Ձեր վստահելի աղբյուրը

Հունվարի 23-ին Ֆրանսիայի սենատում Հայոց ցեղասպանությունը քրեականացնող օրինագծի քննարկմանը զուգահեռ Թուրքիայի վարչապետ Ռեջեփ Թայիփ Էրդողանն իր գլխավորած «Արդարություն և զարգացում կուսակցության» կենտրոնակայանում ղեկավար խորհրդի ժողով է հրավիրել:

Ըստ թուրքական «Միլլիյեթ» (Milliyet) պարբերականի տեղեկատվության`ժողովի ընթացքում Էրդողանը, հայտարարել է, որ, եթե Սարկոզին վերընտրվի նախագահի պաշտոնում, ապա հնարավոր է ինքն այլևս Ֆրանսիա չայցելի: Ժողովի մասնակիցները կարծիք են հայտնել այն մասին, որ Ֆրանսիային պետք է կտրուկ պատասխան տալ, ինչպես նաև սենատի որոշմանը հակադարձելու համար պետք է փնտրել միջազգային բոլոր իրավական ճանապարհները:

Աղբյուրի համաձայն` ժողովի ընթացքում քննարկվել են Ֆրանսիայի դեմ կիրառվելիք հետևյալ հնարավոր պատժամիջոցները.
-Ֆրանսիայում Թուրքիայի դեսպանի հետկանչն ավելի երկարաժամկետ դարձնել:

-Դիվանագիտական հարաբերություններն իջեցնել ամենացածր մակարդակի, ինչպես դա արվեց Իսրայելի դեպքում:

-Առևտրաշրջանառությունից հանել Ֆրանսիական ապրանքները:

-Ֆրանսիայում Թուրքիայի կցորդին (ատաշե) հետ կանչել, իսկ Անկարայում Ֆրանսիայի կցորդի հավատարմագիրը չեղյալ հայտարարել:

-Թուրքիայի օդային տարածքը փակել ֆրանսիական ռազմական օդանավերի առջև:

-Թուրքիայի ջրային տարածքը փակել ֆրանսիական ռազմանավերի առջև:

-Պատժամիջոցները պետք է լինեն տևական, ոչ թե ժամանակավոր: