Ձեր վստահելի աղբյուրը

Թուրքական «CnnTurk» հեռուստաալիքով ցուցադրվող «Չեզոք գոտի» հաղորդաշարի վարող Ահմեթ Հաքանը նախօրեի իր եթերը նվիրել էր Հրանտ Դինքի սպանության գործով կայացված դատավճռի թեմային: Հեռուստաեթերից նա պատմել է, որ մինչև հաղորդման հեռարձակումը «Twitter» սոցիալական ցանցով տեղեկացրել է «Չեզոք գոտում» Դինքի սպանության և դատավճռի թեմայի քննարկվելու մասին: Եվ ի զարմանս իրեն` բավական կոպիտ արձագանք է ստացել բազմաթիվ թուրք օգտատերերի կողմից: Ահմեթ Հաքանն էլ հակադարձել է, թե բոլորս հայ ենք, ինչն ավելի կոշտ հակազդեցություն է առաջացրել թուրքական լսարանում: Սկսվել է կոպիտ խոսքերի ու վիրավորանքների տարափ թուրք լրագրողի վրա:

Ահմեթ Հաքանը ցավ ու ափսոսանք է հայտնել, որ հայ բառը որոշ մարդկանց կողմից ընկալվում է իբրև վիրավորական խոսք, նույնիսկ` հայհոյանք: Հաղորդման շրջանակներում հյուրընկալած բանախոսներին հայտնելով այդ ամենի մասին` Ահմեթ Հաքանը ի պատասխան «Twitter»-ի թուրք անհանդուրժողական մասսային` ասել է. «Եթե Հրանտը հայ լինելու համար սպանվեց, ուրեմն ես հայ եմ»: