Ձեր վստահելի աղբյուրը

Միացյալ Նահանգների պետքարտուղար Հիլարի Քլիթոնը երեկ Վաշինգտոնի Թաուն Հոլում կայացած հարցուպատասխանի ժամանակ, անդրադառնալով հարցին, թե ինչո՞ւ Նահանգները չեն ճանաչում Հայոց Ցեղապանությունը, ասել է, թե դա վտանգավոր դուռ կբացի, որով անցնելն հեշտ չի լինի: Այս մասին գրում է «Ասբարեզ» պարբերականը, հիշեցնելով, թե այդ նույն Քլինթոնը դեռևս 4 տարի առաջ նախագահական ընտրությունների քարոզարշավի ժամանակ հավաստիացնում էր, թե նախագահ ընտրվելու դեպքում կճանաչի Հայոց Ցեղասպանությունը:

Պատասխանելով հարցին, Քլինթոնն ասել, թե Հայոց Ցեղասպանությունն առավել պատմական հարց է, ոչ թե քաղաքական: «Կարծում եմ ամերիկյան կառավարության դիրքորոշումն այս հարցի առնչությամբ ճիշտ է, քանզի ինչքան էլ որ սարսափելի լինի կատարվածն ու բարձր լինի զգացմունքայնությունը դրա վերաբերյալ, այն բացում է շատ վտանգավոր մի դուռ, որով անցնելը դժվար կլինի», - ասել է պետքատուղարը, հավելելով, թե ինքը մեծ սրտացավությամբ է վերաբերում բոլոր նրանց, ովքեր մտահոգված են այդ հարցով:

Քլինթոնը նշել է, թե պատմական իրողության քննարկման համար այժմ ստեղծված են առավել բարենպաստ պայմաններ, քան նախկինում: «Մարդիկ կարող են խոսել, եզրահանգումներ անել, որոնք պետք է հարգվեն, ներկայացնել իրենց վկայությունները, լսեն այլոց մոտեցումներն ու պատրաստ լինեն հակադիր կողմի հետ քննարկմանը»:

Խոսելով ֆրանսիական սենատի կողմից Ցեղապանությունների քրեականցման մասին օրինագծից, Քլինթոնն ասել է
«Մեր ամենաուժեղ կողմերից մեկն այն է, որ մենք չենք քրեականացնում մարդկանց հայտարարությունները։ Մարդիկ կարող են ասել գրեթե ամեն ինչ մեր երկրում, ինչպես և դա արվում է: Այլ երկրներում, այդ թվում նաև մեր մոտ ընկերների ու դաշնակիցների, ինչպիսին է նաև Ֆրանսիան, գործում են այլ չափանիշներ: Բայց մենք, հուսով եմ, երբեք չենք գնա մարդկանց արտահայտությունները քրեականացնելու ճանապարհով»,– ասել է պետքարտուղարը, չհիշատակելով, որ Միացյալ Նահանգներում գործում են այլատյացությունը քրեական պատասխանատվության ենթարկող համապատասխան օրինագծեր:

Ամերիկայի հայկական համագումարի գործադիր տնօրեն Արամ Համփարյանը, մեկնաբանելով Քլինթոնի հայտարարություններն, ասել է. «Ցավալի տեսարան է, հետևել պետքարտուղար Քլինթոնին, ով փորձում է թաքնվել պատմաբաններին ուղղված ցինիկ հղումների հետևում, պատմաբանների, որոնց գերակշռող մասը բազմիցս է դեմ հանդես եկել Հայոց Ցեղասպանության ժխտման թուրքական քաղաքականությանը, հետևել, թե ինչպես է պետքարտուղարը փորձում շեղել ուշադրությունը թե նախագահ Օբամայի, թե փոխնախագահ Բայդենի, և ցեղասպանությունը որպես հանցագործություն ճանաչելու իր անձնական խոստումներից, իսկ ավելի ընդհանրական` շեղել ուշադրությունը Ամերիկայի կողմից իր բարոյական պարտքի կատարման ձախողումից և այլ կառավարության կողմից մեր իրավունքների պաշտպանության վետոյին դեմ կանգնելու քաղաքականությունից» - ասել է Համփարյանը:

Պարբերականը հիշեցնում է, թե ուղիղ չորս տարի այս շաբաթ նախագահական ընտրությունների դեմոկրատական կուսակցության ներկայացուցիչ Հիլարի Քլինթոնը Հայոց Ցեղասպանության մասին խոսելիս ասել էր. «Ես հավատում եմ, որ Օսմանյան կայսրության կողմից հայերի նկատմամբ իրագործածը ցեղասպանության հստակ օրինակ է: Ես երկու անգամ գրել եմ նախագահ Բուշին, որպեսզի վերջինս իր ամենամյա հայտարարությունում նշի Հայոց Ցեղասպանություն եզրույթը, իսկ որպես նախագահ ես կճանաչեմ Հայոց Ցեղասպանությունը: Մեր ընդհանուր բարոյականությունը որպես մարդու իրավունքների ջատագով ու օրրան հանդիսացող ազգի մարտահրավեր է նետում, որպեսզի կոնգրեսի և նախագահի մակարդակով ճանաչվի Հայոց Ցեղասպանությունը», - Քլինթոնի չորսամյա վաղեմության խոսքերը մեջբերում է պարբերականը: