Ձեր վստահելի աղբյուրը

ՀՀ կրթության և գիտության նախարար Արմեն Աշոտյանն այսօր լրագրողների հետ հանդիպման ժամանակ հայտարարեց, որ պատասխանելու է ոչ միայն լրագրողների, այլև «Ֆեյսբուք» սոցիալական ցանցի օգտատերերի կողմից առավել հաճախ տրվող հարցերին:

Ֆեյսբուքցիներն առավելապես հետաքրքրված են ավագ դպրոցների խնդիրներով: Այս առնչությամբ ՀՀ կրթության և գիտության նախարարը հայտարարեց, որ մեկ-երկու տարին ավագ դպրոցներում առկա խնդիրները լուծելու համար բավարար չեն:

Ըստ նախարարի՝ հանրապետությունում այսօր արդեն գործում է 107 ավագ դպրոց, ունենք բավականին հաջողված դասագրքեր, համապատասխան ուսումնական ծրագրեր, վերապատրաստված ուսուցիչներ և մշտական վերահսկողություն:

«Ավագ դպրոցները նախարարության մշտական ուշադրության կենտրոնում են և հետզհետե դառնում են հանրակրթության համակարգի լավագույն օղակը: Իհարկե, խնդիրները շատ են՝ գույքային և շենքային պայմանների արդիականացում և այլն»,- նշեց Ա.Աշոտյանը և ավելացրեց, որ այս տարի շուրջ 20 ավագ դպրոցներում վերակառուցման և նորոգման ծրագիր են իրականացնելու:

«Բոլոր դեպքերում ավագ դպրոցների ծրագիրն այլընտրանք չունի: Հետխորհրդային և սոցիալիստական երկրներից շատ քչերն են ռիսկի դիմել և առանձնացրել ավագ դպրոցները, որովհետև վախեցել են հասարակական կարծիքի ճնշումից: Բայց կրթության ոլորտի լավագույն բոլոր մասնագետները, ոչ միայն մեզ մոտ, այլև աշխարհում գիտեն ու համոզված են, որ ավագ դպրոցների համակարգը այլընտրանք չունի: Ավագ դպրոցների բարեփոխումը ոչ մի երկրում դյուրին չի եղել, որովհետև դա ենթադրում է «ստերիոտիպերի» կոտրում: Մենք գնացել ենք այդ ճանապարհով և կարևոր քայլն արդեն արել ենք, մնացածն ավելի հեշտ է լինելու»,- հայտարարեց Ա.Աշոտյանը:

Նա նաև նշեց, որ «Ֆեյսբուք»-ում հաճախ է բարձրացվում գիտական կոչումների հարցը: Աշոտյանի խոսքերով՝ գիտական աստիճանաշնորհման կարգը խստացվել է՝ ասպիրանատուրա ընդունվելն ու ատենախոսություն պաշտպանելն ավելի դժվար է լինելու: Խստացված չափանիշներ են սահմանվել նաև գիտական ամսագրերի նկատմամբ:

Ա.Աշոտյանը առանձնացրեց մասնավորապես անգլերենի իմացության (TOEFL) պահանջների խստացումը. «Նախորդ տարիների iTp(այԹԻՓԻ) փոխարեն iBT(այԲԻԹԻ)՝ այսինքն օնլայն քննություն է պահանջվելու, ինչը կտրուկ դժվարացնում է ասպիրանտուրա ընդունվելու գործընթացը»,- նշեց նախարարը՝ հավելելով, որ խստացումների արդյունքում պաշտպանվող ատենախոսությունների և շնորհվող գիտական կոչումների թիվը որոշակիորեն կնվազի: «Մեզ համար կարևոր խնդիրը որակի և ոչ թե քանակի ապահովումն է»,- շեշտեց Ա.Աշոտյանը: