Ձեր վստահելի աղբյուրը

Այսօր տեղի ունեցավ Երևանի Պետական Համալսարանի խորհրդի նիստ, որը վարեց ՀՀ նախագահ, ԵՊՀ խորհրդի նախագահ Սերժ Սարգսյանը: Մինչև օրակարգին անցնելը երկրի ղեկավարն անդրադարձավ տարիներ առաջ ԵՊՀ ուսանողների և երիտասարդ գիտնականների հետ իր հանդիպումների արդյունքում սկիզբ դրված և հաջողությամբ իրականացվող ծրագրերին, որից հետո քննարկվեց Մայր բուհի 2012 թվականի պետբյուջեն, նախորդ տարվա գիտակրթական և ֆինանսական կատարողականը, հստակեցվեցին հակակոռուպցիոն ծրագրերը:

Ինչպես լրագրողների հետ հանդիպման ժամանակ ասաց ԵՊՀ ռեկտոր Արամ Սիմոնյանը, 2011 թվականը տարբերվեց նախորդ տարիներից նրանով, որ դպրոցներում շրջանավարտներ չեն եղել, և բակալավրիատի առաջին կուրսեր ընդունվողների թիվը շատ փոքր է եղել:

«Չնայած դրան, ԵՊՀ-ը տարին վատ չի փակել նաև ֆինանսական առումով` 2011-ի սկզբին դրված խնդիրները կատարվել են», - վստահեցրեց նա:

Ըստ ռեկտորի` 2011 թվականին հնարավորություն եղավ շարունակել համալսարանը նոր սարքավորումներով վերազինելու ծրագիրը, որն իրականացվում է արդեն երրորդ տարին` գտնվելով ՀՀ նախագահի անմիջական վերահսկողության ներքո: Ա.Սիմոնյանը տեղեկացրեց, որ ծրագրի իրագործման համար 2011 թվականի կտրվածքով տարեկան 160 միլիոնից ավել դրամ է ծախսվել:

Համալսարանի ղեկավարը գոհունակությամբ նշեց նաև, որ տարվա ընթացքում շարունակելիություն ունեցավ բուհի գիտադասախոսական կազմին բնակարաններով ապահովելու գործընթացը:

«Մինչև 2013թ. մայիս ծրագրի այդ փուլը կավարտենք, որի արդյունքում 1300 երիտասարդ մտավորականներ ապահովված կլինեն իրենց համար մատչելի բնակարաններով», - վստահեցրեց նա:

Խոսելով հակակոռուպցիոն միջոցառումների մասին, Ա.Սիմոնյանը նշեց, որ ստեղծվել է հակակոռուպցիոն հանձնաժողով, որին , բացի գիտական և դասախոսական կազմից, մասնակցում է նաև 2 ուսանող: Ըստ ռեկտորի, որոշակի առաջընթաց է նկատվում դասախոսների որակավորման և ուսանողների կողմից գնահատման գործընթացներում:

«Դասախոսների գնահատումն իրականացվում է տարեկան երկու անգամ, որին մասնակցում է բուհի սուանողների շուրջ 75%-ը: Անանուն հարցման արդյունքում պարզ են դառնում դասախոսների մասնագիտական, մանկավարժական, ինչպես նաև մարդկային և բարոյական կերպարները», - նշեց նա:

Ըստ Ա.Սիմոնյանի` ավելի թափանցիկ է դարձել նաև քննական գործընթացը: «Յուրաքանչյուր մարդ կարող է մասնակցել քննությանը` իհարկե չխանգարելով քննական գործընթացին», - վստահեցրեց նա` հիշեցնելով, որ նման պրակտիկա արդեն մի քանի տարի կիրառվում է ընդունելության քննությունների ժամանակ: