Ձեր վստահելի աղբյուրը

ՀՀ կառավարության կողմից զբոսաշրջությունը հռչակվել է որպես տնտեսության զարգացման կարևոր ուղղություններից մեկը, սակայն շրջակա միջավայրի աղտոտվածությամբ հնարավոր չէ Հայաստանում տուրիզմ զարգացնել: Այս մասին Panorama.am-ի հետ զրույցում ասաց «Հանուն կայուն մարդկային զարգացման» ասոցիացիայի նախագահ Կարինե Դանիելյանը:

Բնապահպանն արձագանքելով ՀՀ էկոնոմիկայի նախարար Տիգրան Դավթյանի արտահայտած այն մտքին, թե միևնույն տարածաշրջանում հնարավոր է համատեղել տուրիզմն ու հանքարդյունաբերությունը, նշեց, որ հնարավոր է համատեղել, եթե այն շրջակա միջավայրի համար վնասակար չէ: Ըստ նրա՝ դա կարող է լինել ավազի, պեռլիտի կամ քարի հանքերի շահագործում, չնայած այս դեպքում փոշու խնդիր կա, բայց եթե այդ հարցը լուծվի, ապա հնարավոր է:

«Ծանր մետաղների մշակման արդյունքում՝ պայթեցումները, փոշին և թունավոր տարրեր պարունակող ապարները լուրջ վնաս կհասցնեն շրջակա միջավայրին: Եվ փոքր տարածքում կողք-կողքի դնել հանքարդյունբերությունն ու զբոսաշրջությունը՝ ուղղակի անհնար է»,- ասաց Կ.Դանիելյանը:

Բնապահպանը տեղեկացրեց, որ տուրիստների շրջանում անցկացված հարցումների արդյունքում պարզվել է, որ Հայաստանը զբոսաշրջիկներին գրավում է իր գեղեցիկ լանդշաֆտներով, բնությունով ու պատմամշակութային հուշարձաններով, մինչդեռ որպես բացասական գործոն՝ նշվել է շրջակա միջավայրի աղտոտվածությունը: «Իսկ դրա պատճառով երկրի վարկանիշն է ընկնում»,- նկատեց Կ.Դանիելյանը:

«Եթե դու հսկա Ռուսաստան ես՝ կարող ես քո տարածքի մի մասում ուրան, մետաղ պարունակող հանքեր շահագործել, իսկ մյուս մասում՝ պահպանելով շրջակա միջավայրի մթնոլորտը զբոսաշրջություն զարգացնել, սակայն Հայաստանի նման փոքր երկրում անհնար է դա իրականացնել»,- նշեց նա:

Կ.Դանիելյանի կարծիքով՝ եթե այս տեմպերով Հայաստանում հանքեր շահագործեն, ապա զբոսաշրջության զարգացման մասին խոսք անգամ լինել չի կարող: Նրա խոսքերով՝ միգուցե սփյուռքահայերը աչք փակելով գան Հայաստան, բայց բոլոր դեպքերում բուն զբոսաշրջությունը, որ ակնկալվում է աշխարհի մասշտաբով զարգացնել՝ անհնար է:

Անդրադառնալով Ջերմուկից շուրջ 13 կմ հեռավորությամբ Ամուլսարի հանքավայրի շահագործմանը, Կ.Դանիելյանը նշեց, որ Ջերմուկը մեր ազգային հպարտությունն է և այն պետք է աչքի լույսի պես պահպանել, նույնը վերաբերում է Ծաղկաձորին, քանի որ եթե Հրազդանում երկաթի հանք շահագործեն, ապա այստեղ էլ լուրջ խնդիրներ կունենանք:

Նշենք, որ էկոնոմիկայի նախարար Տ.Դավթյանը երեկ լրագրողներին ասել էր՝ Ամուլսարի հանքավայրը շահագործող ընկերությունից վստահեցրել են, որ հանքի շահագործումից Ջերմուկի տարածքը 100 տոկոսով զերծ է մնալու բնապահպանական վտանգներից:
 
Կ.Դանիելյանն էլ նշեց. «Մինչև հիմա չեմ ճանաչում որևէ ընկերություն, որը 100%-ով չի վստահեցնում՝ մաքուր է աշխատելու: Բոլորը նույն բանն են ասում, բայց Հայաստանում մաքուր հանքարդյունահանման նույնիսկ մեկ դրական փորձ չունենք»,- նկատեց բնապահպանը:

Նա կարծում է, որ ճիշտ կլինի, որ եղած ներուժն այսօր ուղղվեն պոչամբարների վերամշակմանը, քանի որ այսօրվա տեխնոլոգիաները թույլ են տալիս, որ այդ պոչամբարները օգտագործվեն որպես հումք: Այս դեպքում թեև շահույթը այդքան էլ մեծ չի լինի, բայց ուշադրությունը, ըստ Կ.Դանիելյանի, պետք է այդ ուղղությամբ կենտրոնացնել:

«Ի վերջո` չպետք է մոռանանք, որ մենք երկրի ներկայի և ապագայի հետ գործ ունենք»,- ընդգծեց Կ.Դանիելյանը: