Ձեր վստահելի աղբյուրը

Հունվարի 16-ից Երևանի փողոցներիում երթևեկությունը վերահսկող արագաչափերն առաջին օրվանից հարյուրավոր խախտումներ են գրանցել: Մինչև այսօր, ըստ պաշտոնական տվյալների` գրանցվել է ընդամենը 106 կմ/ժ արագությամբ սլացող ավտոմեքենա:

ՀՀ ՃՈ ճանապարհապարեկային ծառայության պետ Նորիկ Սարգսյանը «Առաջին լրատվականին» հայտնել է, որ դեռ հունվարի 15-ին, երբ վերահսկող համակարգը պաշտոնապես գործարկված չէր, Սարալանջի փողոցում գործող արագաչափն արձանագրել է 750 խախտում: «Բայց հունվարի 16-ից մինչ այսօր նույն փողոցում սարքն ընդամենը 700 խախտում է արձանագրել»,- ասել է նա, նշելով, որ վարորդները փորձում են ավելի քիչ խախտումներ անել:

Ըստ Ն.Սարգսյանի, բոլոր 15 արագաչափերը 1 օրում 2500 խախտում են արձանագրել: Ոստիկանությունում կարծում են, որ արագաչափերի միջոցով հնարավոր կլինի բարձրացնել երթևեկության կուլտուրան:

Տեսախցիկների կառավարման կենտրոնում աշխատում են օրը 24 ժամ` շաբաթական 7 օր: Աշխատակիցների պարտականությունն է հետևել տեսախցիկներից ստացվող պատկերներին և արձանագրել խախտումները: Փաստացի` տեխնոլոգիայից բացի, աշխատում է նաև մարդկային գործոնը: Օպերատորների կողմից յուրաքանչյուր ճիշտ գրանցված խախտում խրախուսվում է, սխալ գրանցվածը` պատժվում: Կա նաև վարկանիշավորում, ըստ որի յուրաքանչյուր օպերատոր կարող է ծանոթանալ իր առաջադիմությանը, իսկ վատ աշխատողներին փոխարինում են:

Տեսաանվտանգության մասնագետ Ալեքսանդր Զաքարյանի խոսքով` օպերատորները հատուկ պատրաստություն են անցել և տիրապետում են երթևեկության բոլոր կանոններին:

ՃՈ ճանապարհապարեկային ծառայության պետը վստահեցրեց, որ տուգանվելու են բոլորը, բացառությամբ հատուկ տարբերանշանով մեքենաները: Դրանք են ոստիկանության, շտապօգնության և հրշեջ ծառայության մեքենաները:
«Բոլոր որոշումներն ունեն հերթական համարներ: Որևէ որոշում չի կարող չլինել: Կամ խախտումը մերժվել է, և խախտում չկա, կամ այն պետք է լինի արդեն առաքված», - ասաց նա, ներկայացնելով խախտում գործած ավտոմեքենաները տուգանելու մասին որոշումները:

Ոստիկանությունում նշում են, որ իրականացվում է կրկնակի վերահսկողութուն. օպերատորը չի կարող տեսնել համարանիշը, այլ միայն խախտումն է արձանագրում, որից հետո այն մշակվում է, և ոստիկանության աշխատակիցները կազմում են տուգանքի արձանագրությունը: «Եթե որևէ մեկը ուզենա ոստիկանության աշխատակիցներին «լավություն» անել, նրա լավությունը կլինի այն, որ նա մուծի տուգանքի գումարը», -ընդգծեց Ն.Սարգյանը:

Իր հերթին, Ա.Զաքարյանը նշեց, որ յուրքանչյուր վարորդ կարող է բողոքարկել տուգանքը: «Վարորդը կարող է գալ այստեղ` քաղաքացիների սպասարկման սրահ, որտեղ կա իրավասու տեսուչներ, որոնք ցույց կտան խախտման տեսանյութը, կմեկնաբանեն այն: Կա նաև ՃՈ ոստիկանության իրավաբանական բաժին: Եթե դա էլ չբավարարի, քաղաքացին կարող է դիմել դատարան», - նշեց փորձագետը:

Նա նաև հայտնեց, որ գործադրվում են գերմանական արտադրության արագաչափեր, որոնք համարվում են աշխարհում լավագույներից:

Ոստիկանությունում չեն բացառում, որ մոտակա ժամանակներում արագաչափեր և տեսախցիկներ նաև այլ փողոցներում տեղադրվեն: