Ձեր վստահելի աղբյուրը

Հայ մեծանուն գրող Հովհաննես Թումանյանի թբիլիսյան տան վաճառքի մասին խոսակցությունները վերջին մի քանի տարիներին բազմիցս են հնչել, սակայն միշտ էլ անարձագանք են մնացել: Վերջին օրերն կրկին այդ վաճառքի մասին խոսակցությունները ակտիվանցան, ու այս անգամ, կարծես, «իրոք վաճառվելու է կամ արդեն վաճառվել է»:

Ֆեյսբուքում ստեղծվել է «Թումանյանական հեքիաթ» բաց խումբ:
«Հովհաննես Թումանյանի թբիլիսյան տունը վաճառվում է, ու ճակատագիրը ինչպիսին կլինի` դեռ պարզ չէ: Տունը վաճառվում է ընդամենը 70.000$: Այս խմբի նպատակն է, համախմբել բոլոր ֆինանսական ուժերն, այդ տունն օտարումից փրկելու: Ամեն մի ընկերություն ընդամենը 1000$ ներդնելով՝ կարող է նպաստել այս նպատակի իրագործմանը: Թումանյանասեր հա՛յ բարեկամներ, միացե՛ք մեր նախաձեռնությանը»: Ի դեպ, նկատենք, որ նախաձեռնությանն արդեն միացողներ կան: Բայց խմբի անդամները զրույց են ունեցել «Գրողների Միության նախագահ՝ պրն. Լևոն Անանյանի հետ: Նա հայտնեց, որ վարչապետի հանձնարարականով գտնվում է Թբիլիսիում և խնդրեց դեռ ոչինչ չձեռնարկել, այլ սպասել հանձնաժողովի վերադարձին երկուշաբթի օրը»,- զետեղված է   խմբի էջում:

ՀՀ մշակույթի նախարարությունը, թեև Հայաստանի գրողների միության նախագահ Լևոն Անանյանի գլխավորությամբ պատվիրակություն էր գործուղել Թբիլիսի` տեղում իրավիճակը պարզելու ու իրարամերժ հայտարարություններին վերջ տալու համար, սակայն տեղյակ էլ չէր, թե պատվիրակությանը հաջողվե՞լ է բանակցություններ վարել ու ի՞նչ արդյունքի են հասել:

Panorama.am-ը երեկ կապվել էր Թբիլիսում գտնվող Լևոն Անանյանի հետ, ով ասել էր, որ պայմանավորվածություն է ձեռք բերվել տան սեփականատիրոջ հետ` փոխարինել այդ տունը նույն թաղամասում գտնվող նույնչափ տարածք ունեցող մեկ այլ տան հետ:

Մի կողմ թողնենք ֆեյսբուքյան քննարկումները, թե դանակը ոսկորից անցելուց հետո ով գնի Թումանյանի տունը` հասարակությո՞ւնը, թե՞ կառավարությունը: Ո՞վ է արժանի ավելի տեր կանգնելու Թումանյանի տանը: Եկեք տեսնենք տողատակերը. ինչ կարող է նշանակել Անանյանի այս խոսքերը:

Մի՞թե Հայաստանի կառավարությունը Թբիլիսի այդ թաղամասում սեփականաշնորհած տներ ունի, որ պետք է Թումանյանի տունը փոխարինի իր տներից մեկի հետ: Իսկ եթե չունի` նշանակում է, որ Թումանյանի թբիլիսյան տունն արդեն վաճառված է, կքնված է վաճառքի ու գնման պայմանագիր ու այժմ ՀՀ կառավարությունը ստիպված է նույն թաղամասում գնել տուն, միգուցե 70 հազար դոլարից էլ թանկ, որպեսզի փոխարինի, որովհետև եթե վաճառված չլիներ, այդ գումարով կգներ, էլ ինչու պետք է դժվարացներ գործը` գներ մի տուն, փոխարինել մեկ այլ տան հետ:

 Նախորդող նորություններ՝
Նախարարը Թբիլիսի մեկնած պատվիրակության վերադարձից հետո կպատասխանի բոլոր հարցերին

Հ. Թումանյանի թբիլիսյան բնակարանի հետ կապված իրավիճակը պարզելու համար պատվիրակություն է մեկնելու Թբիլիսի