Ձեր վստահելի աղբյուրը

ՀՀ կառավարության այսօրվա նիստում հավանություն տրվեց ՀՀ կառավարության և Միջազգային ֆինանսական կորպորացիայի (ՄՖԿ) միջև համագործակցության համաձայնագրի կնքմանը: Ինչպես նշեց ՀՀ վարչապետ Տիգրան Սարգսյանը, վերջին շրջանում բիզնես միջավայրի գնահատականների վերաբերյալ եղել են տարբեր մեկնաբանություններ, նույնիսկ այնպիսի թեզեր, թե բացարձակապես կարևոր չէ ինչ գնահատականներ են տրվում Հայաստանի բիզնես միջավայրի ուղղությամբ կատարված աշխատանքներին:

Մինչդեռ, ըստ վարչապետի, 2011-ի ընթացքում ՀԲ-ի կառույցները արձանագրել են, որ Հայաստանը 6 քայլով առաջ է շարժվել և բիզնես միջավայրը մեր երկրում բարելավել է: Երկրորդ` Հայաստանը աշխարհում միակ երկիրն է, որ 5 ուղղություններով է արձագանքել առաջընթաց, այսինքն` ՀԲ-ի փորձագետները արձագանքել են, որ Հայաստանում իրականացվող բարեփոխումները արդյունքն են տվել:

Տ.Սարգսյանի խոսքերով` քաջ գիտակցում են, որ դեռ շատ անելիքներ ունենք և դրանով է պայմանավորված այն հանգամանքը, որ այսօր կառավարությունը հավանության է արժանացնում այս փաստաթուղթը: «Սա ենթադրում է, որ մենք ՀԲ-ի ֆինանսական կորպորացիայի հետ միասին շարունակելու ենք բիզնես միջավայրի բարելավման ուղղությամբ մեր աշխատանքները»,- ասաց վարչապետը:

Նշենք, որ ՄՖԿ-ն 2009 թ. հունվարից մինչև 2011 թ. սեպտեմբեր ամիսները Հայաստանում իրականացրել է «Գործարարությամբ զբաղվելու միջավայրի (Doing business) բարեփոխումներ և կանոնակարգման ոլորտի պարզեցում» խորհրդատվական ծրագիրը։ 2011 թ. սեպտեմբերից սկսել է իրականացնել նաև «Ներդրումային միջավայրի բարեփոխումներ» խորհրդատվական ծրագիրը, որը նախատեսվում է ավարտել 2014 թ. սեպտեմբերին։ Նոր ծրագրի նպատակն է աջակցել կառավարությանը բարելավելու Հայաստանի ներդրումային միջավայրը` գործարարությամբ զբաղվելու համար անհրաժեշտ ժամանակի և ծախսերի կրճատման և հետևյալ 4 ոլորտներում արդյունավետության բարձրացման միջոցով` հարկային ընթացակարգերի պարզեցում, արտահանում և ներմուծում, տեսչական ստուգումներ, սննդամթերքի անվտանգություն:

Իրականացվող բարեփոխումների համար ՀՀ կառավարությանը տեխնիկական աջակցություն է ցույց տալու Միջազգային ֆինանսական կորպորացիան հետևյալ ոլորտներում` հարկման, արտահանման ու ներմուծման, սննդամթերքի անվտանգության ու տեսչական ստուգումների ոլորտներում վարչարարական բեռի և կանոնակարգման արգելքների կրճատման միջոցով Հայաստանում ներդրումային միջավայրի բարելավման, ինչպես նաև մասնավոր հատվածի զարգացման խթանմանը աջակցելու նպատակով:

Որոշման հիմնավորման մեջ շեշտվում է, որ իրականացվող բարեփոխումները պետք է զգալիորեն բարձրացնեն Հայաստանի գլոբալ մրցունակությունը և արդյունքում բարելավեն Հայաստանի դիրքը Համաշխարհային բանկի «Գործարարությամբ զբաղվելը» դասակարգման մեջ: