Ձեր վստահելի աղբյուրը

2011 թվականը Հայաստանի պետական ճարտարագիտական համալսարանի (Պոլիտեխնիկ) համար անցումային եղավ. հուլիս-սեպտեմբեր ամիսներին օրենքով սահմանված կարգով տեղի ունեցավ համալսարանի ռեկտորի փոփոխություն, նույն տարում ավարտվեց բուհի ընթացիկ ստրատեգիկ պլանը և ընդունվեց նորը: Այս մասին այսօր տեղի ունեցած Հայաստանի պետական ճարտարագիտական համալսարանի Կառավարման խորհրդի անդրանիկ նիստում հայտնեց ՀՊՃՀ ռեկտոր Արա Ավետիսյանը:

Նիստի ժամանակ, որը վարեց ՀՊՃՀ Կառավարման խորհրդի նախագահ, ՀՀ Ազգային ժողովի նախագահ Սամվել Նիկոյանը, ներկայացվեց 2011թ. գործունեության հիմնական արդյունքների վերաբերյալ հաշվետվությունը, ինչպես նաև 2012թ. բյուջեն:

Ըստ Ա.Ավետիսյանի, Հայաստանի պետական ճարտարագիտական համալսարանի տարբեր ոլորտների գործունեությունն ուղղորդվում է համալսարանի ստրատեգիական պլանով սահմանված նպատակների և խնդիրների դրույթներով:

«Այս իմաստով հաշվետու 2011թ. օրացուցային տարին նույնպես անցումային եղավ համալսարանի համար` լրացավ ՀՊՃՀ 2006-2010 թթ. ստրատեգիական պլանի գործողության ժամկետը և 2011թ. մայիսի 6-ին ՀՊՃՀ Խորհրդի կողմից հաստատվելուց հետո, գործողության մեջ մտավ ՀՊՃՀ նոր` 2011-2015 թթ. ստրատեգիական պլանը, որը հանդիսա-
ցավ նախորդի տրամաբանական շարունակությունը»,- ասաց ռեկտորը:

2011թ. շարունակվել է համալսարանի կառուցվածքի և կառավարման համակարգի փոփոխման ու կատարելագործման գործընթացը: Միաժամանակ, ըստ ռեկտորի` շարունակում է ոչ բավարար մնալ Համալսարանի կառավարման կառույցների կադրային ապահովվածության և ռեզերվի առկա վիճակը:

«Շարունակվում է հրատապ մնալ վարչակազմի փուլային նորացման և երիտասարդացման քաղաքականություն վարելու անհրաժեշտությունը», - նշեց Ա.Ավետիսյանը:

Նրա խոսքով` դեռևս արդի պահանջներին չի բավարարում ինֆորմացիոն համակարգերի և քոմփյութերային միջոցների կիրառման մակարդակը Համալսարանի կառավարման ոլորտում:

«Այս ուղղությամբ, թերևս, կարևոր քայլ պետք է համարել «Mulberry» փաստաթղթաշարժային համակարգի ներմուծումը, որով զգալիորեն կրճատվել է թղթաբանությունը և բարձրացել է գործավարության արդյունավետությունը», - հավելեց ռեկտորը:

Ընդհանուր առմամբ, ըստ Ա.Ավետիսյանի, արձանագրվել է համալսարանական հաստիքների ընդհանուր թվի նվազում (57,0-ով): Ընդ որում, հաստիքների թվի նվազումը գրանցվել է և Երևանի կրթահամալիրում (37,75-ով), և մասնաճյուղերում:

Ռեկտորը մտահոգություն հայտնեց, որ պրոֆեսորադասախոսական կազմի 63,3%-ը (նախորդ տարվա 61,5%-ի դիմաց) ձևակերպված է աշխատանքային պայմանագրով (առանց մրցույթի), հատկապես առանձնանում են ավագ դասախոսի և ասիստենտի տարակարգերը, իսկ մի շարք ամբիոններում տարեցտարի մեծ է մնում աշխատանքային պայմանագրով (առանց մրցույթի) ձևակերպված դասախոսների (բոլոր տարակարգերով) թվաքանակը: Ասիստենտի և դասախոսի տարակարգերում ձևակերպված անձանց շատ փոքր մասն են կազմում գիտական աստիճան ունեցողները:

«Այդ պատճառով նպատակահարմար է անցկացնել դասախոսների վերաորակավորում և պայմանագրերը ձևակերպել ոչ թե 1, այլ 5 տարով», - նշեց Ա.Ավետիսյանը:

Աճել է ՀՊՃՀ դասախոսական կազմի միջին տարիքը (55,6), ինչը, ըստ ռեկտորի, խոսում է
համալրման անբավարար տեմպերի և այս առումով ասպիրանտուրայի համեմատաբար ցածր արդյունավետության մասին:

Միաժամանակ Ա.Ավետիսյանը հայտնեց, որ 2011 թվականին, ընդհանուր առմամբ, արձանագրվել է համալսարանական հաստիքների ընդհանուր թվի նվազում (57,0%-ով): Ընդ որում, հաստիքների թվի նվազումը գրանցվել է և Երևանի կրթահամալիրում (37,75-ով), և մասնաճյուղերում: