստատություններում 2011թ-ի առաջին կիսամյակում գրանցվել է 1364 կեսարյան հատում: Այս ցուցանիշը նախորդ տարվա նույն ժամանակահատվածի համեմատ ավելացել է 53-ով: Այսինքն, կեսարյան հատումների թիվը հանրապետությունում կայուն կերպով աճում է:

Մասնագետների հիմնավորումները թվի աճի վերաբերյալ, ինչպես նաև կեսարյան հատման հետևանքների մասին բացատրությունները կներկայացնենք մեր հաջորդ հրապարակումներում, իսկ մինչ այդ ներկայացնենք պատճառներ:
Կեսարյան հատման պատճառ կարող է հանդիսանալ մոր մոտ առկա հիպերտոնիան, երիկամների, սրտի հիվանդությունները, ողնուղեղի վիրահատությունը և աչքերի թոււյլ տեսողությունը, եթե նախկինում եղել է կեսարյան հատում (վտանգ կա, որ կարերը կբացվեն): Կեսարյան հատմանը դիմում են նաև ծննդաբերություն ժամանակ, երբ հայտնվում են չնախատեսված բարդություններ` ընկերքի վաղաժամ շերտազատում, պտղի վիճակի փոփոխություն, պորտալարի անջատում, երբ երեխան դադարում է թթվածին ստանալ, եթե հայտնաբերվել է արգանդի ուռուցք, որը փակում է ծննդուղիները: Կեսարյան հատման անհրաժեշտություն կա ընկերքի սխալ ձևավորման, պտղի լայնակի դիրքի, պրեէկլամսիայի` արյան բարձր ճնշման, քաշի ավելացման, սպիտակուցների բարձր մակարդակի ժամանակ: Նաև կեսարյան հատումը անհրաժեշտ է այն ժամանակ, երբ մոր մոտ առկա է սեռական օրգանների հերպես (ծննդուղիներով անցնելիս հնարավոր է, որ երեխան վարակվի) և արհեստական բեղմնավորումից հետո, որը շատ դժվար է և հիմնականում բազմապտուղ:

Այսօր արդեն շատ են կանայք, ովքեր գերադասում են կեսարյան հատումը, ծննդաբերության ցավերից խուսափելու համար:
Կեսարյան հատումով երեխա լույս աշխարհ բերած կանանցից մեկը Panorama.am-ի հետ զրույցում նշեց, որ այսօր էլ նախընտրում է երեխա ունենալ կեսարյան հատումով: «Կեսարյան հատման ժամանակ ոչ մի ցավ չես զգում, հետո մի 2 ժամ ուղղակի դողացնում ես, մինչև անցնում է անզգայացումը, հետո 1-2 օր, սովորական ցավեր ու վերջ: Իսկ բնական ծննդաբերության ժամանակ. մի քանի ժամ ցավեր, հետո պատռվածքներ, կարեր, ահավոր է»,-այսպես է հիմնավորում Տ. Գրիգորյանը: Մեկ ուրիշն էլ` Ա. Դարբինյանը հիշում է, որ ծննդաբերության հաջորդ օրն առանց դժվարությամբ քայլել է, ոչ մի խնդիր չի ունեցել, զուտ հետաքրքրության համար կցանկանար հաջորդ երեխան բնական ճանապարհով ունենալ:

Նշենք, որ չնայած Առողջապահության համաշխարհային կազմակերպության կանխատեսումներին, կեսարյան հատումների թիվն այսօր աճում է ողջ աշխարհում: ԱՄՀ մատնանաշած 15 տոկոսի փոխարեն այն մի շարք երկրներում հասնում ու գերազանցում է 25 տոկոսը: