Ձեր վստահելի աղբյուրը

2011 թվականի ընթացքում Երևանի Պետական Համալսարանն ամբողջությամբ անցել է կրեդիտային համակարգով ուսուցմանը (այդ թվում` ասպիրանտուրան): Վերանայվել են նաև գնահատման համակարգերը: Ամփոփելով 2011-ը` այս մասին այսօր ասուլիսի ժամանակ հայտնեց ԵՊՀ ռեկտոր Արամ Սիմոնյանը:

Ռեկտորի խոսքերով` տարվա ձեռքբերումներից դասախոսների վերապատրաստման և որակավորման բարձրացման ծրագրի մեկնարկն էր, որում հատկապես կարևորվում է լեզուների իմացության և համակարգչային գիտելիքների մակարդակի բարձրացումը. «Շեշտը դրվել է երիտասարդ մասնագետների որակավորման վրա», - ասաց նա` ընդգծելով, որ անցած ուստարվա ընթացքում համալսարանը համալրվել է 30 նոր դասախոսներով:

«Հատկապես մեծ ուշադրություն է դարձվում օտար լեզուների դասախսներին, որոնք վերապատաստվում են եվրոպական 6-աստիճանոց համակարգով, անցնելով A-ից C2 աստիճանները: Հատուկ ուշադրությունն է դարձվում նաև համակարգչի իմացության հարցին», - տեղեկացրեց նա` հավելելով, որ Մայր բուհը շարունակում է ջանքեր գործադրել դասախոսական կազմի համալրման ուղղությամբ` հրավիրելով ոչ միայն հայստանաբնակ, այլ նաև արտասահմանում բնակվող կամ օտարազգի փորձառու մասնագետներին:

Ըստ ԵՊՀ ղեկավարության` 2010-11 ուստարում համալսարանի հիմնական դասախոսական կազմում եղել է 1257 դասախոս, որից պրոֆեսոր` 163, դոցենտ` 467, ասիստենտ` 268 և դասախոս` 359: Այդ կազմի 65,9%-ը ունի գիտական աստիճան: Իգական սեռի հիմնական դասախոսական հաշվարկը կազմել է 53,7%: Հիմնական դասախոսական կազմում մինչև 35 տարեկան դասախոսների թիվը կազմել է 285 հոգի, 35-65 տարեկաններինը` 750, իսկ 65-ից բարձր` 222:

Ա.Սիմոնյանն անդրադարձավ նաև 2011 թ-ին դիմորդների սղության պատճառով առաջացած կրճատումներին: «Պակասեցվել են որոշ հաստիքաչափեր, սակայն ոչ մի մասնագետ առանց աշխատանքի չի մնացել: Համալսարանում աշխատանքը թողել են միայն կենսաթոշակային տարիքի հասած աշխատակիցները», - վստահեցրեց նա: Ըստ ռեկտորի, տարվա ընթացքում եղել է կարգապահական պատճառներով հեռացման 2 դեպք:

Խոսելով դասախոսների սոցիալական վիճակից` ռեկտորը վստահեցրեց, որ բոլոր միջոցներն ձեռնարկվում են աշխատավարձի բարձրացման կամ աշխատանքի խրախուսման ուղղությամբ: Ըստ Ա.Սիմոնյանի, այսօրվա դրությամբ համալսարանի բոլոր աշխատակիցների միջին աշխատավարձը 122 հազար դրամ է, իսկ զուտ դասախոսներինը` 140 հազար: Նրա խոսքով, սահմանված է հավելավճարների մեխանիզմ, որը հնարավորություն է տալիս դասախոսին կամ գիտաշխատողին խրախոսելու մինչև 30 հազար դրամով: «Չնայած բոլոր ձեռնարկվող միջոցներին, աշխատավարձերի բարձրացումը շարունակում է կարևոր հարցերից մեկը մնալ»,- եզրափակեց նա: