Ձեր վստահելի աղբյուրը

Մարտի մեկի իրադարձություններից հետո անազատության մեջ հայտնված, ապա ազատ արձակվածներից այսօր էլ ՀՀՇ նախկին անդամ Սամվել Աբովյանն է բաց նամակ հղել ՀԱԿ-ին: «Ես` որպես նախկին քաղբանտարկյալ լավ եմ ճանաչում մյուս նախկին քաղբանտարկյալներին: Եւ Դուք իրավունք չունեք Սուրիկի դեմ ուղղել Ձեր ծանր հրետանին: …Դուք նախկին քաղբանտարկյալներին վարկաբեկելու իրավունք չունեք: Ես ինքս էլ չեմ դիմել Եվրադատարան, ի՞նչ է, ես դադարում եմ նախկին քաղբանտարկյալ լինելուց»,-ասել է ՀԱԿ նախկին համախոհը:

Հիշեցննեք,  որ ՄԻԵԴ-ից իր գանգատը հետ վերցնելու մտադրության մասին հայտարարել էր Վանո Սիրադեղյանի թիկնազորի պետ Սուրեն Սիրունյանը, ինչին ի պատասխան ՀԱԿ ներկայացուցիչ Գագիկ Ջհանգիրյանը արձագանքել էր, թե գանգատը հետ վերցնելուց հետո Սիրունյանը կդադարի համարվել քաղբանտարկյալ:

Քաղաքական ուժերը պատրաստվում են ընտրություններին: Panorama.am-ի` մասնակցության ձևաչափի ու այլ հարցերին այսօր պատասխանել է «Ժողովրդավարություն և աշխատանք» կուսակցության նախագահ Սպարտակ Մելիքյանը: Մասնակցության ձևաչափը պարզ կլինի փետրվարի վերջին` կուսակցության համագումարից հետո:  Ս. Մելիքյանը չի բացառել, որ կարողք է ընդգրկվել ՀՀԿ համամսնական ցուցակում:

«Հանրապետական կուսակցությունն իր ցուցակը վերջնականապես կազմում է այն պահին, երբ արդեն մուտք պիտի գործի Կենտրոնական ընտրական հանձնաժողով: Մնացածներն անընդհատ քննարկման խնդիր ունեն, բայց դրանք այսօր դեռ չեն սկսվել»,-հայտարարել է կուսակցության փոխնախագահ Գալուստ Սահակյանը:

Հայաստանում շարունակում են Սենատի ընդունած օրինագծի վերաբերյալ քննարկումները: Քաղաքագետ Ալեքսանդր Իսկանդարյանի  կարծիքով, օրինագիծը կվավերացվի Ֆրանսիայի նախագահ Նիկոլա Սարկոզիի կողմից: Իսկ այն, որ Թուրքիան կխզի իր կապերը Ֆրանսիայի հետ, ՆԱՏՕ-ի շրջանակում չեն համագործակցի, իսկ Էրդողանն էլ չի մեկնի Փարիզ կամ Ստրասբուրգ Ա.Իսկանդարյանը լուրջ չի համարում:

ԵԽԽՎ-ն շարունակում է իր նստաշրջանը: Հայաստանյան պատվիրակության անդամ Նաիրա Զոհրաբյանը, ով մասնակցում է խորհրդաժողովի աշխատանքներին, այսօր դժգոհել է դրա` երկակի ստանդարտների կիրառումից: «Չպետք է լինեն արտոնյալ երկրներ, որոնք կարող են «ժողովրդավարություն» գնել նավթով կամ մեկ այլ արտարժույթով»,-ասել է Զոհրաբյանը` նկատի ունենալով Ադրբեջանին ու Թուրքիային: «Դեկտեմբերին Ֆրանսիայի խորհրդարանն ընդունեց Հայոց ցեղասպանության ժխտումը քրեականացնող օրենքի նախագիծ, իսկ ընդամենը վերջերս Թուրքիայի արտոնագրման պետական վարչությունը գրանցել է «Սարկոզի» անվանումով զուգարանի թուղթ և երեխայի տակդիր: Իսկ թե պետական նույն այդ կազմակերպությունն ի՞նչ է գրանցել նախագծի հեղինակ Վալերի Բուայեի անունով, ես անգամ անհարմար եմ զգում բարձրաձայնել»,-ասել է պատգամավորը:

Ռուսաստանի Դաշնության և Թուրքիայի ԱԳ նախարարներն այսօր Մոսկվայում կայացած բանակցություններից հետո համատեղ հայտարարություն են ընդունել, որտեղ ի թիվս այլ հարցերի, անդրադարձ կա Հարավայն Կովկասի տարածաշրջանին ու ԼՂ հակամարտությանը: Կողմերը փաստել են նաև, թե Սոչիում հունվարի 23-ին Դ. Մեդվեդևի, Ս. Սարգսյանի և Ի. Ալիևի կողմից ընդունված հայտարարությունը լրացուցիչ խթան կհանդիսանա խաղաղ կարգավորման գործընթացի համար: Շեշտվել է նաև Ռուսաստանի ու Թուրքիայի հակամարտության գոտում կայունության հաստամանը միտված ներուժն օգտագործելու կարևորությունը:

Ճանապարհային ոստիկանությունը նոր գործելակերպի է անցել: Սխալ տեղում կայանված մեքենաների ոչ թե պետհամարանիշներն են հանում, ինչպես նախկինում էր, այլ օրենքով սահմանված կարգով տեղափոխվում են հատուկ տարածք` տուգանային հրապարակ: Հունվարի 10- 22-ը ոստիկանության ճանապարհային ոստիկանության ճանապարհապարեկային ծառայության 1-ին սպայական գումարտակի ծառայողների կողմից, կանգառի և կայանման կանոնները խախտելու համար ճանապարհային ոստիկանության հատուկ պահպանվող տարածք է տեղափոխվել 32 տրանսպորտային միջոց, իսկ տեղում կազմվել է 165 վարչական իրավախախտումների վերաբերյալ արձանագրություն:

Արդարադատության նախարարն այսօր խոսել է առաջիկա տարում իր անելիքներից: Հրայր Թովմասյանը նաև մտադիր է աշխատակիցներին աշխատելու նոր «ստիմուլներ» փոխանցել: ախարարությունում ստեղծվելու են «աշխատանքային նորմալ պայմաններ», ներդրվելու են խրախուսման համակարգեր, 50 աշխատակիցներ հաճախելու են անգլերենի դասընթացների, շուրջ 60-ն էլ` մարզադահլիճներ: «Իմ փոխնախարարները ամուսնացած չեն, գուցե այդ ամենից հետո նրանք որոշեն ամուսնանալ», -կատակով նկատել է նախարար Թովմասյանը:

Թիվ 130 մանկապարտեզում ժամկետանց կաթի փոշի են հայտնաբերել: Տնօրեն ազատված է աշխատանքից, քաղաքապետարանից վստահեցնում են, որ ամենօրյա ստուգումները շարունակվելու են, իսկ ներում-բեկում չի լինելու: « «Ո՞վ է երաշխավորում, որ այդ ժամկետանց կաթը վաղը չէին տալու երեխաներին: Ես վստահեցնում եմ, որ ցանկացած մանկապարտեզի տնօրեն, ով ուզում է լինի, հաստատ պատասխանատվության է ենթարկվելու, որովհետև ինքը պարտավոր է, ի վերջո, որպես հաստատության ղեկավար վերահսկել այս հաստատությունը»,-խախտում կատարած մանկապարտեզի արդարացող տնտեսվարին այսպես է արձագանքում քաղաքապետարանի հասարակայնության հետ կապերի վարչության պետը:

Հայաստանի տնտեսական ակտիվության ցուցանիշը 2011թ-ին կազմել է 5.9 % : Ըստ ՀՀ Ազգային վիճակագրական ծառայության այսօր հրապարակած նախնական ամփոփագրի, նշված ժամանակահատվածում արդյունաբերության ու գյուղատնտեսության աճը կազմել է 14.1-ական տոկոս:

«Հայաստան» առևտրի կենտրոնն անցել է «Ամերիաբանկ» ընկերությանը` Բանկի նկատմամբ ստանձնած վարկային պարտավորությունների չկատարման հիմքով: «Ամերիաբանկի կողմից տրամադրվել է ծանուցում նշված տարածքի վարձակալ հանդիսացող ««Հայաստան» առևտրի կենտրոն Հայրապետյան եղբայրներ» ՓԲԸ-ին` տարածքը մեկամսյա ժամկետում ազատելու վերաբերյալ, սակայն նշված պահանջը չի կատարվել: «Ներկայումս Բանկն իրականացնում է աշխատանքներ` նշված տարածքն ապօրինի տիրապետումից ազատելու ուղղությամբ»,-ասված է բանկի տարածած պարզաբանման մեջ:

Լոռու մարզին այս տարի կտրամադրվի 2000 տոննա ազոտական պարարտանյութ, որի 50 կիլոգրամանոց պարկի արժեքը սահմանվել է 6000 դրամ: Լոռու մարզպետի այս հայտարարությունը հրապարակելուց հետո գյուղատնտեսության նախարարությունը հանդես եկավ հայտարարությամբ, որ համայնքների ղեկավարները, հաշվի առնելով բնակիչներից ստացված պահանջարկը, պարարտանյութի յուրաքանչյուր պարկի դիմաց պետք է գանձեն 6000 դրամ և ոչ ավելի և գումարները փոխանցեն մատակարարող կազմակերպությանը: Բացի դրանից, պարարտանյութի փոխադրման և ճանապարհածախսի համար բնակիչները լրացուցիչ չպետք է վճարեն:

ՀՀ կառավարության կողմից զբոսաշրջությունը հռչակվել է որպես տնտեսության զարգացման կարևոր ուղղություններից մեկը, սակայն շրջակա միջավայրի աղտոտվածությամբ հնարավոր չէ Հայաստանում տուրիզմ զարգացնել: Այս մասին Panorama.am-ի հետ զրույցում ասաց «Հանուն կայուն մարդկային զարգացման» ասոցիացիայի նախագահ Կարինե Դանիելյանը: Բնապահպանն արձագանքելով ՀՀ էկոնոմիկայի նախարար Տիգրան Դավթյանի արտահայտած այն մտքին, թե միևնույն տարածաշրջանում հնարավոր է համատեղել տուրիզմն ու հանքարդյունաբերությունը, նշեց, որ հնարավոր է համատեղել, եթե այն շրջակա միջավայրի համար վնասակար չէ, սակայն. «Ծանր մետաղների մշակման արդյունքում՝ պայթեցումները, փոշին և թունավոր տարրեր պարունակող ապարները լուրջ վնաս կհասցնեն շրջակա միջավայրին: Եվ փոքր տարածքում կողք-կողքի դնել հանքարդյունբերությունն ու զբոսաշրջությունը՝ ուղղակի անհնար է»: